ಹಿಡಿದ ಕೆಲ್ಸ ಸಾಧಿಸುತ್ತೇನೆಂದು ಬ್ಯಾಗ್​ನಲ್ಲಿ 15 ಲಕ್ಷ ರೂ. ಇಟ್ಕೊಂಡು​ ಠಾಣೆಗೆ ಹೋದವನಿಗೆ ಕಾದಿತ್ತು ಶಾಕ್​!

ದಿಸ್ಪುರ್​: ಪೊಲೀಸ್​ ಅಧಿಕಾರಿಗೆ 15 ಲಕ್ಷ ರೂ. ಲಂಚ ನೀಡಲು ಯತ್ನಿಸುತ್ತಿದ್ದ ವ್ಯಕ್ತಿಯೊಬ್ಬನನ್ನು ಅಸ್ಸಾಂ ಪೊಲೀಸರು ಮಾರಿಗಾಂವ್​ ಜಿಲ್ಲೆಯಲ್ಲಿ ಮಂಗಳವಾರ ಬಂಧಿಸಿದ್ದಾರೆ.

ಬಂಧಿತ ಆರೋಪಿಯನ್ನು ಕೇಂದ್ರ ಅಸ್ಸಾಂ ಜಿಲ್ಲೆಯ ಮೊಯಿರಾಬಾರಿ ಏರಿಯಾ ನಿವಾಸಿ ಮನ್ನಾಸ್​ ಅಲಿ ಎಂದು ಗುರುತಿಸಲಾಗಿದೆ. ಪೊಲೀಸ್​ ಕಚೇರಿಯಲ್ಲೇ 15 ಲಕ್ಷ ರೂ. ಲಂಚ ನೀಡುವಾಗ ಮಾರಿಗಾಂವ್​ ಜಿಲ್ಲೆಯ ಪೊಲೀಸ್​ ವರಿಷ್ಠಾಧಿಕಾರಿ ನಂದ ಸಿಂಗ್​ ಬಾರ್ಕೋಲ ರೆಡ್​ ಹ್ಯಾಂಡ್​ ಆಗಿ ಹಿಡಿದು ಹಾಕಿದ್ದಾರೆ.

ಇದನ್ನೂ ಓದಿ: ಕಂಡೋರ ಹೆಂಡತಿಯನ್ನು ಕರೆದೊಯ್ದ ಪೊಲೀಸಪ್ಪ: ಪತ್ನಿಗಾಗಿ ಸಂತ್ರಸ್ತ ಪತಿಯ ಅಳಲು!

ಈ ಬಗ್ಗೆ ಮಾತನಾಡಿರುವ ನಂದ ಸಿಂಗ್​ ಬಾರ್ಕೋಲ, ಮೊಯಿರಾಬಾರಿ ಏರಿಯಾದಲ್ಲಿ ಅಕ್ರಮವಾಗಿ ಬೆಲ್ಲದ ಪಾಕ ತಯಾರಿಸುತ್ತಿದ್ದ ಐದು ಕಾರ್ಖಾನೆಗಳ ಮೇಲೆ ಪೊಲೀಸರು ಆಗಸ್ಟ್​ 8ರಂದು ದಾಳಿ ನಡೆಸಿದ್ದರು. ಈ ವೇಳೆ ಕೋಟ್ಯಾಂತರ ಮೌಲ್ಯದ ವಸ್ತುಗಳನ್ನು ವಶಕ್ಕೆ ಪಡೆಯಲಾಗಿತ್ತು ಎಂದು ಮಾಹಿತಿ ನೀಡಿದರು.

ಮುಂದುವರಿದು ಮಾತನಾಡಿದ ಅವರು, ಐದು ಅಕ್ರಮ ಕಾರ್ಖಾನೆಗಳ ಮಾಲೀಕ ಪರಾರಿಯಾಗಿದ್ದಾರೆ. ಪ್ರಕರಣವನ್ನು ಹೇಗಾದರೂ ನಿರ್ವಹಣೆ ಮಾಡುವಂತೆ ನನಗೆ ಲಕ್ಷಾಂತರ ರೂಪಾಯಿ ಲಂಚ ನೀಡಲು ಯತ್ನಿಸಿದರು. ಇಂದು ವ್ಯಕ್ತಿಯೊಬ್ಬ ಬ್ಯಾಗ್​ನಲ್ಲಿ ರಹಸ್ಯವಾಗಿ 15 ಲಕ್ಷ ರೂ.ನೊಂದಿಗೆ ನನ್ನ ಕಚೇರಿಗೆ ಆಗಮಿಸಿದ. ತಕ್ಷಣ ಆರೋಪಿಯನ್ನು ಹಿಡಿದುಕೊಳ್ಳುವಂತೆ ಸಹೋದ್ಯೋಗಿಗಳಿಗೆ ಹೇಳಿದೆ. ಆತ ರೆಡ್​ ಹ್ಯಾಂಡ್​ ಆಗಿ ಸಿಕ್ಕಿಬಿದ್ದ ಎಂದು ಬಾರ್ಕೋಲ ಹೇಳಿದ್ದಾರೆ.

ಇದನ್ನೂ ಓದಿ: ಹಿಂದಿನ ಸಿಎಂ ಕೊಟ್ಟಿದ್ದನ್ನು ನಮ್ಮ ಸಿಎಂ ಕಿತ್ತುಕೊಂಡಿದ್ದಾರೆ: ಶಾಸಕ ಬಸನಗೌಡ ಪಾಟೀಲ್ ಅಸಮಾಧಾನ​

ಸದ್ಯ ಆರೋಪಿಯಿಂದ ಪೊಲೀಸರು 15 ಲಕ್ಷ ರೂ. ವಶಕ್ಕೆ ಪಡೆದಿದ್ದು, ಆತನ ವಿರುದ್ಧ ವಿವಿಧ ಪ್ರಕರಣಗಳ ಅಡಿಯಲ್ಲಿ ಎಫ್​ಐಆರ್​ ದಾಖಲಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/s-murder-by-ex-shotpur-champian/