ಭಾರತದ ಕೃಷಿ ವಲಯವನ್ನೂ ಒಳಗೊಂಡು ದೇಶದ ಆರ್ಥಿಕತೆಯ ಮೇಲೆ ಮುಂಗಾರು ಮತ್ತು ಹಿಂಗಾರು ಭಾರಿ ಪ್ರಭಾವ ಹೊಂದಿವೆ. ಮಳೆಯಾಶ್ರಿತ ಬೆಳೆಗಳು, ಜಲಾಶಯ, ಕುಡಿಯುವ ನೀರು ಮತ್ತು ಜಲವಿದ್ಯುತ್ ಕ್ಷೇತ್ರವು ಹೆಚ್ಚಾಗಿ ಮುಂಗಾರನ್ನೇ ಅವಲಂಬಿಸಿವೆ. ದೇಶದ 42ರಷ್ಟು ಜನಸಂಖ್ಯೆ ಕೃಷಿ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಹಾಗೂ ದೇಶದ ಜಿಡಿಪಿಯ ಶೇಕಡ 18.2ರಷ್ಟು ಗಾತ್ರವನ್ನು ಕೃಷಿ ವಲಯ ಹೊಂದಿದೆ. ಹೀಗಾಗಿ, ಹವಾಮಾನದ ನಿಖರ ಮಾಹಿತಿ ದೊರೆತರೆ ಅದರಿಂದ ದೇಶದ ಹಲವು ವಲಯಗಳಿಗೆ ಅನುಕೂಲ. ಮಳೆಯ ಪ್ರಮಾಣ, ಎಷ್ಟು ದಿನಗಳ ಕಾಲ ಸುರಿಯಲಿದೆ, ವಾಡಿಕೆಗಿಂತ ಅಧಿಕ ಅಥವಾ ಕಡಿಮೆ ಮಳೆ, ಗಾಳಿಯ ವೇಗದ ಮಾಹಿತಿಯ ಜತೆಗೆ ಚಂಡಮಾರುತ, ಅಕಾಲಿಕ ಮಳೆ, ಬಿರುಗಾಳಿಯ ಪೂರ್ವ ಸೂಚನೆಗಳು ದೊರೆತರೆ ಹಾನಿಯ ಪ್ರಮಾಣವನ್ನು ತಗ್ಗಿಸಲು ಸಾಧ್ಯ ಮತ್ತು ಇಂಥ ಪರಿಸ್ಥಿತಿಗಳನ್ನು ಪರಿಣಾಮಕಾರಿಯಾಗಿ ಎದುರಿಸಲು ಸ್ಥಳೀಯಾಡಳಿತ ಮತ್ತು ಸರ್ಕಾರ ಸರ್ವರೀತಿಯಿಂದಲೂ ಸನ್ನದ್ಧವಾಗಲು ಪೂರಕವಾಗುತ್ತದೆ.
