ಹೆದ್ದಾರಿ ಮೇಲೆಯೇ ವಿಮಾನ ಪತನ: 8 ಪ್ರಯಾಣಿಕರು, ಇಬ್ಬರು ವಾಹನ ಸವಾರರು ಸೇರಿ 10 ಮಂದಿ ದುರ್ಮರಣ

ಕೌಲಾಲಂಪುರ್: ಲಘು ವಿಮಾನವೊಂದು ಚತುಷ್ಪಥ ಹೆದ್ದಾರಿಯಲ್ಲೇ ಪತನವಾದ ಭಯಾನಕ ದೃಶ್ಯ ಅದೇ ರಸ್ತೆಯಲ್ಲಿ ಸಾಗುತ್ತಿದ್ದ ಕಾರಿನ ಡ್ಯಾಶ್​ಕ್ಯಾಮೆರಾದಲ್ಲಿ ಸರೆಯಾಗಿದೆ. ಈ ಘಟನೆ ಮಲೇಶಿಯಾದಲ್ಲಿ ನಡೆದಿದ್ದು, ವಿಮಾನದಲ್ಲಿದ್ದ 8 ಮಂದಿ ಮತ್ತು ರಸ್ತೆಯಲ್ಲಿ ಸಾಗುತ್ತಿದ್ದ ಇಬ್ಬರು ವಾಹನ ಸವಾರರು ದುರಂತ ಸಾವಿಗೀಡಾಗಿದ್ದಾರೆ.

ವಿಡಿಯೋದಲ್ಲಿ ಏನಿದೆ?

ನೋಡು ನೋಡುತ್ತಿದ್ದಂತೆ ಲಘು ವಿಮಾನವು ಕೆಳಮುಖವಾಗಿ ಹಾರುತ್ತಾ ನೇರವಾಗಿ ರಸ್ತೆ ಬಂದು ಅಪ್ಪಳಿಸಿದ ಕೂಡಲೇ ಅದು ಸ್ಫೋಟಗೊಂಡು ಆ ಸ್ಥಳದಲ್ಲಿ ದೊಡ್ಡ ಬೆಂಕಿಯ ಜ್ವಾಲೆ ಹೊತ್ತಿಕೊಳ್ಳುತ್ತದೆ. ಸ್ವಲ್ಪ ಸಮಯದ ನಂತರ ಭಗ್ನಾವಶೇಷದಿಂದ ದಟ್ಟ ಹೊಗೆಯು ಆವರಿಸಿಕೊಳ್ಳುವುದನ್ನು ವಿಡಿಯೋದಲ್ಲಿ ಕಾಣಬಹುದಾಗಿದೆ.

ಈವರೆಗೂ 10 ಮಂದಿ ಸಾವಿಗೀಡಾಗಿದ್ದಾರೆ ಎಂದು ಹೇಳಬಹುದು. ಇದರಲ್ಲಿ ಇಬ್ಬರು ವಾಹನ ಸವಾರರು ಸೇರಿದ್ದಾರೆ. ಒಬ್ಬರು ಬೈಕ್​ ಸವಾರರು ಮತ್ತು ಇನ್ನೊಬ್ಬರು ಕಾರು ಚಾಲಕರಾಗಿದ್ದಾರೆ. ವಿಮಾನದಲ್ಲಿ 8 ಮಂದಿಯು ಮೃತರಾಗಿದ್ದಾರೆ ಎಂದು ಮಲೇಶಿಯಾ ಪೊಲೀಸರು ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ: ಬೆಂಗಳೂರಿಗೆ ಮೊದಲ ಅಧಿಕೃತ ಭೇಟಿ ನೀಡಿದ ಅಮೇರಿಕ ದೂತಾವಾಸದ ಕಾನ್ಸಲ್‌ ಜನರಲ್‌ ಕ್ರಿಸ್ಟೋಫರ್ ಡಬ್ಲ್ಯೂ. ಹಾಡ್ಜಸ್

ಕೇಂದ್ರ ಪಹಾಂಗ್ ರಾಜ್ಯದ ವಸತಿ ಮತ್ತು ಪರಿಸರದ ಉಸ್ತುವಾರಿ ವಹಿಸಿರುವ ರಾಜ್ಯ ಅಸೆಂಬ್ಲಿ ಸದಸ್ಯ ಜೋಹರಿ ಹರುನ್ ಸಹ ಮೃತಪಟ್ಟ ವಿಮಾನ ಪ್ರಯಾಣಿಕರಲ್ಲಿ ಒಬ್ಬರು ಎಂದು ತಿಳಿದುಬಂದಿದೆ.

ಉತ್ತರದ ರೆಸಾರ್ಟ್​ ದ್ವೀಪ್​ ಲಂಗಾವಿಯಿಂದ ಟೇಕಾಫ್​ ಆದ ಈ ವಿಮಾನ ಮಲೇಶಿಯಾ ರಾಜಧಾನಿ ಕೌಲಾಲಂಪುರದ ಪಶ್ಚಿಮದಲ್ಲಿರುವ ಸುಲ್ತಾನ್​ ಅಬ್ದುಲ್​ ಅಜೀಜ್​ ಶಾ ವಿಮಾನ ನಿಲ್ದಾಣದ ಕಡೆಗೆ ಬರುತ್ತಿತ್ತು. ವಿಮಾನವು ಪತನಗೊಂಡಾಗ ಅದರಲ್ಲಿ ಆರು ಪ್ರಯಾಣಿಕರು ಮತ್ತು ಇಬ್ಬರು ವಿಮಾನ ಸಿಬ್ಬಂದಿ ಇದ್ದರು ಎಂದು ಮಲೇಶಿಯಾದ ನಾಗರಿಕ ವಿಮಾನಯಾನ ಪ್ರಾಧಿಕಾರ ಪ್ರತಿಕಾ ಹೇಳಿಕೆಯಲ್ಲಿ ತಿಳಿಸಿದೆ.

ಈ ಘಟನೆಗೆ ಸಂಬಂಧಿಸಿದಂತೆ ತನಿಖೆ ನಡೆಸಲು ಮಲೇಶಿಯಾ ನಾಗರಿಕ ವಿಮಾನಯಾನ ಪ್ರಾಧಿಕಾರ ಆದೇಶಿಸಿದೆ. (ಏಜೆನ್ಸೀಸ್​)

https://www.vijayavani.net/famous-director-rv-udayakumar-asked-kiss-from-heroine-in-audio-launch

https://www.vijayavani.net/healthy-foods-that-are-high-in-potassium