ರಕ್ಷಣಾ ಸಾಮಗ್ರಿಗಳನ್ನು ಭಾರತಕ್ಕೆ ಕಳಿಸುವಲ್ಲಿ ರಷ್ಯಾವು ಪ್ರಮುಖ ದೇಶವಾಗಿದ್ದು, ಕಳೆದ ಐದು ವರ್ಷಗಳಲ್ಲಿ ಆ ದೇಶಕ್ಕೆ ಪಾವತಿಸಿದ ಮೊತ್ತ ಒಂದು ಲಕ್ಷ ಕೋಟಿ ರೂ.ಗಿಂತ ಹೆಚ್ಚು ಎಂಬುದು ಈ ಮಾತಿಗೆ ಸಾಕ್ಷಿ. ಯೂಕ್ರೇನ್ ಮೇಲೆ ರಷ್ಯಾ ಯುದ್ಧ ಸಾರಿದ್ದರಿಂದಾಗಿ, ರಷ್ಯಾದಿಂದ ತೈಲ ಸೇರಿದಂತೆ ವಿವಿಧ ವಸ್ತುಗಳನ್ನು ಆಮದು ಮಾಡಿಕೊಳ್ಳಬಾರದೆಂದು ಅಮೆರಿಕವು ವಿಶ್ವದೇಶಗಳ ಮೇಲೆ ಒತ್ತಡ ಹೇರಿದೆ. ಭಾರತವು ರಷ್ಯಾ-ಯೂಕ್ರೇನ್ ಸಮರ ವಿಚಾರದಲ್ಲಿ ತಟಸ್ಥ ನಿಲುವು ತಾಳಿದ್ದು, ರಷ್ಯಾದಿಂದ ತೈಲ ಹಾಗೂ ರಕ್ಷಣಾ ಸಾಮಗ್ರಿಗಳ ಆಮದನ್ನು ಮುಂದುವರಿಸಿದೆ. ಇಂದಿನ ಜಾಗತಿಕ ಭೂ-ಸಾಮರಿಕ ವಾತಾವರಣದಲ್ಲಿ ಸಂಪೂರ್ಣ ಆಮದು ಸ್ಥಗಿತ ಕಷ್ಟವಾದರೂ, ಈ ದಿಕ್ಕಿನಲ್ಲಿನ ಚಲನೆ ನಿರ್ಣಾಯಕ ಪಾತ್ರವಹಿಸಬಲ್ಲದು.
