ಷೇರು ಪೇಟೆ ಭಾರಿ ಕುಸಿತ; ಸೆನ್ಸೆಕ್ಸ್ 1,170 ಅಂಶ ಇಳಿಕೆ

ಮುಂಬೈ: ಭಾರತದ ಷೇರುಪೇಟೆಯ ಸೂಚ್ಯಂಕ ಬಿಎಸ್​ಇ ಸೆನ್ಸೆಕ್ಸ್, ಕಳೆದ ಏಳು ತಿಂಗಳ (ಏಪ್ರಿಲ್ 12) ಅವಧಿಯಲ್ಲಿ ಇದೇ ಮೊದಲ ಬಾರಿಗೆ ಒಂದೇ ದಿನ 1,170 ಅಂಶಗಳಷ್ಟು ದೊಡ್ಡ ಕುಸಿತ ಕಂಡಿದೆ. ಕೃಷಿಗೆ ಸಂಬಂಧಿಸಿದ ಮೂರು ಕಾಯ್ದೆಗಳನ್ನು ಹಿಂಪಡೆತ, ದೇಶದ ಅತಿದೊಡ್ಡ ಫಿನ್​ಟೆಕ್ ಕಂಪನಿ ಪೇಟಿಎಂನ ದುರ್ಬಲ ಲಿಸ್ಟಿಂಗ್ ಮುಂತಾದವು ಹೂಡಿಕೆದಾರರ ಮೇಲೆ ಪರಿಣಾಮ ಬೀರಿವೆ.

ಸತತ ನಾಲ್ಕನೇ ಅವಧಿಗೆ ಸೆನ್ಸೆಕ್ಸ್ ಕುಸಿತ ಕಂಡಿದೆ. ಸೋಮವಾರದ ವಹಿವಾಟಿನಲ್ಲಿ 1,170.12 ಅಂಶ (1.96%) ಕುಸಿತ ಕಂಡು 58,465.89 ಅಂಶದಲ್ಲಿ ದಿನದ ವಹಿವಾಟು ಮುಗಿಸಿದೆ. ಇದು ಎರಡು ತಿಂಗಳ ಅವಧಿಯ ಕನಿಷ್ಠಮಟ್ಟವಾಗಿದೆ. ಎನ್​ಎಸ್​ಇ ನಿಫ್ಟಿ 348.25 ಅಂಶ (1.96%) ಕುಸಿದು 17,416.55 ಅಂಶದಲ್ಲಿ ವಹಿವಾಟು ಮುಗಿಸಿದೆ. ಇದು ಸೆಪ್ಟೆಂಬರ್ 20ರ ನಂತರದ ಕನಿಷ್ಠ ಮಟ್ಟವಾಗಿದೆ. ಬಜಾಜ್ ಫೈನಾನ್ಸ್, ಬಜಾಜ್ ಫಿನ್​ಸರ್ವ್, ರಿಲಯನ್ಸ್ ಇಂಡಸ್ಟ್ರೀಸ್, ಎನ್​ಟಿಪಿಸಿ, ಟೈಟಾನ್, ಎಸ್​ಬಿಐ ಷೇರುಗಳ ಮೌಲ್ಯ ಶೇಕಡ 5.74ರಷ್ಟು ಕುಸಿತ ಕಂಡಿವೆ. ಭಾರ್ತಿ ಏರ್​ಟೆಲ್, ಏಷ್ಯನ್ ಪೇಂಟ್ಸ್ ಮತ್ತು ಪವರ್​ಗ್ರಿಡ್ ಷೇರು ಮೌಲ್ಯ ಏರಿಕೆಯಾಗಿದೆ.

ಕುಸಿತಕ್ಕೆ ಐದು ಕಾರಣ

• ವಾಣಿಜ್ಯ ಕಾರಣ: ರಿಲಯನ್ಸ್ ಇಂಡಸ್ಟ್ರೀಸ್ ಷೇರು ಮೌಲ್ಯ ಶೇಕಡ 4ಕ್ಕೂ ಹೆಚ್ಚು ಕುಸಿತ ಕಂಡಿದೆ. 15 ಶತಕೋಟಿ ಡಾಲರ್​ಗೆ ಸೌದಿ ಅರಮ್ಕೊಗೆ ತನ್ನ ತೈಲ ಸಂಸ್ಕರಣಾ ಘಟಕ ಮತ್ತು ಪೆಟ್ರೋಕೆಮಿಕಲ್ ವ್ಯವಹಾರದ ಶೇಕಡ 20 ಪಾಲನ್ನು ಮಾರಾಟ ಮಾಡುವ ಪ್ರಸ್ತಾವನೆ ಮುಂದಿಟ್ಟ ಬೆನ್ನಿಗೆ ಈ ಕುಸಿತ ಸಂಭವಿಸಿದೆ. ಸೆನ್ಸೆಕ್ಸ್​ನಲ್ಲಿ ಪೇಟಿಎಂ ಷೇರುಮೌಲ್ಯ ಶೇಕಡ 13 ಕುಸಿತ ಕಂಡು 1,360.30 ರೂಪಾಯಿಯಲ್ಲಿ ದಿನದ ವಹಿವಾಟು ನಿಲ್ಲಿಸಿದೆ.
• ಜಾಗತಿಕ ವಹಿವಾಟು ದುರ್ಬಲ: ಚೀನಾದ ರಿಟೇಲ್ ಸೇಲ್ಸ್ ಕಳೆದ ವರ್ಷ ಏಪ್ರಿಲ್​ಗೆ ಹೋಲಿಸಿದರೆ ಶೇಕಡ 17.7 ಏರಿಕೆಯಾಗಿದೆ. ಮುನ್ನೋಟ ಪ್ರಕಾರ ಶೇಕಡ 24.8 ಸಾಧನೆಯಾಗಬೇಕಾಗಿತ್ತು. ಕೈಗಾರಿಕಾ ಔಟ್​ಪುಟ್ ಶೇಕಡ 9.8 ಏರಿಕೆಯಾಗಿದ್ದು, ನಿರೀಕ್ಷೆಯ ಗುರಿ ತಲುಪಿದೆ. ಆದಾಗ್ಯೂ, ಜಾಗತಿಕ ಹಣದುಬ್ಬರ ಪ್ರಮಾಣ ಹೆಚ್ಚಾಗಿರುವ ಕಾರಣ ಚಿನ್ನ ಮೂರು ತಿಂಗಳ ಗರಿಷ್ಠಕ್ಕೆ ಏರಿಕೆಯಾಗಿದೆ. ಅಮೆರಿಕದ ಎಸ್​ಆಂಡ್​ಪಿ 500 ಫ್ಯೂಚರ್ಸ್, ನಾಸ್ಡಾಕ್ ಎರಡೂ ನ.19ರ ರ್ಯಾಲಿಯ ಬಳಿಕ ಶೇಕಡ 0.1ರಷ್ಟು ಇಳಿಮುಖವಾಗಿವೆ.
• ಫಾರೆಕ್ಸ್ ಮೀಸಲು ಇಳಿಕೆ: ದೇಶದ ವಿದೇಶ ವಿನಿಮಯ ಮೀಸಲು ನ.12ರಂದು ಕೊನೆಗೊಂಡ ವಾರದ ಪ್ರಕಾರ 763 ದಶಲಕ್ಷ ಡಾಲರ್​ಗಳಿಂದ 640 ಶತಕೋಟಿ ಡಾಲರ್​ಗೆ ಇಳಿಕೆಯಾಗಿದೆ. ಸೆಪ್ಟೆಂಬರ್ 3ಕ್ಕೆ ಕೊನೆಯಾದ ವಾರದಲ್ಲಿ 642.45 ಶತಕೋಟಿ ಡಾಲರ್​ನ ಸಾರ್ವಕಾಲಿಕ ಎತ್ತರಕ್ಕೆ ಏರಿತ್ತು.
• ಪಿಎಸ್​ಯುು ಬ್ಯಾಂಕ್​ಗಳ ವಹಿವಾಟು: ಪಿಎಸ್​ಯುು ಬ್ಯಾಂಕ್ ಇಂಡೆಕ್ಸ್ ರಿಯಾಲ್ಟಿ ಸೆಕ್ಟರ್ ಜತೆಗೆ ಶೇಕಡ 3-4 ಕುಸಿತ ಕಂಡಿದೆ. ಬ್ಯಾಂಕ್ ಆಫ್ ಬರೋಡಾ, ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ, ಇಂಡಿಯನ್ ಬ್ಯಾಂಕ್, ಪಿಎನ್​ಬಿ, ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಷೇರುಗಳ ಮೌಲ್ಯ ಶೇಕಡ 4 ಇಳಿಕೆಯಾಗಿವೆ. ಶೋಭಾ, ಒಬೆರಾಯ್ ರಿಯಾಲ್ಟಿ, ಪ್ರೆಸ್ಟೀಜ್ ಎಸ್ಟೇಟ್ಸ್, ಬ್ರಿಗೇಡ್ ಎಂಟರ್​ಪ್ರೖೆಸಸ್, ಗೋದ್ರೆಜ್ ಷೇರುಗಳು ಕೂಡ ಕುಸಿದಿವೆ.
• ಆಡಳಿತ ಮತ್ತು ತಾಂತ್ರಿಕ : ಮೂರು ಕೃಷಿ ಕಾಯ್ದೆಗಳನ್ನು ಹಿಂಪಡೆದ ಕ್ರಮ ಹೂಡಿಕೆದಾರರ ಸೆಂಟಿಮೆಂಟ್ ಮೇಲೆ ಪರಿಣಾಮ ಬೀರಿದೆ. ಜಿಡಿಪಿ ಬೆಳವಣಿಗೆ ಕುರಿತ ಡೇಟಾ, ಆರ್​ಬಿಐನ ಇತ್ತೀಚಿನ ಟಿಪ್ಪಣಿಗಳು ಮುಂತಾದ ತಾಂತ್ರಿಕ ಕಾರಣಗಳು ಕೂಡ ಇವೆ.

https://www.vijayavani.net/daughter-gave-supari-to-lover-for-killing-her-father/

https://www.vijayavani.net/love-turns-to-blackmail-then-case-enters-to-police-station/