ಅಖಿಲೇಶ್, ಮುಲಾಯಂ ಸಿಂಗ್ ಮೊದಲನೇ ಪತ್ನಿ ಮಾಲತಿ ದೇವಿಯವರ ಪುತ್ರ. ಮಾಲತಿಯವರ ನಿಧನದ ನಂತರ 2003ರಲ್ಲಿ ತಮಗಿಂತ 20 ವರ್ಷ ಚಿಕ್ಕ ವಯಸ್ಸಿನ ಸಾಧನಾ ಯಾದವ್ರನ್ನು ಮುಲಾಯಂ ಸಿಂಗ್ 2ನೇ ವಿವಾಹವಾಗಿದ್ದರು. ಅದಾಗಲೇ ಸಾಧನಾರಿಗೆ ಪ್ರತೀಕ್ ಗುಪ್ತಾ (ಆಗ 16 ವರ್ಷ) ಎಂಬ ಪುತ್ರನಿದ್ದ. 1987ರಲ್ಲಿ ಚಂದ್ರಪ್ರಕಾಶ್ ಗುಪ್ತಾರನ್ನು ಮದುವೆಯಾಗಿದ್ದ ಸಾಧನಾ, ಕೆಲ ವರ್ಷಗಳ ಬಳಿಕ ಪತಿಗೆ ವಿಚ್ಛೇದನ ನೀಡಿದ್ದರು. ಮುಲಾಯಂ ಕುಟುಂಬ ಸೇರಿದ ಬಳಿಕ ತಮ್ಮನ್ನು ಪ್ರತೀಕ್ ಯಾದವ್ ಎಂದು ಗುರುತಿಸಿಕೊಂಡ ಸಾಧನಾ ಪುತ್ರ, ರಾಜಕೀಯಕ್ಕೆ ಬರಬೇಕೆಂಬ ಮಹತ್ವಾಕಾಂಕ್ಷೆ ನನ್ನಲ್ಲಿಲ್ಲ ಎಂದು ಅನೇಕ ಬಾರಿ ಸ್ಪಷ್ಟಪಡಿಸಿದ್ದರು. ಆದರೆ, ಸಾಧನಾ ಯಾದವ್ ಮಾತ್ರ ತಮ್ಮ ಪುತ್ರನಿಗೆ ಸೂಕ್ತ ಸ್ಥಾನಮಾನ ನೀಡಲೇಬೇಕು ಎಂದು ಮುಲಾಯಂ ಮೇಲೆ ಒತ್ತಡ ಹೇರುತ್ತಲೇ ಇದ್ದರು. ಹಾಗಂತ, ಪ್ರತೀಕ್ ತನ್ನ ಪತ್ನಿ ಅಪರ್ಣಾ ಯಾದವ್ರ ರಾಜಕೀಯ ಪ್ರವೇಶವನ್ನು ಎಂದಿಗೂ ವಿರೋಧಿಸಿರಲಿಲ್ಲ. ಅಖಿಲೇಶ್ ಯಾದವ್ಗೆ ಮಾತ್ರ ಇದು ಸುತಾರಾಂ ಒಪ್ಪಿಗೆ ಇರಲಿಲ್ಲ. 2017ರಲ್ಲಿ ಮುಲಾಯಂ ಒತ್ತಡದಿಂದಾಗಿ ಅರ್ಪಣಾ ಯಾದವ್ಗೆ ಲಖನೌ ಕ್ಯಾಂಟ್ ಕ್ಷೇತ್ರದ ಟಿಕೆಟ್ ಸಿಕ್ಕಿತ್ತು. ಈ ಸಲದ ವಿಧಾನಸಭೆ ಚುನಾವಣೆಗೆ ಕುಟುಂಬದ ಯಾರಿಗೂ ಟಿಕೆಟ್ ನೀಡಲಾಗುವುದಿಲ್ಲ ಎಂದು ಮೊದಲೇ ಪ್ರಕಟಿಸಿದ್ದ ಅಖಿಲೇಶ್ ಯಾದವ್, ಪರೋಕ್ಷವಾಗಿ ಅಪರ್ಣಾ ಯಾದವ್ಗೆ ನೀವು ಪಕ್ಷ ಬಿಡಬಹುದು ಎಂಬ ಸಂದೇಶ ರವಾನಿಸಿದ್ದರು. ಅಲ್ಲದೆ, ಅವರು ಪಕ್ಷ ಬಿಡುವುದಿದ್ದರೆ ಯಾರೂ ತಡೆಯಬಾರದು ಎಂದೂ ಪಕ್ಷದ ಮುಖಂಡರಿಗೆ ತಿಳಿಸಿದ್ದರು.
