ಒಂದು ಮಣ್ಣಿನ ಮಡಿಕೆಯಲ್ಲಿ ನೀರನ್ನು ತುಂಬಿ ಗೂಡಿನಲ್ಲಿಟ್ಟರೆ ಕೆಲವು ದಿನಗಳ ಬಳಿಕ ನೀರೆಲ್ಲಾ ಆವಿಯಾಗಿ ಹೋಗುವುದು. ಆದರೆ ನೀರುತುಂಬಿದ ಮಡಿಕೆಯನ್ನು ನೀರಿನಲ್ಲಿಯೇ ಇಟ್ಟರೆ ನೀರಿನಲ್ಲಿರುವ ತನಕವೂ ಸದಾ ಭರ್ತಿಯಾಗಿರುತ್ತದೆ. ನಿಮ್ಮ ಭಕ್ತಿಯೂ ಕೂಡ ಇದರಂತೆಯೇ. ಕೆಲವು ಕಾಲ ದೇವರನ್ನು ಹೃನ್ಮನದಲ್ಲಿ ಪ್ರೀತಿಯಿಂದ, ಭಕ್ತಿಯಿಂದ ಅರ್ಚಿಸಿ ನಂತರ ಕ್ರಮೇಣ ಮರೆತು ಇತರ ಪ್ರಾಪಂಚಿಕ ಕೆಲಸಗಳಲ್ಲಿ ನಿರತನಾದರೆ, ಇದ್ದ ಭಕ್ತಿ, ಭಗವತ್ಪ್ರೀತಿ ಮಾಯವಾಗುವುದನ್ನು ನೀನು ಕಾಣಬಹುದು. ಆದರೆ ಸದಾ ಭಕ್ತಿಯಲ್ಲಿಯೇ ಮನಸ್ಸನ್ನು ಮುಳುಗಿಸಿ ದಲ್ಲಿ ಯಾವಾಗಲೂ ನಿನ್ನ ಹೃದಯ ಭಕ್ತಿಯಿಂದ ತುಂಬಿರುವುದು. ಎಂತಹ ಸರಳ ಹಾಗೂ ಸರ್ವರಿಗೂ ಅನ್ವಯಿ ಸುವ ಉಪದೇಶಾಮೃತ ಇದು. ನಿಜ, ಕೆಲಸಕಾರ್ಯಗಳ ಒತ್ತಡದಿಂದ ಹೃದಯಾಂತರಾಳ ಬರಿದಾ ಗುವುದು ಸಹಜ. ಆದರೆ ಅದೇ ಹೃದಯಾಂತರಾಳ ಅಹರ್ನಿಶಿ ಭಗವನ್ನಾಮ ಸ್ಮರಣೆಯೊಂದಿಗೆ ಕೆಲಸ, ಕರ್ತವ್ಯಗಳಲ್ಲಿ ನಿರತನಾದಾಗ ಹಾಗಾಗುವುದಿಲ್ಲ. ಹೇಗೆ ನೀರಿನಲ್ಲಿ ಮುಳುಗಿದ ಗಡಿಗೆ ಆವಿಯಾಗದೆ, ತುಂಬಿರುತ್ತದೆಯೋ ಅದೇ ತೆರನಾಗಿ ಮನಸ್ಸು, ಹೃದಯ ನಾಮಸ್ಮರಣೆಯ ಅಮೃತದಿಂದ ತುಂಬಿರುತ್ತದೆ ಹಾಗೂ ಇತರ ಕೆಲಸಕಾರ್ಯಗಳಲ್ಲಿ ಮಗ್ನವಾದಾಗ್ಯೂ ಹೃದಯಾಂತರಾಳ ಭಕ್ತಿಯ ಬಲದಿಂದ ತುಂಬಿರುತ್ತದೆ ಎಂಬುದೇ ಈ ನುಡಿಯ ಅರ್ಥ.
