ಮೂರು ದಶಕಗಳ ನಂತರ ಸಕ್ಕರೆನಾಡು ಮಂಡ್ಯ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಸಜ್ಜಾಗಿದೆ. ಇಂದಿನಿಂದ ಮೂರು ದಿನಗಳ ಕಾಲ 87ನೇ ಕನ್ನಡ ಸಾಹಿತ್ಯ ಸಮ್ಮೇಳನ ನಡೆಯಲಿದ್ದು, ಇದರ ಯಶಸ್ಸಿಗಾಗಿ ಸಕಲ ತಯಾರಿಗಳು ಪೂರ್ಣಗೊಂಡಿವೆ. ನಾಡಿನಾದ್ಯಂತದಿಂದ ಸಹಸ್ರ ಸಹಸ್ರ ಸಂಖ್ಯೆಯಲ್ಲಿ ಕನ್ನಡಾಭಿಮಾನಿಗಳು ಆಗಮಿಸಲಿದ್ದು, ಕನ್ನಡ ವಾತಾವರಣ ಮೈದಳೆಯಲಿದೆ. ಸಮ್ಮೇಳನ ಅಂಗವಾಗಿ ವಿವಿಧ ಗೋಷ್ಠಿಗಳು ನಡೆಯಲಿದ್ದು, ಇವು ಹೊಸ ಹೊಳಹು ಚೆಲ್ಲಲೆಂಬುದು ಸಹಜ ನಿರೀಕ್ಷೆ. ನಾಡು-ನುಡಿ ಬಗ್ಗೆ ಕಾಳಜಿ ಮತ್ತು ತಮ್ಮದೇ ಆದ ಪರಿಕಲ್ಪನೆ ಹೊಂದಿರುವ ಪ್ರಸಿದ್ಧ ಜಾನಪದ ಸಾಹಿತಿ, ಹಿರಿಯ ವಿದ್ವಾಂಸ ಡಾ. ಗೊ.ರು. ಚನ್ನಬಸಪ್ಪ ಸಮ್ಮೇಳನದ ಸರ್ವಾಧ್ಯಕ್ಷರಾಗಿದ್ದು, ಅಧ್ಯಕ್ಷೀಯ ಭಾಷಣದಲ್ಲಿ ಪ್ರಸ್ತಾಪಿಸಬಹುದಾದ ಸಂಗತಿಗಳ ಬಗ್ಗೆ ಕುತೂಹಲವಿದೆ. ಕನ್ನಡ ಸಾಹಿತ್ಯ ಸಮ್ಮೇಳನವನ್ನು ‘ನುಡಿಜಾತ್ರೆ’ ಎಂದೂ ಕರೆಯುವುದು ವಾಡಿಕೆ. ಜಾತ್ರೆಯ ಎಲ್ಲ ಲಕ್ಷಣಗಳೂ ಇಲ್ಲಿರುತ್ತವೆ. ಹಾಗೆಯೇ ಇದು ಕನ್ನಡ ಸಾಹಿತಿಗಳು, ಸಾಹಿತ್ಯಾಸಕ್ತರು, ಕನ್ನಡಾಭಿಮಾನಿಗಳ ಸಮ್ಮಿಲನದ ವೇದಿಕೆಯೂ ಹೌದು. ಸಮ್ಮೇಳನ ಪ್ರತಿ ವರ್ಷ ನಡೆಯುವುದು ಹೌದಾದರೂ, ಪ್ರತಿ ಸಮ್ಮೇಳನವೂ ವಿಭಿನ್ನ, ವಿಶಿಷ್ಟ.
