ಊರಿಗೆ ವಾಪಸಾದ ಅಮ್ಮ-ಮಗ ಸ್ಮಶಾನದಲ್ಲಿ ಮಲಗಿದರು!

ಕೋಲ್ಕತಾ: ಕರೊನಾ ವೈರಸ್‌ ಹಾವಳಿ ಕ್ಷಣ ಕ್ಷಣಕ್ಕೂ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಈಗಿನ ಸ್ಥಿತಿ ಹೇಗಿದೆ ಎಂದರೆ ಯಾರನ್ನೂ ನಂಬುವಂತಿಲ್ಲ. ಅದರಲ್ಲಿಯೂ ಹೊರ ಊರುಗಳಿಂದ, ರಾಜ್ಯಗಳಿಂದ ಬಂದವರ ಬಗ್ಗೆ ಬಹು ಎಚ್ಚರಿಕೆ ವಹಿಸುವುದು ಇಂದಿನ ಅನಿವಾರ್ಯತೆ ಆಗಿದೆ.

ಇದೇ ಕಾರಣಕ್ಕೆ ಅಮ್ಮ-ಮಗ ಇಬ್ಬರೂ ಸ್ಮಶಾನದಲ್ಲಿ ಮಲಗಬೇಕಾಗಿ ಬಂದ ದಾರುಣ ಘಟನೆ, ಪಶ್ಚಿಮ ಬಂಗಾಳದ ಕೋಲ್ಕತದಲ್ಲಿ ನಡೆದಿದೆ.

ದೆಹಲಿಯಿಂದ ಹೌರಾ ಜಿಲ್ಲೆಯಲ್ಲಿರುವ ತಮ್ಮ ಮನೆಗೆ ವಾಪಸಾದ ಅಮ್ಮ-ಮಗನನ್ನು ಕರೊನಾ ಹರಡುವ ಭೀತಿಯಿಂದ ಸ್ಥಳೀಯರು ತಡೆದ ಹಿನ್ನೆಲೆಯಲ್ಲಿ ಈ ಸ್ಥಿತಿ ತಲೆದೋರಿದೆ.

ಇದನ್ನೂ ಓದಿ: ಬೆಂಗಳೂರಿನಲ್ಲಿ ಮಾಸ್ಕ್‌ ಹಾಕದವರಿಗೆ ಬಿದ್ದದ್ದು ಒಂದು ಕೋಟಿ ರೂಪಾಯಿ ದಂಡ!

ಮೊಹುವಾ ಮುಖರ್ಜಿ ಮತ್ತು ಮಗ ರೋಹಿತ್ ಶುಕ್ರವಾರ ರಾಜಧಾನಿ ಎಕ್ಸ್​​ಪ್ರೆಸ್​​ನಲ್ಲಿ ದೆಹಲಿಯಿಂದ ಹಿಂದಿರುಗಿದ್ದರು. ಹೇಳಿ ಕೇಳಿ ದೆಹಲಿ ಮೊದಲೇ ಕರೊನಾ ಹಾಟ್‌ಸ್ಪಾಟ್‌. ಇನ್ನು ಕೇಳಬೇಕೆ? ಇವರಿಬ್ಬರೂ ಬರುತ್ತಿದ್ದಂತೆಯೇ ಸ್ಥಳೀಯರು ಊರಿನ ಒಳಗೆ ಪ್ರವೇಶವೇ ಕೊಡಲಿಲ್ಲ!

ವಿಧವೆಯಾಗಿರುವ ಮೊಹುವಾ ದೆಹಲಿಯಲ್ಲಿ ಮಗ ರೋಹಿತ್​ ಜತೆ ಚಿನ್ನಾಭರಣ ವ್ಯವಹಾರ ಮಾಡುತ್ತಿದ್ದಾರೆ. ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಅವರ ವ್ಯವಹಾರದಲ್ಲಿ ನಷ್ಟ ಆಗತೊಡಗಿತು. ಆದ್ದರಿಂದ ದೆಹಲಿ ಬಿಟ್ಟು ತವರು ಸೇರುವ ಹಿನ್ನೆಲೆಯಲ್ಲಿ, ಇಬ್ಬರೂ ಪಶ್ಚಿಮ ಬಂಗಾಳದ ರಘುದೆಬ್ಪುರ್-ದಕ್ಬಂಗಲೋಗೆ ವಾಪಸಾಗುತ್ತಿದ್ದರು.

ಊರಿಗೆ ಬರುವ ಮಧ್ಯೆಯೇ ಅವರನ್ನು ಸ್ಥಳೀಯರು ತಡೆದಿದ್ದಾರೆ. ನೀವು ಕರೊನಾ ಸೋಂಕು ಅಂಟಿಸಿಕೊಂಡು ಬಂದಿದ್ದೀರಿ, ಇಲ್ಲಿಗೆ ಬರಬೇಡಿ ಎಂದು ಹೇಳಿದ್ದಾರೆ. ನಂತರ ಮೊಹವಾ ಅವರು ಪಂಚಾಯತ್​ ಸದಸ್ಯರ ಜತೆ ದೆಹಲಿಯಿಂದ ಬಂದಿರುವ ವಿಷಯವನ್ನು ತಿಳಿಸಿದ್ದಾರೆ. ಆದರೂ ಸ್ಥಳೀಯರ ಅವರ ಮಾತು ಕೇಳಲಿಲ್ಲ. ಈ ಹಿನ್ನೆಲೆಯಲ್ಲಿ ಇಡೀ ರಾತ್ರಿ ತಾಯಿ-ಮಗ ಸ್ಮಶಾನದಲ್ಲಿ ಕಾಲ ಕಳೆದಿದ್ದಾರೆ.

ಈ ಘಟನೆ ಬಗ್ಗೆ ಶನಿವಾರ ಬೆಳಗ್ಗೆ ಪೊಲೀಸರಿಗೆ ವಿಷಯ ತಿಳಿದಿದೆ. ಬಳಿಕ ತಮ್ಮ ಊರಾದ ರಘುದೆಬ್ಪುರ್-ದಕ್ಬಂಗಲೋ ಮನೆಗೆ ತೆರಳುವಂತೆ ಹೇಳಿದ್ದಾರೆ. ಬಳಿಕ ಅಲ್ಲಿ 14 ದಿನಗಳ ಕಾಲ ಹೋಂ ಕ್ವಾರಂಟೈನ್​ನಲ್ಲಿರುವಂತೆ ಸೂಚಿಸಿದ್ದಾರೆ. (ಏಜೆನ್ಸೀಸ್‌)

https://www.vijayavani.net/china-mystious-sound/