ಕರೊನಾದಿಂದ ಬೇಗ ಗುಣಮುಖವಾಗಿದ್ದಕ್ಕೆ ಕಾರಣ ಬಿಚ್ಚಿಟ್ಟ ನಟ

ಮುಂಬೈ : ಕಳೆದ ಭಾನುವಾರ ಬಾಲಿವುಡ್ ನಟ ಅರ್ಜುನ್ ರಾಮ್​ಪಾಲ್​ ಅವರು ತಮಗೆ ಕರೊನಾ ಸೋಂಕು ತಗುಲಿದ ಬಗ್ಗೆ ಸಾಮಾಜಿಕ ಜಾಲತಾಣದ ಮೂಲಕ ಅಭಿಮಾನಿಗಳಿಗೆ ತಿಳಿಸಿದ್ದರು. ಮತ್ತೆ ಗುರುವಾರ ಎರಡು ಟೆಸ್ಟ್​ಗಳಲ್ಲಿ ಕರೊನಾ ನೆಗೆಟೀವ್ ಬಂದಿರುವುದನ್ನು ತಿಳಿಸಿ, "ದೇವರು ಕರುಣೆ ತೋರಿದ್ದಾನೆ" ಎಂದರು.

ಈ ಬಗ್ಗೆ ಇನ್ಸ್​ಟಾಗ್ರಾಂನಲ್ಲಿ ಬರೆದ ರಾಮ್​ಪಾಲ್, ತಾವು ಇಷ್ಟು ಬೇಗ ಗುಣಮುಖರಾಗಿದ್ದಕ್ಕೆ ಮುಖ್ಯ ಕಾರಣ ತಾವು ಕರೊನಾ ಲಸಿಕೆಯ ಮೊದಲನೇ ಡೋಸ್​ ಪಡೆದಿದ್ದುದು ಎಂದಿದ್ದಾರೆ. ಆದ್ದರಿಂದ ಎಲ್ಲರೂ ಸಾಧ್ಯವಾದಷ್ಟು ಬೇಗ ಲಸಿಕೆ ಪಡೆದುಕೊಳ್ಳಿ ಎಂದು ಸಲಹೆ ನೀಡಿದ್ದಾರೆ.

"ನಾನು ಇಷ್ಟು ಬೇಗ ಗುಣಮುಖವಾಗಿದ್ದಕ್ಕೆ ಒಂದು ಮುಖ್ಯವಾದ ಕಾರಣ ನಾನು ಲಸಿಕೆಯ ಮೊದಲನೇ ಡೋಸ್​ ಪಡೆದಿದ್ದದ್ದು ಎಂದು ವೈದ್ಯರು ಹೇಳಿದ್ದಾರೆ. ಲಸಿಕೆಯಿಂದಾಗಿ ವೈರಲ್ ಲೋಡ್​ ಕಡಿಮೆಯಾಗಿ ರೋಗದ ಲಕ್ಷಣಗಳು ಕಾಣಿಸಲಿಲ್ಲ ಎಂದಿದ್ದಾರೆ. ನಾನು ಎಲ್ಲರನ್ನೂ ಕೇಳಿಕೊಳ್ಳುವುದೇನೆಂದರೆ, ಸಾಧ್ಯವಾದಷ್ಟು ಬೇಗ ಲಸಿಕೆ ತೆಗೆದುಕೊಳ್ಳಿ ಮತ್ತು ಎಲ್ಲಾ ಸುರಕ್ಷತಾ ಕ್ರಮಗಳನ್ನು ಪಾಲಿಸಿ" ಎಂದು ರಾಮ್​ಪಾಲ್​ ಬರೆದಿದ್ದಾರೆ.

"ಸ್ಟೇ ಪಾಸಿಟೀವ್ ಅಂಡ್ ಡೋಂಟ್ ಬಿಕಮ್ ಪಾಸಿಟೀವ್" ಎಂದಿರುವ ರಾಮ್​ಪಾಲ್, ಕರೊನಾದಿಂದ ನರಳುತ್ತಿರುವವರೊಂದಿಗೆ ನನ್ನ ಪ್ರಾರ್ಥನೆಗಳಿವೆ. ಈ ಸಮಯವೂ ಕಳೆಯಲಿದೆ ಎಂದು ಆಶಾವಾದ ವ್ಯಕ್ತಪಡಿಸಿದ್ದಾರೆ. (ಏಜೆನ್ಸೀಸ್)

https://www.vijayavani.net/free-vaccines-to-all-says-maharashtra-minister/

https://www.vijayavani.net/labourers-drink-sanitiser-for-liqour/