ತುಂಬಾ ಆಸೆಯಿಂದ ಬಂದವ ಆಸ್ಪತ್ರೆ ಸೇರಿದ, ಮದುವೆ ಮನೆಯಲ್ಲೀಗ ಟೆನ್ಶನ್

ಯಾದಗಿರಿ: ಹಸೆಮಣೆ ಏರಲೆಂದು ನೂರಾರು ಕನಸಿನೊಂದಿಗೆ ಬೆಂಗಳೂರಿಂದ ಸ್ವಗ್ರಾಮಕ್ಕೆ ಬಂದಿದ್ದ ವರನಿಗೂ ಕೋವಿಡ್​ ಸೋಂಕು ತಗುಲಿದೆ. ಮದುವೆ ಸಂಭ್ರಮದಲ್ಲಿ ಮಿಂದೇಳಬೇಕಿದ್ದ ಯುವಕನೀಗ ಕೋವಿಡ್​ ಆಸ್ಪತ್ರೆ ಸೇರಿದ್ದಾನೆ.

ಇದುವರೆಗೂ ಮಹಾರಾಷ್ಟ್ರದ ಕಂಟಕ ಅನುಭವಿಸುತ್ತಿದ್ದ ಯಾದಗಿರಿಗೆ ರಾಜ್ಯರಾಜಧಾನಿಯ ಕಂಟಕ ಎದುರಾಗಿದೆ. ಶಹಾಪುರ ತಾಲೂಕಿನ ಹಳ್ಳಿಯೊಂದರ ಯುವಕನಿಗೆ ಕರೊನಾ ಸೋಂಕು ದೃಢಪಟ್ಟಿದೆ. ಬೆಂಗಳೂರಿನಲ್ಲಿದ್ದ ಆತ ತನ್ನ ಮದುವೆ ಸಲುವಾಗಿ ಜಿಲ್ಲೆಗೆ ಬಂದಿದ್ದ. ಇದನ್ನೂ ಓದಿರಿ video/ ಈ ಊರಿಗೆ ನೀವು ಕಾಲಿಟ್ರೆ 10 ಸಾವಿರ ರೂ. ದಂಡ ಫಿಕ್ಸ್!

ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ ಇನ್ನೈದು ದಿನದಲ್ಲಿ ಆತ ದಾಂಪತ್ಯಕ್ಕೆ ಕಾಲಿಡಬೇಕಿತ್ತು. ಕರೊನಾ ಪಾಸಿಟಿವ್ ಬಂದ ಯುವಕನ ಮದುವೆ ಇದೇ ತಿಂಗಳ 13ಕ್ಕೆ ಫಿಕ್ಸ್ ಆಗಿತ್ತು. ಈ ಹಿನ್ನೆಲೆಯಲ್ಲಿ ಜೂನ್ 29ರಂದು ಯುವಕ ಬೆಂಗಳೂರಿನಿಂದ ಯಾದಗಿರಿಗೆ ಬಂದಿದ್ದ. ಆ ವೇಳೆಯೇ ಆತ ಅನಾರೋಗ್ಯಕ್ಕೀಡಾಗಿದ್ದ ಎನ್ನಲಾಗಿದೆ. ಮುಂಜಾಗ್ರತಾ ಕ್ರಮವಾಗಿ ಯುವಕನಿಗೆ ಕರೊನಾ ಪರೀಕ್ಷೆ ಮಾಡಿಸಲಾಗಿದ್ದು, ವರದಿ ಪಾಸಿಟಿವ್ ಬಂದಿದೆ.

ಇದಕ್ಕೂ ಮುನ್ನ ಮದುವೆ ಕೆಲಸದ ಸಲುವಾಗಿ ಯುವಕ ಓಡಾಡಿದ್ದು, ಕುಟುಂಬಸ್ಥರು ಮತ್ತು ಗ್ರಾಮಸ್ಥರಲ್ಲಿ ಸೋಂಕಿನ ಭೀತಿ ಆವರಿಸಿದೆ. ಸದ್ಯ ಮದುವೆಯನ್ನು ಮುಂದೂಡಲಾಗಿದೆ.

https://www.vijayavani.net/notice-issued-by-bangalore-city-muncipal-council-in-1928-for-influenza-like-disease/