50ರ ಮಧ್ಯ ವಯಸ್ಸಿನ ಮಹಿಳೆ ಒಬ್ಬಳು ಬಂದು ಕೇಳುತ್ತಾಳೆ: ‘ಸ್ವಾಮೀಜಿ, ನಮಗೆ ನಿಮ್ಮ ಆಶೀರ್ವಾದ ಬೇಕಿದೆ. ಈ ಪತಿಯ ಜೊತೆ ನಾನಿರಲು ಸಾಧ್ಯವಿಲ್ಲ. ನನಗೆ ಡೈವೋರ್ಸ್ ಬೇಕಾಗಿದೆ ದಯವಿಟ್ಟು ನೀವು ನನ್ನನ್ನು ಆಶೀರ್ವದಿಸಿ.’ ಈಗ ಡೈವೋರ್ಸ್ಗೂ ಆಶೀರ್ವಾದದ ಅವಶ್ಯಕತೆ ಇದೆ. ಆಗ ಸ್ವಾಮೀಜಿ, ‘ನೀನು ವಿಚ್ಛೇದನ ತೆಗೆದುಕೊಳ್ಳುವುದರಿಂದ ಅಥವಾ ತೆಗೆದುಕೊಳ್ಳದೆ ಇರುವುದರಿಂದ ನನಗೆ ಯಾವ ನಷ್ಟವೂ ಆಗುವುದಿಲ್ಲ, ಮದುವೆಯ ವಯಸ್ಸಿಗೆ ಬಂದಿರುವ ನಿನ್ನ ಮಕ್ಕಳಿದ್ದಾರೆ. ಅವರಿಗೆ ನೀವೇನು ಮಾರ್ಗದರ್ಶನವನ್ನು ನೀಡುತ್ತೀರಿ, ಮುರಿದುಹೋದ ಸಂಸಾರ, ಮುರಿದುಹೋದ ಮನೆಯಿಂದ ಬಂದಂತಹ ಮಕ್ಕಳು ಎಂಬುದನ್ನು ತೋರಿಸುತ್ತೀರಿ. ಗಮನಿಸಿ, ಜೀವನದಲ್ಲಿ ಸಹನೆ ಬೇಕು, ತಿತಿಕ್ಷೆ ಬೇಕು, ಸಮಸ್ಯೆಗಳು ಪ್ರತಿಯೊಬ್ಬರಿಗೂ ಕೂಡ ಬರುತ್ತವೆ, ಅದನ್ನು ಬುದ್ಧಿವಂತಿಕೆಯಿಂದ ಎದುರಿಸುವ ಶಕ್ತಿಯನ್ನು ನಾವು ಪಡೆಯಬೇಕು, ಬೆಳೆಸಿಕೊಳ್ಳಬೇಕು. ಯಾವಾಗ ನಾವು ನಮ್ಮ ದೃಷ್ಟಿಕೋನವನ್ನು ಬದಲಾಯಿಸಿಕೊಳ್ಳುತ್ತೇವೋ ನಮ್ಮ ಜೀವನ ಬದಲಾಗುತ್ತದೆ. ನಮ್ಮ ದೃಷ್ಟಿ ಬದಲಾಯಿತೋ ನಮ್ಮ ಜಗತ್ತೇ ಬದಲಾಗುತ್ತದೆ’ ಎಂದರು.
