ಕೃಷಿ ಪಂಪ್​ಸೆಟ್ ಸಬ್ಸಿಡಿ ಪರಾಮರ್ಶೆ? ಅನರ್ಹರನ್ನು ಹೊರಹಾಕಲು ಸರ್ಕಾರ ಚಿಂತನೆ

ಶ್ರೀಕಾಂತ್ ಶೇಷಾದ್ರಿ ಬೆಂಗಳೂರು

ವರ್ಷದಿಂದ ವರ್ಷಕ್ಕೆ ಬೊಕ್ಕಸಕ್ಕೆ ಭಾರವಾಗುತ್ತಿರುವ ವಿದ್ಯುತ್ ಪಂಪ್​ಸೆಟ್ ಸಬ್ಸಿಡಿಯನ್ನು ಪರಾಮಶಿಸುವ ಚಿಂತನೆ ಸರ್ಕಾರದ ಮಟ್ಟದಲ್ಲಿ ಕವಲೊಡೆದಿದೆ. ಒಂದೊಮ್ಮೆ ಈ ನಿರ್ಧಾರ ಕೈಗೊಂಡಿದ್ದೇ ಆದಲ್ಲಿ ವಾರ್ಷಿಕ 5 ಸಾವಿರ ಕೋಟಿ ರೂ. ಹೊರೆ ತಗ್ಗಿಸಬಹುದೆಂಬುದು ಇದರ ಹಿಂದಿರುವ ಲೆಕ್ಕಾಚಾರ. ಅರ್ಹರಿಗೆ ಯೋಜನೆಯ ಲಾಭ ಸಿಗಬೇಕೆಂಬುದು ಆಶಯ. ಆದರೆ ಸ್ಥಿತಿವಂತರು, ರೈತರಲ್ಲದವರೂ ಲಾಭ ಪಡೆದುಕೊಳ್ಳುತ್ತಿರುವ ವಿಚಾರ ಸರ್ಕಾರದ ಗಮನಕ್ಕೆ ಬಂದಿದೆ. ಇದೇ ಕಾರಣದಿಂದ ಫಲಾನುಭವಿಗಳ ಪಟ್ಟಿಯನ್ನೊಮ್ಮೆ ಸೋಸಿ, ಅರ್ಹರನ್ನಷ್ಟೇ ಉಳಿಸಿದರೆ ಸರ್ಕಾರದ ಬೊಕ್ಕಸಕ್ಕೆ ಎಷ್ಟು ಉಳಿತಾಯ ಆಗಬಹು ದೆಂಬ ಅಂದಾಜನ್ನು ಹಣಕಾಸು ಇಲಾಖೆ ಮಾಡಿದೆ.

ಸರ್ಕಾರಕ್ಕೆ ಸಿಕ್ಕ ಮಾಹಿತಿ: ಕರ್ನಾಟಕದ ಜನಸಂಖ್ಯೆ ಪ್ರಮಾಣವು ಜೀವನೋಪಾಯಕ್ಕೆ ಕೃಷಿ ಮೇಲೆ ಅವಲಂಬಿತವಾಗಿದೆ. ಕೃಷಿಗೆ ಅಗತ್ಯವಾದ ನೀರಾವರಿ ಪಂಪ್​ಗಳಿಗೆ ವಿದ್ಯುತ್ ಸಬ್ಸಿಡಿಯನ್ನು ಸರ್ಕಾರವೇ ವೆಚ್ಚ ಮಾಡುತ್ತಿರುವುದು ಕೃಷಿ ನೀತಿಯ ಮೂಲಾಧಾರವಾಗಿದೆ. ಆ ಮೂಲಕ ಕಾರ್ಯಾ ಚರಣೆಯ ವೆಚ್ಚ ಕಡಿಮೆ ಮಾಡಿ ರೈತರನ್ನು ಬೆಂಬಲಿ ಸುವ ಗುರಿ ಹೊಂದಿದೆ. ಆರ್ಥಿಕ ವಿಚಾರಕ್ಕೆ ಬಂದರೆ ನೀರಾವರಿ ಪಂಪ್​ಗಳಿಗೆ ಸಬ್ಸಿಡಿ ವಿದ್ಯುತ್​ನ ಆರ್ಥಿಕ ಹೊರೆ ಗಣನೀಯವಾಗಿ ಬೆಳೆದಿದೆ.

ಸಬ್ಸಿಡಿ ಬೇಡಿಕೆ 2016ರಲ್ಲಿ 10,118 ಕೋಟಿ ರೂ.ಗಳಿತ್ತು. 2023ರಲ್ಲಿ 22,387 ಕೋಟಿ ರೂ.ಗಳಿಗೆ ಏರಿಕೆ ಕಂಡಿದೆ. ಈ ಏಳು ವರ್ಷದ ಸರಾಸರಿ ಗಮನಿಸಿದರೆ, ಶೇ.121ರಷ್ಟು ಹೆಚ್ಚಳವಾದಂತಾಗಿದೆ. ನೀರಾವರಿ ಪಂಪ್ ವಿದ್ಯುತ್ ಸಂಪರ್ಕಗಳ ಸಂಖ್ಯೆ 2012ರಲ್ಲಿ 20 ಲಕ್ಷ ಇತ್ತು. ಇದು 2023ರಲ್ಲಿ 34.17 ಲಕ್ಷಕ್ಕೆ ಏರಿಕೆಯಾಗಿದೆ. ಇದರ ಪ್ರಮಾಣ ಶೇ.70.85 ಎಂದು ಅಂದಾಜಿಸಲಾಗಿದೆ. ಇನ್ನು ಪ್ರತಿ ವರ್ಷವೂ ಹೊಸದಾಗಿ 1.2 ಲಕ್ಷ ಪಂಪ್​ಸೆಟ್​ಗಳು ಈ ಸಬ್ಸಿಡಿಗೆ ಸೇರ್ಪಡೆಯಾಗುತ್ತಿದೆ.

ಸರ್ಕಾರ ಏನು ಮಾಡಬೇಕು?

1. ಅಧಿಕಾರಿಗಳ ಲೆಕ್ಕದ ಪ್ರಕಾರ ಫಲಾನುಭವಿಗಳ ಪಟ್ಟಿಯಲ್ಲಿರುವ ಅರ್ಹರು ಹಾಗೂ ಅನರ್ಹರು ಯಾರೆಂಬುದನ್ನು ಪ್ರಕಟಿಸಬೇಕಾಗುತ್ತದೆ. ಹೀಗೆ ಮಾಡಿದ್ದೇ ಆದರೆ ವಾರ್ಷಿಕ 5 ಸಾವಿರ ಕೋಟಿ ರೂ. ಉಳಿತಾಯವಾಗುತ್ತದೆ
2. ಶ್ರೀಮಂತ ರೈತರನ್ನು ಅರ್ಹರ ಪಟ್ಟಿಯಿಂದ ಹೊರಗಿಡುವುದು, ಒಂದು ಕುಟುಂಬದ ಒಂದೇ ಪಂಪ್​ಸೆಟ್​ಗೆ ಮಾತ್ರ ಸಬ್ಸಿಡಿ ಲಾಭ ಸಿಗುವಂತಾದರೆ ಅಥವಾ ಎಪಿಎಲ್ ರೈತರ ಪಂಪ್​ಸೆಟ್​ಗೆ ಪೂರ್ಣ ಸಬ್ಸಿಡಿ ಬದಲು ಭಾಗಶಃ ಸಬ್ಸಿಡಿ ನೀಡಿದರೆ ಹೇಗೆ ಎಂಬ ಚಿಂತನೆಗಳಿವೆ. ಈ ಪ್ರಸ್ತಾವನೆ ಶೀಘ್ರವೇ ಸಂಪುಟ ಸಭೆ ಮುಂದೆ ಮಂಡನೆಯಾಗುವ ಸಾಧ್ಯತೆ ಇದೆ.
3. ಮುಂದೆ ಸ್ಥಳೀಯ ಸಂಸ್ಥೆ ಚುನಾವಣೆ ಇರುವ ಕಾರಣ ಅಷ್ಟು ಸಲೀಸಾಗಿ ತೀರ್ಮಾನ ಕೈಗೊಳ್ಳುವುದು ಕಷ್ಟವಾಗಬಹುದು. ಪ್ರತಿಪಕ್ಷಕ್ಕೆ ಅಸ್ತ್ರವಾಗಬಹುದು, ಹೋರಾಟಕ್ಕೆ ಅವಕಾಶ ಮಾಡಿಕೊಟ್ಟಂತೆಯೂ ಆಗಲಿದೆ. ಹೀಗಾಗಿ ತೀರ್ಮಾನ ಅಷ್ಟು ಸಲೀಸಲ್ಲ.
4. ನಿರ್ದಿಷ್ಟ ವರ್ಗದ ರೈತರಿಗೆ ಸೋಲಾರ್ ಪಂಪ್​ಸೆಟ್ ಹಾಕಿಸಿಕೊಳ್ಳಲು ಪ್ರೋತ್ಸಾಹ ನೀಡುವ, ಮನವರಿಕೆ ಮಾಡಿಕೊಡುವ ಮೂಲಕ ಸಾಂಪ್ರದಾಯಿಕ ವ್ಯವಸ್ಥೆಯಿಂದ ಅವರನ್ನು ಹೊರಗಿಡಲು ಅವಕಾಶವಿದ್ದು, ಈ ನಿಟ್ಟಿನಲ್ಲಿ ಅಭಿಯಾನ ಕೈಗೆತ್ತಿಕೊಳ್ಳಬೇಕಾಗಿದೆ.

ದುರುಪಯೋಗಕ್ಕೆ ಸಾಕ್ಷ್ಯ: ಸರ್ಕಾರಕ್ಕೆ ಸಿಕ್ಕ ಮಾಹಿತಿಯಲ್ಲಿ ಮತ್ತೊಂದು ಆತಂಕಕಾರಿ ವಿಚಾರವಿದೆ. 9 ಲಕ್ಷ ಪಂಪ್​ಸೆಟ್​ಗಳಿಗೆ ಸಂಬಂಧಿಸಿದ 5.68 ಲಕ್ಷ ಫಲಾನುಭವಿಗಳ ಹೆಸರು ರೈತ ಫಲಾನುಭವಿಗಳ ಸರ್ಕಾರಿ ಡೇಟಾಬೇಸ್​ನಲ್ಲಿ ಇಲ್ಲ. ಫ್ರೂಟ್ಸ್ ಪೋರ್ಟಲ್​ನಲ್ಲಿ ರೈತರ ನಿಖರ ಪಟ್ಟಿ ಇದೆಯಾದರೂ ಅದರಲ್ಲಿ ಇಷ್ಟು ಸಂಖ್ಯೆಯ ಮಾಹಿತಿ ಉಲ್ಲೇಖವಾಗಿಲ್ಲ. ಶ್ರೀಮಂತ ರೈತರು ಅಥವಾ ಕೃಷಿಯೇತರ ಬಳಕೆದಾರರು ಸಬ್ಸಿಡಿಯನ್ನು ದುರುಪಯೋಗಪಡಿಸಿಕೊಳ್ಳುತ್ತಿದ್ದಾರೆ ಎಂಬುದಕ್ಕೆ ಇದು ಉದಾಹರಣೆ. ಫಲಾನುಭವಿಗಳ ಲೆಕ್ಕಾಚಾರ

• 23.35 ಲಕ್ಷ ಸಂಪರ್ಕ 5 ಎಕರೆಗಿಂತ ಕಡಿಮೆ ಭೂಮಿ ಹೊಂದಿರುವ ರೈತರದ್ದು
• ಈ ರೈತರು ಸಬ್ಸಿಡಿ ಕಾರ್ಯಕ್ರಮದ ಪ್ರಾಥಮಿಕ ಉದ್ದೇಶಿತ ಫಲಾನುಭವಿಗಳು
• 89,943 ಸಂಪರ್ಕ 5-10 ಎಕರೆ ಜಮೀನು ಹೊಂದಿರುವ ರೈತರಿಗೆ ಸೇರಿದ್ದು
• ಇವರನ್ನು ಮಧ್ಯಮ ವರ್ಗದ ರೈತರು ಎಂದು ಪರಿಗಣಿಸಬಹುದು
• 27,037 ಸಂಪರ್ಕ 10 ಎಕರೆಗಿಂತ ಹೆಚ್ಚು ಭೂಮಿ ಹೊಂದಿರುವವರಿಗೆ ಸೇರಿದ್ದು
• ಸರ್ಕಾರದ ಪ್ರಕಾರ ಇವರೆಲ್ಲ ದೊಡ್ಡ ಭೂ ಮಾಲಿಕರೆಂದು ಪರಿಗಣಿಸಲ್ಪಡುತ್ತಾರೆ
• ಶ್ರೀಮಂತ ಭೂಮಾಲೀಕರು ಸರ್ಕಾರ ಯೋಜನೆಯ ಉದ್ದೇಶಿತ ಫಲಾನುಭವಿಗಳಲ್ಲ

https://www.vijayavani.net/gautam-gambhir-not-1st-choice-coach-only-a-compromise-bcci-official-drops-bomb

https://www.vijayavani.net/turning-point-was-ravi-shastris-unfiltered-take-on-team-indias-defeat-at-mcg