ಕರೊನಾ ಲಸಿಕೆ ಅನಾವರಣಗೊಳಿಸಿದ ಚೀನಾ; ಅಂತಿಮ ಹಂತದ ಫಲಿತಾಂಶದ ಬಳಿಕ ಬಳಕೆಗೆ ಮುಕ್ತ

ಬೀಜಿಂಗ್: ಕರೊನಾ ಮೊದಲಿಗೆ ಕಾಣಿಸಿಕೊಂಡ ಚೀನಾದಲ್ಲಿ ಆ ವೈರಸ್​ ನಿಗ್ರಹಕ್ಕೆ ಕಂಡು ಹಿಡಿದಿರುವ ಲಸಿಕೆಯನ್ನು ಇದೇ ಮೊದಲ ಬಾರಿಗೆ ಸಾರ್ವಜನಿಕವಾಗಿ ಪ್ರದರ್ಶಿಸಲಾಗಿದೆ.

ಇಲ್ಲಿನ ವ್ಯಾಪಾರಿ ವಸ್ತು ಪ್ರದರ್ಶನದಲ್ಲಿ (ಟ್ರೇಡ್​ ಫೇರ್​) ಕರೊನಾ ಲಸಿಕೆ ಹೊಂದಿರುವ ಗಾಜಿನ ನಳಿಕೆ ( ವಯಲ್​) ಇರಿಸಲಾಗಿದೆ. ಚೀನಿ ಕಂಪನಿಗಳಾದ ಸಿನೊವಾಕ್​ ಬಯೋಟೆಕ್​, ಸಿನೋಫಾರ್ಮ ಈ ಲಸಿಕೆಗಳನ್ನು ಅಭಿವೃದ್ಧಿಪಡಿಸಿವೆ. ಸದ್ಯ ಜಗತ್ತಿನಲ್ಲಿ ಅಂತಿಮ ಹಂತದ ಪರೀಕ್ಷೆಯಲ್ಲಿರುವ 10ಕ್ಕೂ ಹೆಚ್ಚು ಲಸಿಕೆಗಳ ಪೈಕಿ ಇವೆರಡೂ ಸೇರಿವೆ.

ಇದನ್ನೂ ಓದಿ; ಕರೊನಾ ಮರು ಸೋಂಕು; ತಿಂಗಳ ಬಳಿಕ ಮತ್ತೆ ಕೋವಿಡ್​; ಬೆಂಗಳೂರಿನಲ್ಲಿ ಪತ್ತೆಯಾಯ್ತು ಮೊದಲ ಪ್ರಕರಣ…! 

ಆದರೆ, ಈವೆರಡೂ ಲಸಿಕೆಗಳು ಇನ್ನೂ ಮಾರುಕಟ್ಟೆಯಲ್ಲಿ ಲಭ್ಯವಿಲ್ಲ. ಸಾರ್ವತ್ರಿಕ ಬಳಕೆಗೂ ಮುಕ್ತವಾಗಿಲ್ಲ. ಇವುಗಳನ್ನು ಮೂರನೇ ಹಂತದ ಪರೀಕ್ಷೆಗೆ ಒಳಪಡಿಸಲಾಗುತ್ತಿದ್ದು, ಇದಾದ ಬಳಿಕ ಅನುಮೋದನೆ ದೊರೆಯುವ ನಿರೀಕ್ಷೆಯಿದೆ. ಬೀಜಿಂಗ್​ ಹೊರವಲಯದಲ್ಲಿ ವರ್ಷಕ್ಕೆ 30 ಕೋಟಿ ಡೋಸ್​ ಉತ್ಪಾದನಾ ಸಾಮರ್ಥ್ಯವುಳ್ಳ ಔಷಧ ತಯಾರಿಕಾ ಘಟಕವೊಂದನ್ನು ಸಿನೊವಾಕ್​ ಸ್ಥಾಪಿಸಿದೆ ಎಂದು ಕಂಪನಿ ಪ್ರತಿನಿಧಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ಟ್ರೇಡ್​ ಫೇರ್​ನಲ್ಲಿ ಅತ್ಯಧಿಕ ಜನರು ಈ ಲಸಿಕೆ ಪ್ರದರ್ಶಿಸಿರುವ ಮಳಿಗೆಗಳ ಬಳಿ ಜಮಾಯಿಸಿದ್ದರು ಎಂದು ಸುದ್ದಿಸಂಸ್ಥೆಯೊಂದು ವರದಿ ಮಾಡಿದೆ. ಈ ನಡುವೆ ಕರೊನಾ ಜನ್ಮಸ್ಥಾನವಾದ ವುಹಾನ್​ ಕೋವಿಡ್​ನಿಂದ ಸಂಪೂರ್ಣ ಚೇತರಿಸಿಕೊಂಡಿದೆ. ಇದರ ಯಶಸ್ಸಿನ ಕಥೆಯನ್ನು ಜಗತ್ತಿಗೆಲ್ಲ ಹೇಳಲು ಚೀನಾ ಅಧಿಕಾರಿಗಳೆಲ್ಲ ಸಜ್ಜಾಗಿದ್ದಾರೆ.

ಜತೆಗೆ, ಕರೊನಾಗೆ ಲಸಿಕೆ ಕಂಡುಹಿಡಿದಿರುವುದನ್ನು ಜಗತ್ತಿಗೆ ಚೀನಿಯರ ಮುಂದಾಳತ್ವದ ಪ್ರತೀಕ ಎಂಬಂತೆ ಬಿಂಬಿಸಲಾಗುತ್ತಿದೆ.

https://www.vijayavani.net/russias-covid-19-vaccine-may-be-released-for-public-use-this-week/