ಸಾಮಾನ್ಯವಾಗಿ ತಮ್ಮ ಖಾಸಗಿ ಜೀವನ, ಸಿನಿವೃತ್ತಿಯ ಬಗ್ಗೆ ಅಷ್ಟಾಗಿ ಎಲ್ಲಿಯೂ ಮಾತನಾಡಲು ಬಯಸದ ಕಾಜೋಲ್, ಆದಷ್ಟು ವಿವಾದಗಳಿಂದ ದೂರ ಉಳಿಯಲು ಇಚ್ಛಿಸುತ್ತಾರೆ. ಆದ್ರೆ, ಮೊದಲ ಬಾರಿಗೆ ಅವರು ತಮ್ಮ ಸಿನಿ ಪಯಣ ಬೇಡವೆಂದು ನಿರ್ಧರಿಸಿ, ಅದನ್ನು ಮತ್ತೆ ಮುಂದುವರಿಸಿದರ ಕುರಿತು ಇಲ್ಲಿ ಮನಬಿಚ್ಚಿ ಮಾತನಾಡಿದ್ದಾರೆ. "ನಟನಾ ಲೋಕಕ್ಕೆ ಎಂಟ್ರಿಕೊಟ್ಟ ನಂತರ ಅದು ನನ್ನ ಮೂರನೇ ಚಿತ್ರವಾಗಿತ್ತು. ಆಗ, ನಟಿಸುವುದು ಬೇಡ ಎಂದು ದೃಢವಾಗಿ ನಿರ್ಧರಿಸಿದೆ. ನನಗ್ಯಾಕೋ ಸಿನಿಮಾ ಹೊಂದಾಣಿಕೆ ಆಗ್ತಿಲ್ಲ ಎನಿಸಿತು. ಹೀಗಾಗಿ, ಮುಂಬರುವ ದಿನಗಳಲ್ಲಿ ನಟಿಸುವ ಕಾಯಕ ನನ್ನದಲ್ಲ. ಇದನ್ನು ಇಲ್ಲಿಗೆ ನಿಲ್ಲಿಸಿ ಬಿಡೋಣ ಎಂದು ಮೂರಕ್ಕೆ ಮುಕ್ತಾಯ ಎನ್ನುವಂತೆ ಮೂರನೇ ಸಿನಿಮಾಗೆ ಗುಡ್ಬೈ ಹೇಳಲು ಸಿದ್ಧವಾಗಿದ್ದೆ. ಆಗ, ನನ್ನ ನಿರ್ಧಾರ ಬದಲಾಯಿಸಿದ್ದೇ ಶಾರೂಖ್ ಖಾನ್" ಎಂದರು.
