ಅದಕ್ಕೆ ಯೇಸು ಸಾವಧಾನದಿಂದ ಉತ್ತರಿಸಿದರು. ಅವರ ಉತ್ತರ ಹೀಗಿತ್ತು: ‘ಇದಕ್ಕೆ ಸರಿಹೊಂದುವ ಎರಡನೇ ಆಜ್ಞೆ ಯಾವುದೆಂದರೆ, ನಿನ್ನನ್ನು ನೀನು ಪ್ರೀತಿಸುವಂತೆ ನಿನ್ನ ನೆರೆಯವನನ್ನೂ ಪ್ರೀತಿಸು. ಅಂದರೆ ಆ ನೆರೆಮನೆಯಾತ ಯಾವುದೇ ಜಾತಿ, ಮತ, ಧರ್ಮ ಅಥವಾ ಯಾವುದೇ ದೇಶ ಪ್ರಾಂತ್ಯಗಳಿಗೆ ಸೇರಿದವನಾದರೂ ಆತನನ್ನು ನ್ನಿನ್ನಂತೆಯೇ ಪ್ರೀತಿಸು’. ಅಲ್ಲದೇ ಇನ್ನೊಂದು ಮಾತನ್ನೂ ಹೇಳಿದರು- ಸಮಸ್ತ ಧರ್ಮಶಾಸ್ತ್ರಕ್ಕೂ ಹಾಗೂ ಪ್ರವಾದಿಗಳ ಪ್ರವಚನಗಳಿಗೂ ಈ ಎರಡು ಆಜ್ಞೆಗಳೇ ಅಧಾರ ಎಂದು ವಿವರಿಸಿದರು. ಸಮಸ್ತ ನರಮಾನವರ ನಡುವೆ ಸ್ನೇಹ ಪ್ರೀತಿಗಳನ್ನು ಪೋಷಿಸಿ, ಬೆಳೆಸಿ ನರಮನುಷ್ಯರನ್ನು ಸಹೋದರರ ಹಾಗೆ ಮಾರ್ಪಡಿಸುವ ಈ ಮಾತುಗಳನ್ನು ಆಲಿಸಿದ ಆ ಫರಿಸಾಯ ಯೇಸುವಿನ ಹೃದಯ ವೈಶಾಲ್ಯತೆಗೆ ಬೆರಗಾದ. ಮುಂದೆ ಮತ್ತೇನನ್ನೂ ಪ್ರಶ್ನಿಸಲಾಗದೆ ಅಲ್ಲಿಂದ ಹೊರಟು ಹೋದನು.
