ವಾಹನ ವಿಮೆ ಮಹಾವಂಚನೆ: ಚತುಷ್ಚಕ್ರ ವಾಹನಗಳಿಗೆ ಬೈಕ್ ಪಾಲಿಸಿ; 450ಕ್ಕೂ ಹೆಚ್ಚು ಪ್ರಕರಣ ಬೆಳಕಿಗೆ

| ಕೀರ್ತಿನಾರಾಯಣ ಸಿ. ಬೆಂಗಳೂರು

ಪೆಟ್ರೋಲ್ ಬಂಕ್, ಟೋಲ್ ಪ್ಲಾಜಾ ಹೀಗೆ ಎಲ್ಲೆಂದರಲ್ಲಿ ವಾಹನ ವಿಮಾ ಪಾಲಿಸಿ ಖರೀದಿಸುವ ಮುನ್ನ ಎಚ್ಚರವಿರಲಿ! ಏಕೆಂದರೆ, ನೀವು ನಾಲ್ಕು ಚಕ್ರ ಅಥವಾ ಮೂರು ಚಕ್ರದ ವಾಹನದ ವಿಮಾ ಪಾಲಿಸಿಗೆ ಹಣ ಪಾವತಿಸಿದ್ದರೆ, ಇನ್ಶೂರೆನ್ಸ್ ಕಂಪನಿಯಲ್ಲಿ ದ್ವಿಚಕ್ರ ವಾಹನ ಹೆಸರಲ್ಲಿ ನೋಂದಾಯಿಸಿ, ಫೋಟೋಶಾಪ್​ನಲ್ಲಿ ವಿವರಗಳನ್ನು ತಿದ್ದಿ ನಕಲಿ ಪಾಲಿಸಿ ಕೈಗಿಡುವ ವಂಚಕ ಜಾಲಗಳು ಸಕ್ರಿಯವಾಗಿವೆ. ಕರ್ನಾಟಕದಲ್ಲಿ ಒಂದೇ ಕಂಪನಿಯ ಹೆಸರಲ್ಲಿ 450ಕ್ಕೂ ಅಧಿಕ ನಕಲಿ ವಿಮಾ ಪಾಲಿಸಿ ನೀಡಿರುವ ಪ್ರಕರಣಗಳು ಬೆಳಕಿಗೆ ಬಂದಿದ್ದು, ಇನ್ಶೂರೆನ್ಸ್ ಕಂಪನಿಗಳು ಹಾಗೂ ವಾಹನ ಮಾಲೀಕರಿಗೆ ಆತಂಕ ಶುರುವಾಗಿದೆ.

ರಿಲಯನ್ಸ್ ಜನರಲ್ ಇನ್ಶೂರೆನ್ಸ್ ಕಂಪನಿ ಕೊಟ್ಟ ದೂರಿನ ಮೇರೆಗೆ ಬೆಂಗಳೂರಿನ ಆಗ್ನೇಯ ವಿಭಾಗದ ಸೈಬರ್ ಪೊಲೀಸ್ ಠಾಣೆ ಹಾಗೂ ರಾಜಾನುಕುಂಟೆ ಪೊಲೀಸ್ ಠಾಣೆಯಲ್ಲಿ ಎಫ್​ಐಆರ್ ದಾಖಲಾಗಿವೆ. ವಂಚನೆಗೆ ಬಳಸಿರುವ ನೂರಾರು ಇ-ಮೇಲ್ ಐಡಿಗಳು ಹಾಗೂ ಮೊಬೈಲ್ ನಂಬರ್​ಗಳ ಮಾಹಿತಿ ಸಿಕ್ಕಿದ್ದು, ಅದರ ಆಧಾರದಲ್ಲಿ ಆರೋಪಿಗಳ ಪತ್ತೆಕಾರ್ಯ ನಡೆಯುತ್ತಿದೆ. ರಾಜ್ಯದಲ್ಲಿ ನಡೆದಿರುವ ನಕಲಿ ವಾಹನ ಪಾಲಿಸಿ ವಂಚನೆಗೆ ಸಂಬಂಧಿಸಿದಂತೆ ಮಹಾರಾಷ್ಟ್ರ, ತಮಿಳುನಾಡು ಮತ್ತು ಹರಿಯಾಣ ಸೇರಿ ಇತರ ರಾಜ್ಯಗಳ ಪೊಲೀಸ್ ಠಾಣೆಗಳಲ್ಲೂ ದೂರುಗಳು ದಾಖಲಾಗಿವೆ. ತಮಿಳುನಾಡಿನಲ್ಲಿ 500ಕ್ಕೂ ಹೆಚ್ಚು ಇಂತಹ ವಂಚನೆ ಪ್ರಕರಣಗಳು ಪತ್ತೆಯಾಗಿದ್ದು, ಕೋಟ್ಯಂತರ ರೂ. ವಂಚಿಸಲಾಗಿದೆ. ಐಷಾರಾಮಿ ಕಾರುಗಳು ಹಾಗೂ ಭಾರಿ ಗಾತ್ರದ ವಾಣಿಜ್ಯ ಬಳಕೆಯ ವಾಹನಗಳಿಗೆ ನಕಲಿ ವಿಮಾ ಪಾಲಿಸಿ ಕೊಟ್ಟು ವಂಚಿಸಿರುವ ಪ್ರಕರಣಗಳು ಹೆಚ್ಚು ವರದಿಯಾಗಿವೆ.

ಬಿಎಂಡಬ್ಲ್ಯು ಕಾರಿಗೆ 80 ಸಾವಿರ ರೂ.ನಿಂದ 1 ಲಕ್ಷ ರೂ. ವರೆಗೆ ವಿಮಾ ಮೊತ್ತ ಪಾವತಿಸಬೇಕಾಗುತ್ತದೆ. ಬೈಕ್​ಗೆ 500 ರೂ.ನಿಂದ 1500 ರೂ.ವರೆಗೆ ಇದೆ. ಮಾಲೀಕನಿಂದ 1 ಲಕ್ಷ ರೂ. ಪಡೆಯುವ ವಂಚಕರು, ಬೈಕ್ ಹೆಸರಲ್ಲಿ 500 ರೂ. ನಿಂದ 1500 ರೂ. ಪಾವತಿಸಿ ಪಾಲಿಸಿ ಪ್ರಮಾಣಪತ್ರ ನೀಡಿ ಮೋಸ ಮಾಡುತ್ತಿದ್ದಾರೆ.

ವಂಚನೆ ಹೇಗೆ?

• ಹೊಸ ವಾಹನ ಖರೀದಿ ಹಾಗೂ ವಿಮಾ ಅವಧಿ ಮುಗಿಯುವ ವಾಹನ ಮಾಲೀಕರ ಸಂಪರ್ಕ
• ಬೇರೆ ಕಂಪನಿಗಳಿಗಿಂತ ಕಡಿಮೆ ಮೊತ್ತದಲ್ಲಿ ಪಾಲಿಸಿ ಕೊಡುವುದಾಗಿ ಪುಸಲಾಯಿಸುವುದು
• ಕಾರಿನ ಪಾಲಿಸಿಗೆ ಹಣ ಪಡೆದು, ಬೈಕ್ ಹೆಸರಿನಲ್ಲಿ ಕಡಿಮೆ ಹಣ ಕಟ್ಟಿ ಪಾಲಿಸಿ ಮಾಡಿಸುವುದು
• ಬೈಕ್ ಪಾಲಿಸಿಯಲ್ಲಿರುವ ವಿವರಗಳನ್ನು ಫೋಟೋಶಾಪ್​ನಲ್ಲಿ ತಿದ್ದಿ, ಕಾರಿನ ನಕಲಿ ಪಾಲಿಸಿ ಸೃಷ್ಟಿ
• ಅಪಘಾತ ಸಂಭವಿಸಿ ಕ್ಲೇಮ್​ ಅರ್ಜಿ ಸಲ್ಲಿಸಿದಾಗ ಮಾತ್ರವೇ ನಕಲಿ ಪಾಲಿಸಿ ವಿಚಾರ ತಿಳಿಯುತ್ತೆ
• ಕಂಪನಿಯಲ್ಲಿ ಮಾಲೀಕನ ಹೆಸರಲ್ಲೇ ಪಾಲಿಸಿ ಇರುತ್ತದೆ. ಕಾರಿನ ಬದಲಿಗೆ ಬೈಕ್ ಪಾಲಿಸಿ ಆಗಿರುತ್ತದೆ
• ಇನ್ಸುರೆನ್ಸ್ ಕಂಪನಿ ಕ್ಲೇಮ್ ಅರ್ಜಿಯನ್ನು ತಿರಸ್ಕರಿಸುತ್ತದೆ. ಯಾವುದೇ ವಿಮಾ ಮೊತ್ತ ಕೊಡುವುದಿಲ್ಲ.

ಮೋಸ ಹೋಗದಿರಲು ನಿಯಮ ಪಾಲಿಸಿ...

• ಕರ್ನಾಟಕದಲ್ಲಿ 12 ರಿಂದ 16 ಇನ್ಶೂರೆನ್ಸ್ ಕಂಪನಿಗಳು ಇವೆ
• ಪಾಲಿಸಿ ಮಾಡಿಸುವ ಮುನ್ನ ಕಂಪನಿ ಅಧಿಕೃತವೇ ಪರಿಶೀಲಿಸಿ
• ಸಾಧ್ಯವಾದಷ್ಟು ಕಚೇರಿಗಳಿಗೆ ಖುದ್ದು ಭೇಟಿ ಕೊಟ್ಟು ಪಾಲಿಸಿ ಪಡೆಯಿರಿ
• ಆನ್​ಲೈನ್​ನಲ್ಲಿ ಪಡೆದರೂ ನಂತರ ಒಮ್ಮೆ ಕಚೇರಿಗೆ ಭೇಟಿ ಕೊಡಿ

225 ವಾಹನಕ್ಕೆ ನಕಲಿ ವಿಮೆ ಕೊಟ್ಟವ ಸೆರೆ: ಅಕೋ ಜನರಲ್ ಇನ್ಸುರೆನ್ಸ್ ಹೆಸರಿಲ್ಲಿ ವಂಚಿಸಿದ್ದ ಪ್ರಕರಣದಲ್ಲಿ ಇತ್ತೀಚೆಗೆ ಅರೋಪಿಯೊಬ್ಬನನ್ನು ಬಂಧಿಸಲಾಗಿತ್ತು. ಓಲಾದಿಂದ ಖರೀದಿಸಿದ್ದ 225 ಕಾರುಗಳಿಗೆ ಬೈಕ್ ಹೆಸರಲ್ಲಿ ವಿಮಾ ಪಾಲಿಸಿ ಮಾಡಿಸಿದ್ದ. ಆನ್​ಲೈನ್ ಅಪ್ಲಿಕೇಷನ್ ದುರ್ಬಳಕೆ ಮಾಡಿಕೊಂಡು ಕೃತ್ಯವೆಸಗಿದ್ದ. ಆ ಪ್ರಕರಣದ ಬೆನ್ನಲ್ಲೇ ಇನ್ನೊಂದು ಬೃಹತ್ ಹಗರಣ ಬೆಳಕಿಗೆ ಬಂದಿದೆ.

47000 ರೂ. ಪಡೆದು 1,330 ರೂ. ಪಾಲಿಸಿ ಕೊಟ್ರು!

ಶಿವಮೊಗ್ಗ ಆರ್​ಟಿಒದಲ್ಲಿ ನೋಂದಣಿಯಾಗಿ ರುವ ವಾಹನಕ್ಕೆ ಜಯನಗರ ಇನ್ಶೂರೆನ್ಸ್ ಕಚೇರಿಯಲ್ಲಿ ಪಾಲಿಸಿ ಮಾಡಲಾಗಿದೆ. ಅಶೋಕ ಲೇಲ್ಯಾಂಡ್​ನ ವಾಣಿಜ್ಯ ಬಳಕೆಯ ಭಾರಿ ವಾಹನಕ್ಕೆ ಹೀರೋ ಹೋಂಡಾ ಬೈಕ್ ಹೆಸರಿನಲ್ಲಿ ವಿಮಾ ಪಾಲಿಸಿ ಮಾಡಿಕೊಡಲಾಗಿದೆ. ಭಾರಿ ವಾಹನದ ಪಾಲಿಸಿಯ ಮೊತ್ತ ಜಿಎಸ್​ಟಿ ಸೇರಿ 47,406 ರೂ. ಇದೆ. ಬೈಕ್ ಪಾಲಿಸಿಯ ಮೊತ್ತ ಜಿಎಸ್​ಟಿ ಸೇರಿ 1,330 ರೂ. ಇದೆ. ಮಾಲೀಕನಿಂದ 47,406 ರೂ. ಪಡೆದಿರುವ ವಂಚಕರು ಬೈಕ್ ಹೆಸರಲ್ಲಿ 1,330 ರೂ. ಕೊಟ್ಟು ಪಾಲಿಸಿ ಮಾಡಿಸಿದ್ದಾರೆ. ನಂತರ ಹೀರೋ ಹೋಂಡಾ ಸ್ಥಳದಲ್ಲಿ ಅಶೋಕ ಲೇಲ್ಯಾಂಡ್ ಹಾಗೂ ಪಾಲಿಸಿ ಮೊತ್ತ 1330 ರೂ.ನ ಜಾಗದಲ್ಲಿ 47,406 ರೂ. ಎಂದು ಫೋಟೋಶಾಪ್​ನಲ್ಲಿ ತಿದ್ದಿ ಮಾಲೀಕನಿಗೆ ಕೊಟ್ಟಿದ್ದಾರೆ.

ಪಾಲಿಸಿ ಕ್ಲೇಮ್ ಅರ್ಜಿ ತಿರಸ್ಕೃತ?

ಕೋರಮಂಗಲ ಆರ್​ಟಿಒದಲ್ಲಿ ನೋಂದಣಿಯಾಗಿರುವ ಲಾರಿಯ ಗ್ರಾಸ್ ವೆಹಿಕಲ್ ವೇಟ್ (ಜಿವಿಡಬ್ಲ್ಯು) ಅನ್ನೇ ಕಡಿಮೆ ತೋರಿಸಿ ವಿಮಾ ಪಾಲಿಸಿ ಮಾಡಿಕೊಡಲಾಗಿದೆ. ಪಾಲಿಸಿ ಮೊತ್ತ 43 ಸಾವಿರ ರೂ. ಪಾವತಿಸಬೇಕಾದ ಜಾಗದಲ್ಲಿ 18 ಸಾವಿರ ರೂ. ಕಟ್ಟಿ ಪಾಲಿಸಿ ಮಾಡಿಸಲಾಗಿತ್ತು. 2021ರ ಆ.5ರಂದು ಇದೇ ಲಾರಿ ದೊಡ್ಡಬಳ್ಳಾಪುರ ಹೆದ್ದಾರಿಯಲ್ಲಿ ಹೋಗುತ್ತಿದ್ದ ಬೈಕ್​ಗೆ ಡಿಕ್ಕಿ ಹೊಡೆದು, ಸವಾರರಿಬ್ಬರು ಗಾಯಗೊಂಡಿದ್ದರು. ರಾಜಾನುಕುಂಟೆ ಪೊಲೀಸ್ ಠಾಣೆಯಲ್ಲಿ ಎಫ್​ಐಆರ್ ಆಗಿ, ಸದ್ಯ ಬೆಂಗಳೂರು ಸಿಟಿ ಕೋರ್ಟ್​ನಲ್ಲಿ ವಿಚಾರಣೆ ನಡೆಯುತ್ತಿದೆ. ಒಬ್ಬ ಗಾಯಾಳು 25 ಲಕ್ಷ ರೂ. ವಿಮೆಗೆ ಕ್ಲೇಮ್ ಮಾಡಿದ್ದಾರೆ. ಆದರೆ, ವಿಮಾ ಕಂಪನಿ ಪರಿಶೀಲನೆಯಲ್ಲಿ ಪಾಲಿಸಿ ಗೋಲ್‍ಮಾಲ್ ಗೊತ್ತಾಗಿ, ವಿಮಾ ಪರಿಹಾರ ಕೊಡಲಾಗದು ಎಂದು ಹೇಳಿದೆ.

ಅಪೆ ವಾಹನಕ್ಕೆ ಸ್ಕೂಟಿ ಪಾಲಿಸಿ

ಮಹಾರಾಷ್ಟ್ರ ಆರ್​ಟಿಒದಲ್ಲಿ ನೋಂದಣಿ ಯಾಗಿರುವ ಅಪೆ ಪೋರ್ಟರ್ ವಾಣಿಜ್ಯ ವಾಹನಕ್ಕೆ ಟಿವಿಎಸ್ ಸ್ಕೂಟಿ ಹೆಸರಲ್ಲಿ ಪಾಲಿಸಿ ಮಾಡಿಕೊಡಲಾಗಿದೆ. ಅಪೆ ಪೋರ್ಟರ್ ವಾಹನಕ್ಕೆ ಜಿಎಸ್​ಟಿ ಸೇರಿ 18,580 ರೂ. ಪಾಲಿಸಿ ಮೊತ್ತ ಆಗುತ್ತೆ. ಟಿವಿಎಸ್ ಸ್ಕೂಟಿಗೆ ಜಿಎಸ್​ಟಿ ಸೇರಿ 569 ರೂ. ಇದೆ. ಮಾಲೀಕನಿಂದ 18,580 ರೂ. ಪಡೆದಿರುವ ವಂಚಕರು, ಟಿವಿಎಸ್ ಸ್ಕೂಟಿ ಹೆಸರಲ್ಲಿ 569 ರೂ. ಪಾವತಿಸಿ ಪಾಲಿಸಿ ಮಾಡಿಸಿದ್ದಾರೆ. ನಂತರ ಪೋಟೋಶಾಪ್​ನಲ್ಲಿ ವಿವರಗಳನ್ನು ತಿದ್ದಿ, ಆಪೆ ಪಾಲಿಸಿ ಎಂದು ಮಾಲೀಕನಿಗೆ ನಂಬಿಸಿದ್ದಾರೆ.

https://www.vijayavani.net/kantara-movie-got-great-response-immense-increase/

https://www.vijayavani.net/tenth-student-lost-life-after-writing-death-note-expressing-her-last-wish/