ಜಿಎಸ್​ಟಿ ಅಧಿಕಾರಿಗಳ ವಿರುದ್ಧ ಸಿಬಿಐ ಕೇಸ್​

ಹೈದರಾಬಾದ್: ಪ್ರಕರಣವೊಂದರ ಇತ್ಯರ್ಥಕ್ಕಾಗಿ ಕಂಪನಿ ಯೊಂದರಿಂದ ಐದು ಕೋಟಿ ರೂಪಾಯಿ ಲಂಚ ಕೇಳಿದ ಆರೋಪದ ಮೇಲೆ ಸರಕು ಮತ್ತು ಸೇವಾ ತೆರಿಗೆಯ (ಜಿಎಸ್​ಟಿ) ತೆರಿಗೆಗಳ್ಳತನ ನಿಗ್ರಹ ದಳದ ಇಬ್ಬರು ಹಿಂದಿನ ಅಧಿಕಾರಿಗಳ ವಿರುದ್ಧ ಕೇಂದ್ರೀಯ ತನಿಖಾ ದಳ (ಸಿಬಿಐ) ಮೊಕದ್ದಮೆ ದಾಖಲಿಸಿದೆ.

ಜಿಎಸ್​ಟಿ ಇಲಾಖೆಯ ತೆರಿಗೆಗಳ್ಳತನ ನಿಗ್ರಹ ದಳದ ಮಾಜಿ ಡೆಪ್ಯುಟಿ ಕಮಿಷನರ್ ಸುಧಾರಾಣಿ ಚಿಲಾಕ ಮತ್ತು ಸೂಪರಿಂಟೆಂಡೆಂಟ್ ಶ್ರೀನಿವಾಸ ಗಾಂಧಿ ಬೊಲ್ಲಿನೇನಿ ಆರೋಪಿತ ಅಧಿಕಾರಿಗಳು. ಹೈದರಾಬಾದ್​ನಲ್ಲಿ ನಿಯುಕ್ತರಾಗಿದ್ದ ಈ ಇಬ್ಬರು 2019 ಏಪ್ರಿಲ್ 15ರಂದು ಇನ್​ಫಿನಿಟಿ ಮೆಟಲ್ ಪ್ರಾಡಕ್ಟ್ಸ್​ ಎಂಬ ಕಂಪನಿಯಿಂದ 5 ಕೋಟಿ ರೂ.ಲಂಚ ಕೇಳಿದ್ದು 10 ಲಕ್ಷ ರೂ. ಪಡೆದಿದ್ದರು. ತೆರಿಗೆ ಕಟ್ಟದಿರುವ ವಿಚಾರದಲ್ಲಿ ಆ ಕಂಪನಿ ಮೊಕದ್ದಮೆ ಎದುರಿಸುತ್ತಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರಾಥಮಿಕ ತನಿಖೆ ವೇಳೆ ಪುರಾವೆಗಳನ್ನು ಕಲೆ ಹಾಕಿದ ಮೇಲೆ ಅವರನ್ನು ಬಂಧಿಸಲಾಗಿತ್ತು.

ರೆಡ್ಡಿ ಪ್ರಕರಣ ನಿರ್ವಹಿಸಿದ್ದರು

ಬೊಲ್ಲಿನೇನಿ ಗಾಂಧಿ ಜಾರಿ ನಿರ್ದೇಶನಾಲಯದಲ್ಲಿ ಇದ್ದಾಗ ಹೈದರಾಬಾದ್​ನ ಮುಸದ್ದಿಲಾಲ್ ಜ್ಯುವೆಲರ್ಸ್ ವಿರುದ್ಧದ 100 ಕೋಟಿ ನೋಟು ಅಮಾನ್ಯೀಕರಣ ವಂಚನೆ ಕೇಸ್ ಹಾಗೂ ಕರ್ನಾಟಕದ ಮಾಜಿ ಸಚಿವ, ಗಣಿ ಉದ್ಯಮಿ ಗಾಲಿ ಜನಾರ್ದನ ರೆಡ್ಡಿ ವಿರುದ್ಧದ ಪ್ರಕರಣ ಸಹಿತ ಹಲವು ಪ್ರಕರಣಗಳ ತನಿಖೆ ನಡೆಸಿದ್ದರು.

https://www.vijayavani.net/cia-shares-spot-the-difference-post/