ಕುತೂಹಲ ಸಂದೇಷಾ! ನಾಯಕತ್ವ ನಿರ್ಧಾರದ ಮೇಲೆ ರಾಜ್ಯ ನಾಯಕರ ಚಿತ್ತ

ಬೆಂಗಳೂರು: ಆಡಳಿತಾರೂಢ ಬಿಜೆಪಿಯ ‘ಮಾಸ್ಟರ್​ವೆುೖಂಡ್’ ಎಂದೇ ಗುರುತಿಸಿಕೊಂಡಿರುವ ಕೇಂದ್ರ ಗೃಹ ಸಚಿವ ಅಮಿತ್ ಷಾ ಸೋಮವಾರ ರಾತ್ರಿಯಿಂದ 21 ತಾಸು ಬೆಂಗಳೂರಿನಲ್ಲಿ ಮೊಕ್ಕಾಂ ಹೂಡಲಿದ್ದು, ರಾಜಕೀಯ ಬದಲಾವಣೆಗಳ ಕುತೂಹಲ ಗರಿಗೆದರಿದೆ. ಅಧಿಕೃತ, ಖಾಸಗಿ ಕಾರ್ಯಕ್ರಮಗಳ ಜತೆಗೆ ಭೋಜನ ಕೂಟದ ಹೆಸರಲ್ಲಿ ಔಪಚಾರಿಕ ಮಾತುಕತೆ, ಆಯ್ದ ಪ್ರಮುಖರೊಂದಿಗೆ ವಿಶೇಷ ಸಂವಾದ ನಡೆಸಲಿರುವುದು ಗಮನಸೆಳೆದಿದೆ.

ಅಮಿತ್ ಷಾ ನೀಡಲಿರುವ ‘ಸಂದೇಶ’, ಯಾವೆಲ್ಲ ಸಂಗತಿ ಅವಲೋಕಿಸಲಿದ್ದಾರೆ ಎನ್ನುವುದರ ಕಡೆಗೆ ಆಡಳಿತ ಮತ್ತು ಪಕ್ಷದ ರಾಜ್ಯ ನಾಯಕತ್ವದ ಚಿತ್ತ ನೆಟ್ಟಿದೆ. ಸರ್ಕಾರ ಮತ್ತು ಪಕ್ಷದ ವರ್ಚಸ್ಸು ವೃದ್ಧಿಗೆ ಪದೇ ಪದೆ ಎದುರಾಗುತ್ತಿರುವ ಅಡಚಣೆ, ರಾಜ್ಯದ ಇತ್ತೀಚಿನ ರಾಜಕೀಯ ವಿದ್ಯಮಾನಗಳ ಮಾಹಿತಿ ಸಂಗ್ರಹಿಸುವ ಸಾಧ್ಯತೆಗಳಿವೆ.

ತೊಳಲಾಟ: ಅಮಿತ್ ಷಾ ಬರುತ್ತಾರೆಂದರೆ ಸ್ಪಷ್ಟ ನೀಲನಕ್ಷೆ ಜತೆಗಿರುತ್ತದೆ. ಪ್ರಮುಖ ಬೆಳವಣಿಗೆಯಾಗಲಿದೆ ಎಂಬ ಬಹಿರಂಗ ಚರ್ಚೆ, ತರಹೇವಾರಿ ಆಂತರಿಕ ತರ್ಕಗಳು ಕಾವು ಪಡೆದುಕೊಂಡಿವೆ. ಅಚ್ಚರಿಯ ನಡೆಯಿಡುವಲ್ಲಿ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಷಾ ನಿಸ್ಸೀಮರು ಎಂಬ ಬಲ್ಲವರ ಅಭಿಪ್ರಾಯಗಳು ನಿಗೂಢತೆ ಹೆಚ್ಚಿಸಿದೆ. ಇದರ ಭಾರದಿಂದ ಪಕ್ಷದ ಹಲವು ಮುಖಂಡರು ತೊಳಲಾಡುತ್ತಿದ್ದಾರೆ. ಸಚಿವ ಸಂಪುಟದ ಹಲವು ಸಹೋದ್ಯೋಗಿಗಳು, ಕೆಲವು ನಾಯಕರು ನಿಸ್ತೇಜವಾಗಿದ್ದರೆ, ಇನ್ನೂ ಕೆಲವು ಮುಖಂಡರು ಹೆಚ್ಚು ಲವಲವಿಕೆಯಿಂದ ಇರುವುದಕ್ಕೆ ಪರಿಸ್ಥಿತಿಯನ್ನು ತಾಳೆ ಹಾಕಿ ಅನೇಕರು ವಿವಿಧ ರೀತಿಯಲ್ಲಿ ವಿಶ್ಲೇಷಿಸಲಾರಂಭಿಸಿದ್ದಾರೆ.

ಷಾ ಕಾರ್ಯಕ್ರಮ ಪಟ್ಟಿ

1.  ಬೆಳಗ್ಗೆ 10: ಬಸವೇಶ್ವರ ವೃತ್ತದಲ್ಲಿ ಶ್ರೀ ಬಸವರೇಶ್ವರ ಪ್ರತಿಮೆಗೆ ಮಾಲಾರ್ಪಣೆ
2.   ಬೆಳಗ್ಗೆ 10.30: ನೃಪತುಂಗ ವಿವಿಗೆ ಶಿಲಾನ್ಯಾಸ, ವರ್ಚುವಲ್ ವೇದಿಕೆ ಮೂಲಕ ವಿಧಿವಿಜ್ಞಾನ ಪ್ರಯೋಗಾಲಯ ಉದ್ಘಾಟನೆ
3.   ಅಪರಾಹ್ನ 12: ಯಲಹಂಕದ ನ್ಯಾಟ್​ಗ್ರಿಡ್ ಕ್ಯಾಂಪಸ್​ನಲ್ಲಿ ಡಿಸಾಸ್ಟರ್ ರಿಕವರಿ ಸೆಂಟರ್ ಉದ್ಘಾಟನೆ
4.   ಮಧ್ಯಾಹ್ನ 2 ರಿಂದ 3: ಸಿಎಂ ಅಧಿಕೃತ ನಿವಾಸ ರೇಸ್​ವ್ಯೂ ಕಾಟೇಜ್​ನಲ್ಲಿ ಆಯೋಜಿಸಿರುವ ಮಧ್ಯಾಹ್ನದ ಭೋಜನ ಕೂಟದಲ್ಲಿ ಭಾಗಿ
5.  ಮಧ್ಯಾಹ್ನ 3 ರಿಂದ 5: ತಾಜ್​ವೆಸ್ಟೆಂಡ್​ನಲ್ಲಿ ವಿಶೇಷ ಸಭೆ
6.   ಸಂಜೆ 5.30 ರಿಂದ ರಾತ್ರಿ 7: ಖೇಲೋ ಇಂಡಿಯಾ ಸಮಾರೋಪ ಸಮಾರಂಭದಲ್ಲಿ ಭಾಗಿ
7.   ರಾತ್ರಿ 7.10 ರಿಂದ 7.50: ರಾತ್ರಿ ಊಟಕ್ಕೆ ಕಾಯ್ದಿರಿಸಲಾಗಿದೆ
8.  ರಾತ್ರಿ 8.15: ಎಚ್​ಎಲ್ ವಿಮಾನ ನಿಲ್ದಾಣದಿಂದ ದೆಹಲಿಗೆ ಪ್ರಯಾಣ

https://www.vijayavani.net/shivanna-talk-about-appu-in-mangalore/

https://www.vijayavani.net/s-basaveshwara-jayanthi-in-london/