ಕರೊನಾ ಪ್ರತಿಕಾಯ ಮನುಷ್ಯನ ದೇಹದಲ್ಲಿ ಐದರಿಂದ ಏಳು ತಿಂಗಳವರೆಗೆ ಜೀವಂತವಿರುತ್ತದೆ ಎಂದು ಅಮೆರಿಕದ ಭಾರತೀಯ ಮೂಲದ ಸಂಶೋಧಕರೊಬ್ಬರು ತಿಳಿಸಿದ್ದಾರೆ. ಅರಿಜೋನಾ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕರಾಗಿರುವ ದೀಪ್ತಾ ಭಟ್ಟಾಚಾರ್ಯ ಈ ಕುರಿತು ಅಧ್ಯಯನ ನಡೆಸಿದ್ದಾರೆ. ಸುಮಾರು 6 ಸಾವಿರ ಸೋಂಕಿತರ ದೇಹದಲ್ಲಿನ ಪ್ರತಿಕಾಯವನ್ನು ಅಧ್ಯಯನಕ್ಕೆ ಒಳಪಡಿಸಲಾಗಿದೆ. ಸೋಂಕು ಜೀವಕೋಶಗಳಿಗೆ ತಗುಲಿದಾಗ, ದೇಹದಲ್ಲಿನ ರೋಗನಿರೋಧಕ ವ್ಯವಸ್ಥೆಯು ಸೋಂಕನ್ನು ತಡೆಯಲು ಪ್ಲಾಸ್ಮಾವನ್ನು ನಿಯೋಜಿಸುತ್ತದೆ. ಆ ಪ್ಲಾಸ್ಮಾ ಪ್ರತಿಕಾಯಗಳನ್ನು ಉತ್ಪಾದಿಸುತ್ತದೆ. ಸೋಂಕು ತಗುಲಿದ 14 ದಿನಗಳ ತನಕ ಪ್ರತಿಕಾಯಗಳು ರಕ್ತದ ಮಾದರಿಯಲ್ಲಿ ಕಾಣಿಸಿಕೊಳ್ಳುತ್ತವೆ. ರೋಗನಿರೋಧಕ ಪ್ರತಿಕ್ರಿಯೆಯ 2ನೇ ಹಂತವಾಗಿ ದೀರ್ಘಕಾಲೀನ ಪ್ಲಾಸ್ಮಾ ಕೋಶಗಳ ರಚನೆಯಾಗುತ್ತದೆ. ಇದು ಉನ್ನತ ಗುಣಮಟ್ಟದ ಪ್ರತಿಕಾಯಗಳನ್ನು ಉತ್ಪಾದಿಸುತ್ತದೆ. ಅದರಿಂದಾಗಿ ಐದರಿಂದ ಏಳು ತಿಂಗಳವರೆಗೆ ರೋಗನಿರೋಧಕ ಶಕ್ತಿ ಇರುತ್ತದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
