ಕುದುರೆಯೇರಿ ಶಾಲೆಗೆ ಹೋಗುವ ಪೋರ! ಹುಬ್ಬೇರಿಸುವಂತೆ ಮಾಡುತ್ತದೆ ಈ ಸ್ಟೋರಿ...

ಖಾಂಡ್ವಾ: ಕರೊನಾ ಹಿನ್ನೆಲೆಯಲ್ಲಿ ಸಂಪೂರ್ಣವಾಗಿ ಬಾಗಿಲು ಮುಚ್ಚಿದ್ದ ಶಾಲೆಗಳು ಈಗ ಒಂದೊಂದಾಗಿ ಬಾಗಿಲು ತೆರೆಯಲಾರಂಭಿಸಿವೆ. ಆದರೆ ಅನೇಕ ಶಾಲೆಗಳಲ್ಲಿ ಇನ್ನೂ ಶಾಲಾ ಬಸ್ಸಿನ ವ್ಯವಸ್ಥಗೆ ಮಾತ್ರ ತಡೆಯಿದೆ. ಶಾಲೆಗೆ ತೆರಳು ಬಸ್ಸಿಲ್ಲದ ಕಾರಣ ಈ ಬಾಲಕ ಮಾಡಿದ ಉಪಾಯ ಕೇಳಿದರೆ ನಿಮಗೆ ನಿಜಕ್ಕೂ ಆಶ್ಚರ್ಯವಾಗುತ್ತದೆ.

ಮಧ್ಯಪ್ರದೇಶದ ಖಾಂಡ್ವಾ ಜಿಲ್ಲೆಯ ಬೋರಾಡಿ ಮಾಲ್​ ಗ್ರಾಮದಲ್ಲಿ ಶಿವರಾಜ್​ ಹೆಸರಿನ ಬಾಲಕನಿದ್ದಾನೆ. ಇದೀಗ ಐದನೇ ತರಗತಿ ವಿದ್ಯಾಭ್ಯಾಸ ಮಾಡುತ್ತಿರುವ ಈ ಬಾಲಕನಿಗೆ ಶಾಲೆ ಆರು ಕಿಮೀ ದೂರದಲ್ಲಿದೆಯಂತೆ. ಮೊದಲೆಲ್ಲ ಶಾಲೆಗೆ ಸೈಕಲ್​ ತೆಗೆದುಕೊಂಡು ಹೋಗುತ್ತಿದ್ದನಂತೆ. ಆದರೆ ಶಾಲೆಗೆ ಹೋಗುವ ರಸ್ತೆ ಸಂಪೂರ್ಣವಾಗಿ ಹಾಳಾಗಿರುವುದರಿಂದಾಗಿ ಸೈಕಲ್​ನಲ್ಲಿ ಹೋಗುವಾಗ ಸಾಕಷ್ಟು ಬಾರಿ ಬೀಳುತ್ತಿದ್ದನಂತೆ.

ಈ ಲಾಕ್​ಡೌನ್​ ಸಮಯದಲ್ಲಿ ಶಿವರಾಜ್​ ತಂದೆ ರೈತ ದೇವರಾಮ್ ಯಾದವ್ ಮನೆಗೆ ಕುದುರೆಯೊಂದನ್ನು ತಂದಿದ್ದಾನೆ. ಮನೆಗೆ ಬಂದ ಕುದುರೆಗೆ ರಾಜಾ ಎಂದು ಹೆಸರಿಟ್ಟ ಕುಟುಂಬ ಮನೆ ಮಗನಂತೆ ಅದನ್ನು ಸಾಕಿದೆ. ರಾಜಾನೊಂದಿಗೆ ಅದ್ಭುತ ಸ್ನೇಹ ಸಂಪಾದಿಸಿರುವ ಶಿವರಾಜ್​ ಶಾಲೆ ಆರಂಭವಾದ ನಂತರ ಒಂದು ಉಪಾಯ ಮಾಡಿದ್ದಾನೆ. ಸೈಕಲ್​ ಬದಲು ರಾಜನನ್ನೇ ಶಾಲೆಗೆ ಕರೆದುಕೊಂಡು ಹೋಗುತ್ತೇನೆ ಎಂದು ತಂದೆಯ ಬಳಿ ಅನುಮತಿ ಕೇಳಿದ್ದಾನೆ. ಅದಕ್ಕೆ ತಂದೆ ಒಪ್ಪಿಗೆಯನ್ನೂ ನೀಡಿದ್ದಾನೆ.

ಅಪ್ಪನ ಒಪ್ಪಿಗೆಯ ಮೇರೆಗೆ ಇದೀಗ ಪ್ರತಿದಿನ ಶಿವರಾಜ್​ ಕುದುರೆ ರಾಜಾನನ್ನೇ ಶಾಲೆಗೆ ಕರೆದುಕೊಂಡು ಬರುತ್ತಿದ್ದಾನೆ. ಕುದುರೆ ಮೇಲೆ ಕುಳಿತು ಅರಾಮಾಗಿ ಶಾಲೆ ತಲುಪುತ್ತಿದ್ದಾನೆ. ಅತ್ಯಂತ ಬುದ್ಧಿವಂತ ವಿದ್ಯಾರ್ಥಿಯಾಗಿರುವ ಶಿವರಾಜ್​ಗೆ ರಾಜ್ಯದ ಮುಖ್ಯಮಂತ್ರಿ ಶಿವರಾಜ್ ಸಿಂಗ್ ಚೌಹಾಣ್ ಅವರೆಂದರೆ ಹೆಚ್ಚಿನ ಗೌರವವಂತೆ. ಅವರನ್ನೆ ಸ್ಫೂರ್ತಿಯಾಗಿ ತೆಗೆದುಕೊಂಡಿರುವ ಆತ ಅವರಿಂದ ಬಹಳಷ್ಟು ಕಲಿತಿರುವುದಾಗಿ ಹೇಳಿಕೊಂಡಿದ್ದಾನೆ. (ಏಜೆನ್ಸೀಸ್​)

https://www.vijayavani.net/stormy-daniels-reveals-secreat-about-trump/

https://www.vijayavani.net/s-gulam-nabhi-azad-speech-in-rajyasabhaa/