ಒಬ್ಬರಿನ್ನೊಬ್ಬರಲ್ಲಿ ತಪ್ಪುಗಳನ್ನು ಕೊರತೆಗಳನ್ನು ಕಾಣಲಾರಂಭಿಸಿದರು. ಒಂದೇ ತಾಯಿಯ ಮಕ್ಕಳಾಗಿ ಹುಟ್ಟಿ, ಒಂದೇ ಪರಿಸರದಲ್ಲಿ ಬೆಳೆದ ಅಣ್ಣ ತಮ್ಮ, ಅಕ್ಕ-ತಂಗಿಯರ ನಡುವೆಯೇ ವ್ಯತ್ಯಾಸಗಳಿರುವಾಗ, ಭಿನ್ನ ಭಿನ್ನ ಕೌಟುಂಬಿಕ, ಸಾಂಸ್ಕೃತಿಕ, ಸಾಮಾಜಿಕ ಹಿನ್ನೆಲೆಯಿಂದ, ಗಂಡ ಹೆಂಡತಿಯರ ರೂಪದಲ್ಲಿ ಒಂದಾದ ದಂಪತಿಗಳ ನಡುವೆ ಏನೇನೂ ಭಿನ್ನಾಭಿಪ್ರಾಯವಿಲ್ಲದಿರಲು ಹೇಗೆ ಸಾಧ್ಯ? ಸಹಜವಾಗಿ ಭಿನ್ನಾಭಿಪ್ರಾಯಗಳು ಆಗಾಗ ಚರ್ಚೆ, ವಾಗ್ವಾದಗಳ ರೂಪವನ್ನು ಪಡೆಯಲಾರಂಭಿಸಿದುವು. ಇದು ತೀವ್ರ ಸ್ವರೂಪವನ್ನು ಪಡೆದಾಗ, ಗಂಡ ಹೆಂಡತಿಯರ ನಡುವೆ ಮಾತುಕತೆಯೇ ನಿಂತುಹೋಯಿತು. ಮಕ್ಕಳು ಇಲ್ಲವೇ ಕೆಲಸದವರ ಮೂಲಕವೇ ಸಂಭಾಷಣೆ ನಡೆಯಲಾರಂಭಿಸಿದುವು. ಇದನ್ನು ಬಗೆಹರಿಸಿಕೊಳ್ಳುವ, ಪರಿಹರಿಸಿಕೊಳ್ಳುವ ಜಾಣ್ಮೆಯಾಗಲೀ, ತಾಳ್ಮೆಯಾಗಲೀ ಇಬ್ಬರಲ್ಲೂ ಇಲ್ಲವಾಯಿತು.
