ಬನದವ್ವ, ಬಂದವ್ವ, ವನಶಂಕರಿ, ನವದುರ್ಗೆ, ಶಾಕಾಂಬರಿ ಹೀಗೆ ನಾನಾ ಹೆಸರುಗಳಿಂದ ಪೂಜೆಗೊಳ್ಳುತ್ತಿರುವ ಬಾಗಲಕೋಟೆ ಜಿಲ್ಲೆ ಬಾದಾಮಿ ತಾಲೂಕಿನ ಬನಶಂಕರಿದೇವಿಯು ಪಾರ್ವತಿದೇವಿಯ ಅವತಾರ ಎಂದೇ ಭಾವಿಸಲಾಗಿದೆ. ಬನಶಂಕರಿ ದೇವಿಯ ಅವತಾರ ದಿನ ವೈಶಾಖ ಮಾಸದ ಕೃಷ್ಣ ಪಕ್ಷದ ಚತುರ್ದಶಿ ದಿನದಂದು ಆಚರಿಸಲ್ಪಡುತ್ತದೆ. ಈ ಬಾರಿ ಇದು ಮೇ 18ರಂದು ಬಂದಿದೆ. ಅಂದು ಸುಮಾರು 5 ಸಾವಿರ ಮಾವಿನ ಹಣ್ಣುಗಳ ರಸದಿಂದ ದೇವಿಗೆ ಅಭಿಷೇಕ ಮಾಡಲಾಗುತ್ತದೆ. ಅಷ್ಟೇ ಅಲ್ಲ, ಕುಂಕುಮ, ಅರಿಶಿನ, ಶ್ರೀಗಂಧ, ಸುಗಂಧ ದ್ರವ್ಯ, ನಾನಾ ವಿಧದ ಪುಷ್ಪಗಳು, ಹಾಲು, ಸಕ್ಕರೆ, ತುಪ್ಪ, ಜೇನುತುಪ್ಪ, ಮೊಸರು, ಕಬ್ಬಿನಹಾಲು ಹೀಗೆ ಹದಿನಾರು ದ್ರವ್ಯಗಳಿಂದ ಶ್ರೀಸೂಕ್ತ ಮಂತ್ರಗಳ ಜತೆಗೆ ಅಭಿಷೇಕ ನಡೆಯುತ್ತದೆ. ಅಂದು 16 ಬಾರಿ ಶ್ರೀಸೂಕ್ತವನ್ನು ಪಠಿಸಲಾಗುತ್ತದೆ. ನಂತರ ಭಕ್ತರು ನೀಡಿದ ಸುಮಾರು 25 ರಿಂದ 35 ಸೀರೆಗಳನ್ನು ದೇವಿಗೆ ಒಂದೊಂದಾಗಿ ತೊಡಿಸಿ, ನಾನಾ ಆಭರಣಗಳಿಂದ ಅಲಂಕರಿಸಿ ಪೂಜಿಸಲಾಗುತ್ತದೆ. ಅಂದು ದೇವಿಗೆ ವಿಶೇಷವಾಗಿ ಹೋಳಿಗೆ ನೈವೇದ್ಯ ನಡೆಯುತ್ತದೆ. ಅಲ್ಲಿಗೆ ಆ ದಿನ ಬಂದ ಭಕ್ತರಿಗೆ ಮಾವಿನ ಹಣ್ಣಿನ ಸೀಕರಣೆ ಹಾಗೂ ಹೋಳಿಗೆಯನ್ನು ಪ್ರಸಾದ ರೂಪದಲ್ಲಿ ಕೊಡಲಾಗುತ್ತದೆ.
