ಅಧ್ಯಕ್ಷರಾದರೂ ನ್ಯಾಯಾಲಯಕ್ಕಿಂತ ಮಿಗಿಲಲ್ಲ; ಹಣಕಾಸು ವಹಿವಾಟು ದಾಖಲೆ ಸಲ್ಲಿಸಿ; ಟ್ರಂಪ್​ಗೆ ಸುಪ್ರೀಂಕೋರ್ಟ್​ ಆದೇಶ

ನ್ಯೂಯಾರ್ಕ್​: ಅಪರಾಧಿಕ ಪ್ರಕರಣವೊಂದರಲ್ಲಿ ಸಾಕ್ಷ್ಯಗಳನ್ನು ಸಲ್ಲಿಸಬೇಕಾದ ಅಗತ್ಯ ಬಿದ್ದಲ್ಲಿ ಅಂಥ ಸಾಮಾನ್ಯ ಕರ್ತವ್ಯಕ್ಕೆ ಯಾರೂ ಮಿಗಿಲಲ್ಲ, ಅಧ್ಯಕ್ಷರೂ ಕೂಡ ಇದಕ್ಕೆ ಹೊರತಲ್ಲ ಎಂದು ಅಮೆರಿಕದ ಸುಪ್ರೀಂ ಕೋರ್ಟ್​ ಅತಿ ಮಹತ್ವದ ಆದೇಶ ನೀಡಿದೆ.

ಅಂತೆಯೇ, ಡೊನಾಲ್ಡ್​ ಟ್ರಂಪ್​ ಆರ್ಥಿಕ ವಹಿವಾಟುಗಳಿಗೆ ಸಂಬಂಧಿಸಿದ ದಾಖಲೆಗಳನ್ನು ತಡೆಯುವ ಅಧಿಕಾರ ಹೊಂದಿಲ್ಲ ಎಂದು ಆದೇಶ ನೀಡಿರುವ ಕೋರ್ಟ್​, ಹೀಗಿದ್ದರೂ, ಇದಕ್ಕೆ ಆಕ್ಷೇಪ ಸಲ್ಲಿಸುವ ಅಧಿಕಾರ ಹೊಂದಿರುತ್ತಾರೆ ಎಂದು ಸ್ಪಷ್ಟನೆ ನೀಡಿದೆ.

ಇದನ್ನೂ ಓದಿ; ಭಾರತದ ಏಟಿಗೆ ಬೆದರಿದ ಚೀನಾ ಹೇಳ್ತಿದೆ.., ‘ನಾವು ಅಂಥವರಲ್ಲ’…!

ತನ್ನೊಂದಿಗೆ ಸಂಬಂಧ ಹೊಂದಿದ್ದ ಮಹಿಳೆಯರಿಗೆ ಟ್ರಂಪ್​ ಭಾರಿ ಪ್ರಮಾಣದಲ್ಲಿ ನೀಡಿದ್ದಾರೆ ಎಂಬ ಆರೋಪಕ್ಕೆ ಸಂಬಂಧಿಸಿದಂತೆ, ಟ್ರಂಪ್​ ಹಣಕಾಸು ವಹಿವಾಟಿನ ದಾಖಲೆಗಳನ್ನು ಕೋರ್ಟ್​ಗೆ ಸಲ್ಲಿಸಬೇಕೆಂದು ಕೋರ್ಟ್​ನಲ್ಲಿ ಒತ್ತಾಯಿಸಲಾಗಿತ್ತು.

ಈ ವಾದವನ್ನು ಎತ್ತಿ ಹಿಡಿದಿರುವ ಸುಪ್ರೀಂ ಕೋರ್ಟ್​ ದಾಖಲೆಗಳನ್ನು ಸಲ್ಲಿಸಬೇಕೆಂದು ಟ್ರಂಪ್​ ಲೆಕ್ಕ ಪರಿಶೋಧಕರಿಗೆ ಆದೇಶ ನೀಡಿದೆ. 7-2 ಬಹುಮತದ ಆಧಾರದಲ್ಲಿ ಮುಖ್ಯ ನ್ಯಾಯಮೂರ್ತಿ ಜಾನ್​. ಜಿ. ರಾಬರ್ಟ್ಸ್​ ಈ ತೀರ್ಪು ನೀಡಿದ್ದಾರೆ. ಇದು ಟ್ರಂಪ್​ಗೆ ಭಾರಿ ಮುಖಭಂಗ ಉಂಟು ಮಾಡಿದೆ. ಕೆಳ ನ್ಯಾಯಾಲಯ ಅಧಿಕಾರದ ವಿಭಜನೆಯನ್ನು ಸಮರ್ಪಕವಾಗಿ ಪರಿಗಣಿಸಿಲ್ಲ ಎಂದು ಸುಪ್ರೀಂ ಕೋರ್ಟ್​ ಅಭಿಪ್ರಾಯಪಟ್ಟಿದೆ.

ಇದನ್ನೂ ಓದಿ; ಭಾರತದ ಔಷಧದ ಮೇಲೂ ಅತೀವ ನಂಬಿಕೆ ಬ್ರೆಜಿಲ್​ ಅಧ್ಯಕ್ಷರಿಗೆ…! 

ನ್ಯಾಯಾಲಯದ ಆದೇಶವನ್ನು ಟ್ರಂಪ್​ ರಾಜಕೀಯಪ್ರೇರಿತ ವಿಚಾರಣೆ ಎಂದು ಪ್ರತಿಕ್ರಿಯಿಸಿದ್ದಾರೆ. ತನ್ನ ಲೆಕ್ಕಾಧಿಕಾರಿಗಳು ಹಾಗೂ ಬ್ಯಾಂಕರ್​ಗಳಿಂದ ಮಾಹಿತಿ ಪಡೆಯಲು ನೀಡಿರುವ ಆದೇಶವನ್ನು ರದ್ದು ಪಡಿಸಬೇಕೆಂದು ಟ್ರಂಪ್​ ಕೋರಿದ್ದರು. ಜತೆಗೆ, ಎಲ್ಲ ರೀತಿಯ ಕ್ರಿಮಿನಲ್​ ವಿಚಾರಣೆಯಿಂದ ಅಧ್ಯಕ್ಷರು ಹೊರತಾಗಿದ್ದಾರೆ. ಅಧ್ಯಕ್ಷ ಹುದ್ದೆಯಲ್ಲಿರುವವರೆಗೆ ಅವರ ವಿರುದ್ಧ ತನಿಖೆ ನಡೆಸುವಂತಿಲ್ಲ ಎಂದು ಟ್ರಂಪ್​ ಪರ ವಕೀಲರು ವಾದಿಸಿದ್ದರು.

ತನ್ನೊಂದಿಗೆ ಸಖ್ಯ ಹೊಂದಿದ್ದ ಪ್ಲೇ ಬಾಯ್​ ಮಾಡೆಲ್​ ಹಾಗೂ ನೀಲಿ ಚಿತ್ರತಾರೆಗಳಿಗೆ ವಕೀಲರ ಮೂಲಕ ಹಣ ಪಾವತಿಸಿದ್ದಾರೆ ಎಂಬ ಆರೋಪ ಟ್ರಂಪ್​ ಮೇಲಿದೆ. ಹೀಗಾಗಿ ಹಣಕಾಸು ವಹಿವಾಟಿನ ದಾಖಲೆಗಳನ್ನು ಪರಿಶೀಲಿಸಿದಲ್ಲಿ ಈ ಸತ್ಯ ಹೊರಬರಲಿದೆ ಎಂಬುದು ಟರಂಪ್​ ವಿರೋಧಿಗಳ ವಾದವಾಗಿದೆ. ಇದಕ್ಕೆ ಸುಪ್ರೀಂ ಕೋರ್ಟ್​ ಕೂಡ ಅಸ್ತು ಎಂದಿದೆ.

https://www.vijayavani.net/the-first-person-in-clinical-trial-for-covid-19-vaccine/