ಸಭೆಯಲ್ಲಿ ದ್ವಂದ್ವ: ಕಾಂಗ್ರೆಸ್ ಕಚೇರಿಯಲ್ಲಿ ನಡೆದ ಹಾಲಿ, ಮಾಜಿ ಶಾಸಕರ ಸಭೆಯಲ್ಲಿ ಮಾತನಾಡಿದ ಸಿದ್ದರಾಮಯ್ಯ, ಪಾದಯಾತ್ರೆ ಮೊಟಕುಗೊಳಿಸಿ ಈಗಾಗಲೇ ಸಿಕ್ಕಿರುವ ಜನರ ವಿಶ್ವಾಸವನ್ನು ಉಳಿಸಿಕೊಳ್ಳೋಣ ಎಂದರೆ, ಡಿ.ಕೆ. ಶಿವಕುಮಾರ್ ಪಾದಯಾತ್ರೆ ಮುಂದುವರಿಸಲೇಬೇಕು ಎಂದು ಪಟ್ಟು ಹಿಡಿದರು. ಇದರಿಂದಾಗಿ ಸಭೆಯಲ್ಲಿ ಯಾರನ್ನು ಬೆಂಬಲಿಸಬೇಕು ಎನ್ನುವ ದ್ವಂದ್ವ ನಿರ್ವಣವಾಗಿತ್ತು. ನ್ಯಾಯಾಲಯ ಮಧ್ಯಪ್ರವೇಶ ಮಾಡಿದೆ. ಇದು ಕೇವಲ ಡಿ.ಕೆ. ಶಿವಕುಮಾರ್ ಮೇಲೆ ಬರುವುದಿಲ್ಲ. ಇಡೀ ಪಕ್ಷಕ್ಕೆ ಕೆಟ್ಟ ಹೆಸರು ಬಂದುಬಿಡುತ್ತದೆ. ಸರ್ಕಾರ ಆದೇಶ ಮಾಡಿದಾಗ ನಾವು ಗೌರವ ನೀಡಲೇಬೇಕಾಗುತ್ತದೆ. ಉಲ್ಲಂಘನೆ ಮಾಡುವುದು ಬೇರೆ ಸಂದರ್ಭದಲ್ಲಿ, ಆದರೆ ಈಗ ಕರೊನಾ ಇರುವುದರಿಂದ ಉಲ್ಲಂಘಿಸಿದರೆ ಪಕ್ಷಕ್ಕೆ ಕೆಟ್ಟ ಹೆಸರು. ಕರೊನಾ ದಿನೇದಿನೆ ಜಾಸ್ತಿಯಾಗುತ್ತಿರುವ ಸಂದರ್ಭದಲ್ಲಿ ಬೆಂಗಳೂರಿಗೆ ಇಷ್ಟು ಜನರನ್ನು ಕರೆದುಕೊಂಡು ಹೋದರೆ ನಮ್ಮ ಪರವಾಗಿರುವ ವಾತಾವರಣ ಬದಲಾಗುತ್ತದೆ ಎಂದು ಸಿದ್ದರಾಮಯ್ಯ ತಿಳಿ ಹೇಳಿದರು ಎನ್ನಲಾಗಿದೆ. ಆದರೆ ಒಪ್ಪದ ಶಿವಕುಮಾರ್, ನಾವಿಬ್ಬರೇ ನಡೆಯೋಣ ಅಥವಾ 2 ಕಿಮೀ ಪಾದಯಾತ್ರೆ ಮಾಡಿ ಮುಗಿಸೋಣ ಎಂದು ಸಮಜಾಯಿಷಿ ನೀಡಿದ್ದಾರೆ. ಆದರೆ ಸಿದ್ದರಾಮಯ್ಯ ಸೇರಿ ಯಾರೊಬ್ಬರು ಅದನ್ನು ಒಪ್ಪಲಿಲ್ಲ. ಇಬ್ಬರೇ ನಡೆದರೂ ಜನ ಬಿಡುವರೇ ಎಂದು ಮರು ಪ್ರಶ್ನೆ ಹಾಕಿದಾಗ ಡಿಕೆಶಿ ಬಳಿ ಉತ್ತರವಿರಲಿಲ್ಲ.
