ಸವಾಲುಗಳೇನು?: ಬಗರ್ಹುಕುಂ ಸಾಗುವಳಿ ಅರ್ಜಿಗಳ ವಿಲೇವಾರಿಗೆ ಶಾಸಕರ ಅಧ್ಯಕ್ಷತೆಯಲ್ಲಿ ಅಕ್ರಮ ಸಕ್ರಮ ಸಮಿತಿ ರಚಿಸಲಾಗಿದೆ. ಊರುಗಳಿಗೆ ಹತ್ತಿರದ ಸರ್ಕಾರಿ ಜಮೀನಿನಲ್ಲಿ ಸಾಗುವಳಿ ಮಾಡುವವರು ಸಲ್ಲಿಸಿದ ಅರ್ಜಿಗಳು ಅನೇಕ ಸಮಿತಿಗಳನ್ನು ಸಂಕಟಕ್ಕೆ ಸಿಲುಕಿಸಿವೆ. ಅಕ್ರಮ ಸಕ್ರಮಗೊಳಿಸಿದರೆ ಶಿಕ್ಷಣ, ಆರೋಗ್ಯ, ವಿದ್ಯುತ್, ಸ್ಮಶಾನ ಮುಂತಾದ ಅಗತ್ಯ ಕೆಲಸಗಳಿಗೆ ಊರು ಸಮೀಪದ ಸರ್ಕಾರಿ ಜಮೀನು ಕೊರತೆಯಾಗುತ್ತದೆ. ಖಾಸಗಿ ಜಮೀನು ದುಬಾರಿ ಜತೆಗೆ ಅದರಲ್ಲೂ ನೀರಾವರಿಯಾಗಿದ್ದರೆ ಸಿಗುವುದು ದುರ್ಲಭ. ಈ ಕಾರಣಕ್ಕೆ ಹತ್ತಾರು ಯೋಜನೆಗಳ ಕಾಮಗಾರಿ ನನೆಗುದಿ, ರುದ್ರಭೂಮಿಯಿಲ್ಲದೆ ಅಂತ್ಯಸಂಸ್ಕಾರಕ್ಕೆ ವೇದನೆಪಡುವ ಗ್ರಾಮಗಳಿವೆ. ಜನವಸತಿ ಪ್ರದೇಶದಿಂದ ದೂರವಿರುವ ಸರ್ಕಾರಿ ಜಮೀನಿದ್ದರೆ ಸಮಸ್ಯೆಯಾಗದು. ಆದರೆ ಇವೂ ಕೂಡ ಅರಣ್ಯ, ಗೋಮಾಳ ಅಥವಾ ಗ್ರಾಮಠಾಣ ಭೂಮಿಯಾಗಿದ್ದರೆ ಮಂಜೂರು ಮಾಡುವುದು ಅಸಾಧ್ಯವೆಂದು ಕಂದಾಯ ಇಲಾಖೆ ಮೂಲಗಳು ಸಂಕಟದ ಮೂಲ ಬಿಚ್ಚಿಟ್ಟಿವೆ.
