ದಶರಥನ ಗೋಳು: ಭಾರ್ಗವರಾಮ! ನಿನ್ನ ತಂದೆಯನ್ನು ಕ್ಷತ್ರಿಯನು ವಧಿಸಿದ್ದಕ್ಕೆ ಇಪ್ಪತ್ತೊಂದು ಬಾರಿ ಕ್ಷತ್ರಿಯರನ್ನು ನಿಗ್ರಹಿಸಿ ಪ್ರಶಾಂತನಾಗಿರುವೆ. ಮಹಾತಪಸ್ವಿಯಾದ ನೀನು ನನ್ನ ಮಕ್ಕಳಿಗೆ ಅಭಯಪ್ರಧಾನ ಮಾಡುವುದು ಉಚಿತವಾಗಿದೆ. ಅಧ್ಯಯನ ಮತ್ತು ವ್ರತಗಳಿಂದ ಪ್ರಕಾಶಿತರಾದ, ಮಹಾಮಹಿಮರಾದ ಭಾರ್ಗವರ ವಂಶದಲ್ಲಿ ಹುಟ್ಟಿರುವ ನೀನು ಇನ್ನು ಮುಂದೆ ಶಸ್ತ್ರಧಾರಣೆ ಮಾಡುವುದಿಲ್ಲ ಎಂದು ಇಂದ್ರನ ಮುಂದೆ ಪ್ರತಿಜ್ಞೆಯನ್ನು ಮಾಡಿ ಶಸ್ತ್ರಾಸ್ತ್ರಗಳನ್ನು ಅವನಲ್ಲಿಯೇ ಬಿಟ್ಟು ಬಂದಿರುವೆ. ನಂತರ ಬಹುದೂರ ಪ್ರಯಾಣ ಮಾಡಿ ಮಹೇಂದ್ರ ಪರ್ವತದಲ್ಲಿ ವಾಸಿಸಿದೆ. ಶಾಂತಮನಸ್ಕನಾಗಿ ತಪಶ್ಚರಣೆಯಲ್ಲಿಯೇ ಆಸಕ್ತನಾದ ನೀನು ಇಂದ್ರನ ಸಮ್ಮುಖದಲ್ಲಿ ಮಾಡಿದ ಪ್ರತಿಜ್ಞೆಯನ್ನೂ ಕಡೆಗಾಣಿಸಿ, ನನ್ನ ಸರ್ವವಿನಾಶಕ್ಕೆಂದೇ ಇಲ್ಲಿಗೆ ಆಗಮಿಸಿರುವೆ. ಏಕೆಂದರೆ ನೀನು ದ್ವಂದ್ವಯುದ್ಧಕ್ಕೆ ಕರೆದಿರುವ ರಾಮನು ಹತನಾದರೆ ನಾವುಗಳಾರೂ ಬದುಕಿರುವುದಿಲ್ಲ. ಇದು ಸತ್ಯ ಎಂದು ದಶರಥನು ಗೋಗರೆದನು.
