ಬೆಂಗಳೂರು: ಯಂತ್ರಗಳ ಖರೀದಿಗೆ ರಿಯಾಯಿತಿ ನೀಡುವುದು ಸೇರಿ ಕೃಷಿ ಬೆಳವಣಿಗೆ ಹಾಗೂ ರೈತರ ಸಂಕಷ್ಟ ನಿವಾರಣೆಗೆ ವಿವಿಧ ಶಿಫಾರಸು ಹಾಗೂ ವಿಶ್ಲೇಷಣಾ ವರದಿಯನ್ನು ಕೃಷಿ ಬೆಲೆ ಆಯೋಗ ಮುಖ್ಯಮಂತ್ರಿಗಳಿಗೆ ಸಲ್ಲಿಸಿತು. ಕೃಷಿ ಹಾಗೂ ತೋಟಗಾರಿಕೆ ಬೆಳೆಗಳ ವಿಸ್ತೀರ್ಣ, ಇಳುವರಿ, ಉತ್ಪಾದನೆ, ಸಾಗುವಳಿ ವೆಚ್ಚ ಮತ್ತು ಮಾರುಕಟ್ಟೆ ಬೆಲೆಗಳ ವಸ್ತುಸ್ಥಿತಿ ಹಾಗೂ ಉತ್ಪಾದಕರು ಮತ್ತು ಗ್ರಾಹಕರ ನಡುವಿನ ಬೆಲೆ ಪ್ರಸರಣದ ವಿಶ್ಲೇಷಣೆ ನಡೆಸಲಾಗಿದ್ದು, ಆಯೋಗದ ಅಧ್ಯಕ್ಷ ಹನುಮನಗೌಡ ಬೆಳಗುರ್ಕಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರಿಗೆ ವರದಿ ಸಲ್ಲಿಸಿದರು. ಆಯೋಗ ಪ್ರತಿ ಬೆಳೆಗಳ ವಸ್ತುಸ್ಥಿತಿ ಅಧ್ಯಯನ ಮಾಡಿ ಬೆಳೆ ಶಿಫಾರಸು, ಬೆಲೆ ಶಿಫಾರಸು ಎರಡು ವಿಭಾಗಗಳಲ್ಲಿ ಈ ವರದಿ ಸಲ್ಲಿಸಿದೆ. ವರದಿ 10 ಅಧ್ಯಾಯ ಒಳಗೊಂಡಿದ್ದು, ಕಾರ್ಯ ಪದ್ಧತಿ, ಉತ್ಪಾದನಾ ವೆಚ್ಚದ ಲೆಕ್ಕಾಚಾರ, ಪರಿಕರಗಳ ಬಳಕೆ, ಕೃಷಿ ಯಾಂತ್ರೀಕರಣ ಹಾಗೂ ಇಂಧನ ಬೆಲೆ ಏರಿಳಿತದ ಪರಿಣಾಮ, ಕೃಷಿ ಮಾರುಕಟ್ಟೆ ವಸ್ತುಸ್ಥಿತಿ, ಬೆಲೆ ಪ್ರಸರಣ, ಆತ್ಮನಿರ್ಭರ ಭಾರತ-ಸ್ವಾವಲಂಬಿ ಕರ್ನಾಟಕ, ರೈತ ಸ್ನೇಹಿ ಬೆಳೆ ವಿಶ್ಲೇಷಣೆ ಸೇರಿ ಸುಮಾರು 500 ಪುಟಗಳನ್ನು ಒಳಗೊಂಡಿದೆ. 2020-21ನೇ ಸಾಲಿನ ವಿಶ್ಲೇಷಣಾ ವರದಿ ಶಿಫಾರಸು 30 ಪುಟಗಳನ್ನು ಹೊಂದಿದೆ.
