ಚೀನಾ ಆಯ್ತು ಈಗ ಪಾಕಿಸ್ತಾನ; ಯುದ್ಧದಲ್ಲಿ ನಾವೇ ಗೆಲ್ಲೋದು ಎಂದ ನೆರೆರಾಷ್ಟ್ರ

ಇಸ್ಲಮಾಬಾದ್: ಒಂದೊಮ್ಮೆ ಗಡಿಯಲ್ಲಿ ಯುದ್ಧ ಸಂಭವಿಸಿದೆ ಭಾರತ ಗೆಲ್ಲಲು ಸಾಧ್ಯವೇ ಇಲ್ಲವೆಂದು ಇತ್ತೀಚೆಗಷ್ಟೇ ಚೀನಾ ಹೇಳಿದೆ. ಅಲ್ಲಿನ ಸರ್ಕಾರದ ಮುಖವಾಣಿ ಪತ್ರಿಕೆ ಗ್ಲೋಬಲ್​ ಟೈಮ್​ ತನ್ನ ಸಂಪಾದಕೀಯದಲ್ಲಿ ಭಾರತದ ಸೋಲು ನಿಶ್ಚಿತ ಎಂದು ಬರೆದುಕೊಂಡಿತ್ತು.

ಇದೀಗ ಪಾಕಿಸ್ತಾನ ಕೂಡ ಅದೇ ರಾಗ ಎಳೆದಿದೆ. ಈಗೇನಾದರೂ ಯುದ್ಧವಾದರೆ ಪಾಕಿಸ್ತಾನಕ್ಕೆ ಗೆಲುವು ನಿಶ್ಚಿತ ಎಂದು ಪಾಕ್​ ಸೇನಾ ಮುಖ್ಯಸ್ಥ ಜನರಲ್ ಕಮರ್ ಜಾವೇದ್ ಬಜ್ವಾ ಹೇಳಿದ್ದಾರೆ. ಭಾರತದ ಹೆಸರು ಹೇಳದೆಯೇ ವಾಗ್ದಾಳಿ ನಡೆಸಿದ್ದಾರೆ. ಇದನ್ನೂ ಓದಿ: ಶಾಸಕ ಹರತಾಳು ಹಾಲಪ್ಪನವರಿಗೆ ಅನಾರೋಗ್ಯ; ಮಣಿಪಾಲ ಆಸ್ಪತ್ರೆಗೆ ದಾಖಲು

ಇಂದು ರಾವಲ್ಪಿಂಡಿಯಲ್ಲಿರುವ ಜನರಲ್​ ಪ್ರಧಾನ ಕಚೇರಿಯಲ್ಲಿ ನಡೆದ ರಕ್ಷಣಾ ದಿನ ಮತ್ತು ಹುತಾತ್ಮ ದಿನ ಆಚರಣೆ ಸಂದರ್ಭದಲ್ಲಿ ಮಾತನಾಡಿದ ಬಜ್ವಾ, ಎಲ್ಲರೀತಿಯ ಆಕ್ರಮಣಕ್ಕೆ ಸೂಕ್ತ ಉತ್ತರ ನೀಡಲು ನಾವು ಸಿದ್ಧರಿದ್ದೇವೆ. ಐದನೇ ತಲೆಮಾರಿನ ಅಥವಾ ಹೈಬ್ರಿಡ್​ ಮಾದರಿಯ ಯುದ್ಧದ ರೂಪದಲ್ಲಿ ನಮಗೆ ಅನೇಕ ಸವಾಲುಗಳನ್ನು ಒಡ್ಡಲಾಗುತ್ತಿದೆ. ಪಾಕಿಸ್ತಾನ ಮತ್ತು ಇಲ್ಲಿನ ಸೇನೆ ಬಗ್ಗೆ ಸುಳ್ಳು ಸುದ್ದಿ ಹಬ್ಬಿಸಿ, ಅಪಖ್ಯಾತಿ ತರುವುದೇ ಇದರ ಉದ್ದೇಶ. ಆದರೆ ಇಂಥ ಹೈಬ್ರೀಡ್​ ಯುದ್ಧವನ್ನು ಸಶಕ್ತವಾಗಿ ಎದುರಿಸುವ ಶಕ್ತಿ ನಮಗಿದೆ. ಅಂತಿಮವಾಗಿ ಜಯ ನಮಗೇ ಸಿಗುತ್ತದೆ ಎಂದಿದ್ದಾರೆ.

ಪಾಕಿಸ್ತಾನ ಶಾಂತಿಪ್ರಿಯ ದೇಶ. ಆದರೆ ನಮ್ಮ ಮೇಲೆ ಯುದ್ಧ ಸಾರಿದರೆ ಅದಕ್ಕೆ ತಕ್ಕ ಪ್ರತಿಕ್ರಿಯೆ ನೀಡುತ್ತೇವೆ. ಯಾವುದೇ ರೀತಿಯ ಆಕ್ರಮಣವನ್ನೂ ಎದುರಿಸುತ್ತೇವೆ ಎಂದು ಹೇಳಿದ್ದಾರೆ.(ಏಜೆನ್ಸೀಸ್)

https://www.vijayavani.net/if-war-starts-india-will-have-no-chance-of-winning/