ಬ್ಯಾಂಕ್ ಲಾಕರ್​ಗಳು ಇನ್ನಷ್ಟು ಸುರಕ್ಷಿತ; ಆರ್​ಬಿಐ ಹೊಸ ನಿಯಮ ಪ್ರಕಟ, ಗ್ರಾಹಕರು ಶುಲ್ಕದ ಮೊತ್ತ ಠೇವಣಿ ಇಡಬೇಕು..

ಮುಂಬೈ: ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್​ಬಿಐ) ಸೇಫ್ ಲಾಕರ್ ನಿಯಮದಲ್ಲಿ ಬದಲಾವಣೆ ಮಾಡಿದ್ದು, ಹೊಸ ಮಾರ್ಗಸೂಚಿಯನ್ನು ಪ್ರಕಟಿಸಿದೆ. ಸೇಫ್ ಲಾಕರ್ ಕುರಿತಂತೆ ಗ್ರಾಹಕರ ದೂರು, ಬ್ಯಾಂಕ್​ಗಳು ಮತ್ತು ಭಾರತೀಯ ಬ್ಯಾಂಕ್​ಗಳ ಅಸೋಸಿಯೇಷನ್ (ಐಬಿಎ)ಗಳಿಂದ ಬಂದ ಪ್ರತಿಕ್ರಿಯೆ, ಬ್ಯಾಂಕಿಂಗ್ ಪ್ರಕ್ರಿಯೆ ಹಾಗೂ ತಂತ್ರಜ್ಞಾನದಲ್ಲಿ ಆಗಿರುವ ಬದಲಾವಣೆ ಹಿನ್ನೆಲೆಯಲ್ಲಿ ಹೊಸ ನಿಯಮವನ್ನು ಆರ್​ಬಿಐ ಪರಿಷ್ಕರಿಸಿದೆ.

ಬದಲಾವಣೆ ಏನು?

• ಲಾಕರ್​ಗಳನ್ನು ಹಂಚಿಕೆ ಮಾಡುವ ಸಮಯದಲ್ಲೇ ಅದಕ್ಕೆ ವಿಧಿಸುವ ಶುಲ್ಕವನ್ನು ಠೇವಣಿ ರೂಪದಲ್ಲಿ (ಅಡ್ವಾನ್ಸ್) ಸಂಗ್ರಹಿಸಬಹುದು. ಇದು ಮೂರು ವರ್ಷದ ಲಾಕರ್ ಬಾಡಿಗೆ ಮತ್ತು ನಿರ್ವಹಣಾ ಶುಲ್ಕವಾಗಿರುತ್ತದೆ. ಆದರೆ, ಈ ನಿಯಮವನ್ನು ಈಗಾಗಲೇ ಲಾಕರ್ ಹೊಂದಿರುವ ಮತ್ತು ಸಕ್ರಿಯವಾಗಿ ಖಾತೆ ನಿರ್ವಹಣೆ ಮಾಡುತ್ತಿರುವವರಿಂದ ಪಡೆಯುವಂತಿಲ್ಲ. ಸಕಾಲದಲ್ಲಿ ಲಾಕರ್ ಶುಲ್ಕ ಪಾವತಿ ಆಗದಿರುವ ಹಿನ್ನೆಲೆಯಲ್ಲಿ ಈ ನಿಯಮದಲ್ಲಿ ಬದಲಾವಣೆ ಮಾಡಲಾಗಿದೆ.
• ಲಾಕರ್​ಗಳಿಗೆ ಮುಂಗಡವಾಗಿ ಪಡೆದಂತಹ ಶುಲ್ಕವನ್ನು ನೈಸರ್ಗಿಕ ವಿಕೋಪದಂತಹ ಸಂದರ್ಭದಲ್ಲಿ ಬ್ಯಾಂಕ್​ಗಳು ಗ್ರಾಹಕರಿಗೆ ಹಿಂದುರುಗಿಸಬೇಕು.
• ಲಾಕರ್​ಗಳಿಗೆ ಬ್ಯಾಂಕ್ ಕಡೆಯಿಂದ ಉಂಟಾಗುವಂತಹ ಹಾನಿ, ನಷ್ಟದ ಸಂದರ್ಭದಲ್ಲಿ ಸಂಪೂರ್ಣ ಹೊಣೆ ಹೊರುವ ಅನುಮೋದಿತ ನೀತಿಗೆ ಬದ್ಧವಾಗಿರಬೇಕು.
• ಲಾಕರ್ ವ್ಯವಸ್ಥೆಗಳು ಸರಿಯಾಗಿ ಕಾರ್ಯನಿರ್ವ ಹಿಸುವುದನ್ನು ಬ್ಯಾಂಕ್​ಗಳು ಖಾತ್ರಿ ಪಡಿಸಬೇಕು. ಲಾಕರ್ ರೂಂಗಳಿಗೆ ಅನಧಿಕೃತ ಪ್ರವೇಶ ಇಲ್ಲದಂತೆ ಸುರಕ್ಷತೆ ನೀಡಬೇಕು. ದರೋಡೆ, ಕಳ್ಳತನ ಆಗದಂತೆ ಖಾತ್ರಿ ಒದಗಿಸುವುದೂ ಬ್ಯಾಂಕ್​ಗಳ ಜವಾಬ್ದಾರಿ.
• ನೈಸರ್ಗಿಕ ವಿಕೋಪದ ಸಂದರ್ಭದಲ್ಲಿ (ಭೂಕಂಪನ, ಪ್ರವಾಹ ಇತ್ಯಾದಿ) ಲಾಕರ್​ಗಳಿಗೆ ಆಗುವ ಹಾನಿಗೆ ಬ್ಯಾಂಕ್​ಗಳು ಬಾಧ್ಯವಲ್ಲ. ಆದರೆ, ಇಂಥ ವಿಪತ್ತುಗಳಿಂದ ಸಂಪೂರ್ಣ ರಕ್ಷಣೆ ಪಡೆಯುವಂತಹ ಸೂಕ್ತ ಕ್ರಮಗಳನ್ನು ಬ್ಯಾಂಕ್​ಗಳು ಅಳವಡಿಸಿಕೊಂಡಿರುವುದು ಅವಶ್ಯಕ.
• ಗುಣಮಟ್ಟದ ದೋಷ ಅಥವಾ ಬ್ಯಾಂಕ್ ಸಿಬ್ಬಂದಿಯ ಅಚಾತುರ್ಯದಿಂದ ಆಗುವ ಬೆಂಕಿ ಅವಘಡ ಅಥವಾ ಕಟ್ಟಡ ಕುಸಿತದಿಂದಾಗುವ ಹಾನಿಗೆ ಲಾಕರ್​ಗಳಿಗೆ ವಿಧಿಸುವ ವಾರ್ಷಿಕ ಶುಲ್ಕದ ನೂರು ಪಟ್ಟು ಪರಿಹಾರವನ್ನು ಬ್ಯಾಂಕ್​ಗಳು ಕಟ್ಟಿಕೊಡಬೇಕು. 
• ಅಪಾಯಕಾರಿ ವಸ್ತುಗಳನ್ನು ಲಾಕರ್​ನಲ್ಲಿ ಇಡುವಂತಿಲ್ಲ ಎಂಬ ನಿಬಂಧನೆಗೆ ಗ್ರಾಹಕರು ಬದ್ಧರಾಗಿರುವಂತಹ ಒಪ್ಪಂದವನ್ನು ಬ್ಯಾಂಕ್​ಗಳು ಮಾಡಿಕೊಳ್ಳಬೇಕು.

https://www.vijayavani.net/mother-jumped-into-river-with-6-months-old-child-and-committed-suicide/