ನಷ್ಟದಲ್ಲಿದೆ ಅದಾನಿ ಸಮೂಹದ ಕಂಪನಿ: ಷೇರು ಬೆಲೆ ರೂ. 93ಕ್ಕೆ ಕುಸಿತ; ಹೂಡಿಕೆಗೆ ಸಕಾಲವೇ?

ಮುಂಬೈ: ಗೌತಮ್ ಅದಾನಿ ಸಮೂಹದ ಸಿಮೆಂಟ್ ಕಂಪನಿ ಸಂಘಿ ಇಂಡಸ್ಟ್ರೀಸ್ ತನ್ನ ಮಾರ್ಚ್ ತ್ರೈಮಾಸಿಕ ಫಲಿತಾಂಶಗಳನ್ನು ಬಿಡುಗಡೆ ಮಾಡಿದೆ. ಮಾರ್ಚ್ 2024 ಕ್ಕೆ ಕೊನೆಗೊಳ್ಳುವ ತ್ರೈಮಾಸಿಕದಲ್ಲಿ ಈ ಕಂಪನಿಯ ನಿವ್ವಳ ನಷ್ಟ 19.02 ಕೋಟಿ ರೂ. ಆಗಿದೆ. ಒಂದು ವರ್ಷದ ಹಿಂದೆ ಇದೇ ಅವಧಿಯಲ್ಲಿ 104.56 ಕೋಟಿ ರೂಪಾಯಿ ನಷ್ಟವಾಗಿತ್ತು.

ಮಾರ್ಚ್ 2024 ಕ್ಕೆ ಕೊನೆಗೊಳ್ಳುವ ತ್ರೈಮಾಸಿಕದಲ್ಲಿ ಮಾರಾಟವು ಹಿಂದಿನ ವರ್ಷದ ತ್ರೈಮಾಸಿಕದಲ್ಲಿನ 225 ಕೋಟಿ ರೂ.ಗೆ ಹೋಲಿಸಿದರೆ 26.66% ರಷ್ಟು ಏರಿಕೆಯಾಗಿ 284.78 ಕೋಟಿ ರೂ. ಆಗಿದೆ.

ಕಂಪನಿಯು ಮಾರ್ಚ್ 2024ರ ಆರ್ಥಿಕ ವರ್ಷದಲ್ಲಿ 448.79 ಕೋಟಿ ರೂಪಾಯಿಗಳ ನಷ್ಟವನ್ನು ದಾಖಲಿಸಿದೆ. ಮಾರ್ಚ್ 2023 ರ ಆರ್ಥಿಕ ವರ್ಷದಲ್ಲಿ 325.70 ಕೋಟಿ ರೂಪಾಯಿಗಳ ನಷ್ಟವನ್ನು ದಾಖಲಿಸಿತ್ತು.

2023-2024 ರ ಆರ್ಥಿಕ ವರ್ಷದಲ್ಲಿ ಮಾರಾಟವು 11.29% ರಷ್ಟು ಕುಸಿದು 820.17 ಕೋಟಿ ರೂ. ಆಗಿದೆ. 2022-2023ರ ಆರ್ಥಿಕ ವರ್ಷದಲ್ಲಿ 924.50 ಕೋಟಿ ರೂ. ಮಾರಾಟವಾಗಿತ್ತು.

ಸಂಘಿ ಇಂಡಸ್ಟ್ರೀಸ್‌ನ ಷೇರು ಕುರಿತು ಹೇಳುವುದಾದರೆ, ಕಳೆದ ಶುಕ್ರವಾರ ಈ ಷೇರಿನ ಬೆಲೆ 92.99 ರೂ. ತಲುಪಿತ್ತು. ಹಿಂದಿನ ದಿನಕ್ಕೆ ಹೋಲಿಸಿದರೆ ಈ ಸ್ಟಾಕ್ 0.21% ರಷ್ಟು ಕುಸಿದಿದೆ. ಜನವರಿ 2024 ರಲ್ಲಿ ಈ ಷೇರು ಬೆಲೆ 156.20 ರೂ.ಗೆ ಏರಿತ್ತು. ಇದು ಈ ಷೇರಿನ 52 ವಾರಗಳ ಗರಿಷ್ಠ ಬೆಲೆಯಾಗಿದೆ. ಇದಾದ ನಂತರ ಷೇರುಗಳಲ್ಲಿ ಮಾರಾಟ ಅಧಿಕವಾಗಿ, ಅದರ ಬೆಲೆ 100 ರೂ.ಗಿಂತ ಕಡಿಮೆಯಾಯಿತು.

ಇತ್ತೀಚೆಗೆ, ಸಂಘಿ ಇಂಡಸ್ಟ್ರೀಸ್ ಮಂಡಳಿಯು ಪರಿವರ್ತಿಸಲಾಗದ ರಿಡೀಮ್ ಮಾಡಬಹುದಾದ ಆದ್ಯತೆಯ ಷೇರುಗಳನ್ನು (RPS) ನೀಡುವ ಮೂಲಕ 2,200 ಕೋಟಿ ರೂ.ವರೆಗೆ ಸಂಗ್ರಹಿಸುವ ಪ್ರಸ್ತಾವನೆಯನ್ನು ಅನುಮೋದಿಸಿದೆ.

ಕಳೆದ ವರ್ಷವೇ ಅದಾನಿ ಗ್ರೂಪ್​ನ ಸಿಮೆಂಟ್​ ಕಂಪನಿಯಾದ ಅಂಬುಜಾ ಸಿಮೆಂಟ್, ಗುಜರಾತಿನ ಸಂಘಿ ಇಂಡಸ್ಟ್ರೀಸ್ ಅನ್ನು ಸ್ವಾಧೀನಪಡಿಸಿಕೊಂಡಿತ್ತು. ಸಂಘಿ ಇಂಡಸ್ಟ್ರೀಸ್ ಲಿಮಿಟೆಡ್ ಸಿಮೆಂಟ್ ವ್ಯವಹಾರದಲ್ಲಿ ತೊಡಗಿದೆ.

ಸಂಘಿ ಇಂಡಸ್ಟ್ರೀಸ್​ನಲ್ಲಿ ಪ್ರವರ್ತಕರು ಶೇಕಡಾ 78.52 ಪಾಲನ್ನು ಹೊಂದಿದ್ದಾರೆ. ಸಾರ್ವಜನಿಕ ಷೇರುದಾರರು ಕಂಪನಿಯ ಶೇಕಡಾ 21.48 ಷೇರುಗಳನ್ನು ಹೊಂದಿದ್ದಾರೆ. 2022 ರಲ್ಲಿ, ಅದಾನಿ ಗ್ರೂಪ್ ಅಂಬುಜಾ ಮತ್ತು ಎಸಿಸಿಯನ್ನು ಸ್ವಾಧೀನಪಡಿಸಿಕೊಂಡಿತ್ತು.

https://www.vijayavani.net/rs-1-lakh-became-48-lakh-in-3-years-dividend-will-now-be-paid-on-a-share-that-has-returned-4850

https://www.vijayavani.net/education-sector-stocks-rise-20-in-one-day-despite-stock-market-crash-hit-the-upper-circuit

https://www.vijayavani.net/buy-these-3-stocks-next-week-market-expert-advice