ಜೀರ್ಣಕ್ಕೆ ಕಷ್ಟಕರವಾದ, ಶುಷ್ಕ ಆಹಾರ, ಅತಿ ಬಿಸಿ, ದ್ರವಾಹಾರ, ಅತಿಯಾಗಿ ತಣ್ಣಗಿರುವ, ವಿರುದ್ಧಾಹಾರ ಸೇವನೆ, ಆಗಾಗ ಆಹಾರ ಸೇವಿಸುವುದು, ಮೊದಲು ಸೇವಿಸಿರುವ ಆಹಾರ ಜೀರ್ಣಗೊಳ್ಳದೆ ಇದ್ದಾಗ ಮತ್ತೆ ಆಹಾರ ತೆಗೆದುಕೊಳ್ಳುವುದು, ಯಾವ್ಯಾವುದೋ ಹೊತ್ತಿನಲ್ಲಿ ಊಟ, ಅತಿಯಾಗಿ ಜಿಡ್ಡಿನಿಂದ ಕೂಡಿದ, ಸರಿಯಿಲ್ಲದ, ವಿಷಮಯ ಆಹಾರ ಸ್ವೀಕಾರ, ನಾನಾ ಕಾರಣಗಳಿಂದ ಭಯಗ್ರಸ್ಥರಾಗಿರುವುದು, ಚಿಂತೆಯಿಂದ ಕೂಡಿರುವುದು, ಮಲಿನಗೊಂಡ ನೀರಿನ ಬಳಕೆ, ಮಿತಿಮೀರಿದ ಮದ್ಯಪಾನ, ಋತುಕಾಲಕ್ಕೆ ವಿರುದ್ಧವಾಗಿ ಆಹಾರ ಸೇವನೆ, ನೀರಿನಲ್ಲಿ ಈಜುವಾಗ ಮಲಮೂತ್ರಾದಿ ವೇಗಗಳನ್ನು ತಡೆಹಿಡಿಯುವುದು, ಹೊಟ್ಟೆಯ ಕ್ರಿಮಿದೋಷಗಳು - ಹೀಗೆ ಹಲವು ತಪ್ಪು ಹೆಜ್ಜೆಗಳಿಂದ ಭೇದಿ ಉಂಟಾಗುತ್ತದೆಂಬ ವಿವರಣೆ ಸುಶ್ರುತ ಸಂಹಿತೆಯಲ್ಲಿದೆ. ಭೇದಿಯು ಕಾಣಿಸಿಕೊಳ್ಳುವ ಪೂರ್ವಭಾವಿಯಾಗಿ ಹೃದಯ ಪ್ರದೇಶ, ಹೊಕ್ಕುಳ ಪ್ರದೇಶ, ಮಧ್ಯ ಹಾಗೂ ಕೆಳಹೊಟ್ಟೆ ಹಾಗೂ ಗುದದ್ವಾರ ಮುಂತಾದ ಭಾಗದಲ್ಲಿ ನೋವು, ಮೈಕೈ ನೋವು, ಹೊಟ್ಟೆಯುಬ್ಬರ,ತಿಂದಿರುವ ಆಹಾರ ಅತಿಬೇಗನೆ ಜೀರ್ಣಗೊಳ್ಳುವುದು ಇವೆಲ್ಲ ಲಕ್ಷಣಗಳು ಕಾಣಿಸಿಕೊಳ್ಳುವುದು.
