ಓರ್ವ ಮಹಿಳೆಗೆ ಬಾಲ್ಯದಲ್ಲಿ ಹೆತ್ತವರ, ಯೌವನದಲ್ಲಿ ಗಂಡನ, ಮತ್ತು ವೃದ್ಧಾಪ್ಯದಲ್ಲಿ ಮಗನ ಆಸರೆ ಅವಶ್ಯವೆಂಬುದು ನಿಮಗೆ ತಿಳಿಯದೇ? ಗಂಡ ಇಲ್ಲವಾದರೆ, ನೀವು ಮರುಮದುವೆ ಮಾಡಿಕೊಳ್ಳಬಹುದು. ಆದರೆ ಹೆತ್ತವರನ್ನು, ಮಗನನ್ನು ಕಳೆದುಕೊಂಡರೆ ಮರಳಿ ಪಡೆಯಲಾದೀತೇ? ಎಂಬ ಪ್ರಶ್ನೆಗಳನ್ನು ಅವಳ ಮುಂದಿಡುತ್ತಾರೆ. ಮಹಿಳೆಯ ಉತ್ತರಕ್ಕಾಗಿ ಇಡೀ ಸಭೆ ಉಸಿರು ಬಿಡದೇ ಕಾಯುತ್ತಿತ್ತು. ಕಣ್ಣೀರು ಒರೆಸಿಕೊಂಡು, ಆಕೆ ಶಾಂತಳಾಗಿ ಹೇಳಿದಳು. ‘ಸರ್, ವಯಸ್ಸಾದ ಹೆತ್ತವರು ಒಂದಲ್ಲ ಒಂದು ದಿನ ನಮ್ಮನ್ನು ಅಗಲಿ, ಇಹಲೋಕ ತ್ಯಜಿಸಲಿರುವವರೇ. ಮತ್ತೆ ಕೊಂಬೆಗಳು ಮರದ ಕಾಂಡದಿಂದ ದೂರವಾಗುವ ರೀತಿಯಲ್ಲಿ ದೊಡ್ಡವರಾದಂತೆ, ಮಕ್ಕಳು ಕೂಡಾ ನಾನಾ ಕಾರಣಗಳಿಂದ ನಮ್ಮನ್ನು ತೊರೆದು ಹೋಗುವವರೇ’.
