ಆಪರೇಷನ್​ ಮಾಡಿಸಿಕೊಳ್ಳಲು ಬಂದ ಮಹಿಳೆಯ ಮೇಲೆ ಗ್ಯಾಂಗ್​ರೇಪ್​ ನಡೆಸಿದ ಡಾಕ್ಟರ್​!

ಮೀರತ್​: ಆಪರೇಷನ್​ ಮಾಡಿಸಿಕೊಳ್ಳಲೆಂದು ಒಂದು ಜಿಲ್ಲೆಯಿಂದ ಮತ್ತೊಂದು ಜಿಲ್ಲೆಗೆ ಬಂದಿದ್ದ ಮಹಿಳೆಯ ಮೇಲೆ ವೈದ್ಯನೇ ಗ್ಯಾಂಗ್​ ರೇಪ್​ ನಡೆಸಿರುವ ಘಟನೆ ಉತ್ತರ ಪ್ರದೇಶದ ಮೀರತ್​ ಜಿಲ್ಲೆಯಲ್ಲಿ ನಡೆದಿದೆ. ಸಂತ್ರಸ್ತ ಮಹಿಳೆ ಇದೀಗ ಪೊಲೀಸ್ ವರಿಷ್ಠಾಧಿಕಾರಿಯ ಬಳಿ ದೂರು ದಾಖಲಿಸಿದ್ದಾಳೆ.

ಗಾಜಿಯಾಬಾದ್​ನ ಮೋದಿನಗರದ ಮಹಿಳೆ ತನ್ನ ನಾಲ್ಕು ವರ್ಷದ ಮಗಳೊಂದಿಗೆ ಮೀರತ್​ಗೆ ಬಂದಿದ್ದಳು. ಅಂಡಾಶಯದಲ್ಲಿ ಸಮಸ್ಯೆಯಿದ್ದಿದ್ದರಿಂದಾಗಿ ಅದರ ಆಪರೇಷನ್​ ಮಾಡಿಸುವ ಸಲುವಾಗಿ ಆಕೆ ಬಂದಿದ್ದಳು. ಮೀರತ್​ನಲ್ಲಿದ್ದ ಸ್ನೇಹಿತೆಯ ಮನೆಗೆ ಬಂದ ಮಹಿಳೆ, ವೈದ್ಯರನ್ನು ಸಂಪರ್ಕಿಸಿದ್ದಾಳೆ. ವೈದ್ಯರು ಭೇಟಿಯಾಗುವಂತೆ ತಿಳಿಸಿದ್ದಾರೆ. ಮಗಳನ್ನು ಸ್ನೇಹಿತೆಯ ಮನೆಯಲ್ಲೇ ಬಿಟ್ಟು, ವೈದ್ಯರನ್ನು ಭೇಟಿಯಾಗಲು ಆಕೆ ಮುಂದಾಗಿದ್ದಾಳೆ.

ಆರೋಪಿ ವೈದ್ಯ ಮಹಿಳೆಯನ್ನು ಕಾರಿನಲ್ಲಿ ಕೂರಿಸಿಕೊಂಡಿದ್ದಾನೆ. ಜ್ಯೂಸ್​ ಕುಡಿಯಿರಿ ಎಂದು ಜ್ಯೂಸ್​ ಕೊಡಿಸಿದ್ದಾನೆ. ಜ್ಯೂಸ್​ನಲ್ಲಿ ಮತ್ತು ಬರುವ ಔಷಧ ಹಾಕಿದ್ದರ ಪರಿಣಾಮ ಮಹಿಳೆ ಅಲ್ಲೇ ಮೂರ್ಛೆ ಹೋಗಿದ್ದಾಳೆ. ಅದಾದ ನಂತರ ಆಕೆಯನ್ನು ಯಾವುದೋ ಒಂದು ಮನೆಗೆ ಕರೆದುಕೊಂಡು ಹೋಗಿ ಸ್ನೇಹಿತರ ಜತೆ ಸೇರಿ ಗ್ಯಾಂಗ್​ ರೇಪ್​ ಮಾಡಿದ್ದಾನೆ. ಈ ವಿಚಾರವನ್ನು ಯಾರಿಗಾದರೂ ಹೇಳಿದರೆ ಪರಿಸ್ಥಿತಿ ನೆಟ್ಟಗಿರುವುದಿಲ್ಲ ಎಂದು ಬೆದರಿಸಿದ್ದಾನೆ.

ಮಹಿಳೆ ಈ ಕುರಿತಾಗಿ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಿಸಿದ್ದಾಳೆ. ಆದರೆ ಪೊಲೀಸರು ಯಾವುದೇ ಕ್ರಮ ತೆಗೆದುಕೊಂಡಿಲ್ಲ. ಆ ಕಾರಣದಿಂದಾಗಿ ಆಕೆ ನೇರವಾಗಿ ಪೊಲೀಸ್ ವರಿಷ್ಠಾಧಿಕಾರಿಯ ಬಳಿ ತೆರಳಿ ದೂರು ದಾಖಲಿಸಿದ್ದಾಳೆ. ಇದೀಗ ವೈದ್ಯ ಮತ್ತು ಆತನ ಇಬ್ಬರು ಸ್ನೇಹಿತರ ವಿರುದ್ಧ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಮಹಿಳೆಯ ವೈದ್ಯಕೀಯ ಪರೀಕ್ಷೆ ಮಾಡಲಾಗಿದೆ. ಪರೀಕ್ಷೆಯ ವರದಿಯ ನಂತರ ಹೆಚ್ಚಿನ ತನಿಖೆ ನಡೆಸುವುದಾಗಿ ತಿಳಿಸಲಾಗಿದೆ. (ಏಜೆನ್ಸೀಸ್​)

https://www.vijayavani.net/us-technician-watches-private-videos-in-cctv/

https://www.vijayavani.net/sl-dharmegowda-death-note/