ಲಾಕ್​ಡೌನ್ ಕೂಡ ಪ್ರಯೋಜನಕ್ಕೆ ಬರಲಿಲ್ಲ...ಮಹಾರಾಷ್ಟ್ರದಲ್ಲಿ ಒಂದೇ ದಿನ 11 ಹೊಸ ಕರೊನಾ ಕೇಸ್​ ಪತ್ತೆ; ಹೀಗಾದ್ರೆ ವೈರಸ್ ಹರಡುವಿಕೆ 3ನೇ ಹಂತಕ್ಕೆ ಕಾಲಿಡುತ್ತಾ?

ಮುಂಬೈ: ಭಾರತದಲ್ಲಿ ಕರೊನಾ ಪೀಡಿತರ ಸಂಖ್ಯೆ 275ಕ್ಕೆ ಏರಿದೆ. ಇಷ್ಟುದಿನ ವೈರಸ್​ ಪಸರಿಸುವ ಪ್ರಮಾಣ 2ನೇ ಹಂತದಲ್ಲಿತ್ತು. ಈಗ ದಿನದಿಂದ ದಿನಕ್ಕೆ ಕರೊನಾ ಸೋಂಕಿತರ ಸಂಖ್ಯೆ ಹೆಚ್ಚುತ್ತಿರುವುದನ್ನು ನೋಡಿದರೆ, ಅದು ಮೂರನೇ ಹಂತಕ್ಕೆ ತಲುಪಲಿದೆಯಾ ಎಂಬ ಆತಂಕ ಕಾಡುತ್ತಿದೆ.

ಭಾರತದಲ್ಲಿ ಅತಿಹೆಚ್ಚು ಕರೊನಾ ರೋಗಿಗಳು ಇರುವುದು ಮಹಾರಾಷ್ಟ್ರದಲ್ಲಿ. ಶುಕ್ರವಾರ ಒಂದೇ ದಿನ 11 ಹೊಸ ಪ್ರಕರಣಗಳು ಪತ್ತೆಯಾಗಿವೆ. ಮಹಾರಾಷ್ಟ್ರದಲ್ಲಿ ಒಟ್ಟು 63ಮಂದಿಗೆ ಸೋಂಕು ಇರುವುದು ದೃಢಪಟ್ಟಿದೆ.
ಮುಂಬೈ, ಪುಣೆ, ನಾಗ್ಪುರ ಮತ್ತು ಪಿಂಪ್ರಿ ಚಿಂಚವಾಡಗಳು ಶುಕ್ರವಾರದಿಂದಲೇ ಲಾಕ್​ಡೌನ್​ ಆಗಿವೆ. ಈ ಮಧ್ಯೆ ಹೊಸದಾಗಿ 11 ಜನರಲ್ಲಿ ಕರೊನಾ ಕಾಣಿಸಿಕೊಂಡಿದೆ.

ಶುಕ್ರವಾರ ಪತ್ತೆಯಾದ 11 ಕರೊನಾ ಪ್ರಕರಣಗಳಲ್ಲಿ 10 ಜನರು ಮುಂಬೈನವರಾಗಿದ್ದು, ಓರ್ವ ಪುಣೆಯವರು.
ಕರೊನಾ ರೋಗಿಗಳನ್ನು ವಿವಿಧ ಆಸ್ಪತ್ರೆಗಳ ಐಸೋಲೇಶನ್​ ವಾರ್ಡ್​ನಲ್ಲಿ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.
ಎಲ್ಲ ಸರ್ಕಾರಿ, ಖಾಸಗಿ ಕಚೇರಿಗಳಲ್ಲಿ ಎಸಿ ಬಳಕೆಯನ್ನು ನಿಲ್ಲಿಸಿ. ಎಸಿ ಇದ್ದಲ್ಲಿ ಬಹುಬೇಗ ಕರೊನಾ ಹರಡುತ್ತದೆ ಎಂದು ಮಹಾರಾಷ್ಟ್ರ ಸರ್ಕಾರ ತಿಳಿಸಿದೆ.

ಸದ್ಯಕ್ಕೆ ಕರೊನಾ ವೈರಸ್​ ಸ್ಥಳೀಯ ಪ್ರಸರಣದ ಹಂತದಲ್ಲಿಯೇ ಇದೆ. ಸಾಮುದಾಯಿಕವಾಗಿ ಹರಡಿಲ್ಲ ಎಂದು ವರದಿಯಾಗಿದೆ. ಆದರೆ ಹರಡುತ್ತಿರುವ ವೇಗ ಮಾತ್ರ ಆತಂಕಕಾರಿಯಾಗಿದೆ. (ಏಜೆನ್ಸೀಸ್​)

https://www.vijayavani.net/senior-health-assistant-suspended/

https://www.vijayavani.net/coronavirus-railway-station/