ಬಿಲ್ಡಿಂಗ್​ ಮೇಲಿಂದ ಮಹಿಳೆ ಮೇಲೆ ಬಿದ್ದ ವಾಟರ್​ ಟ್ಯಾಂಕ್​! ಸಣ್ಣ ಗಾಯವೂ ಆಗದೇ ಬಚಾವ್​ ಆಗಿದ್ದೇ ರೋಚಕ | Water Tank

Water Tank Falls On Women: ಅದೃಷ್ಟ ಚೆನ್ನಾಗಿದ್ದರೆ ಸಾವನ್ನು ಕೂಡ ಗೆಲ್ಲಬಹುದು ಅನ್ನೋ ಮಾತಿದೆ. ಎಂಥದ್ದೇ ದೊಡ್ಡ ಅಪಾಯದಿಂದಲೂ ಪಾರಾಗಬಹುದು. ಇಲ್ಲೊಬ್ಬ ಮಹಿಳೆಯ ವಿಚಾರದಲ್ಲೂ ನಡೆದಿದ್ದು ಅದೇ. ಬೀದಿಯಲ್ಲಿ ನಡೆದುಕೊಂಡು ಹೋಗುತ್ತಿರುವಾಗ ಮಹಿಳೆ ( Woman ) ಯ ಮೇಲೆ ಒಂದು ದೊಡ್ಡ ನೀರಿನ ಟ್ಯಾಂಕ್ ( Water Tank ) ಬೀಳುತ್ತಿದೆ. ಆದರೆ, ಅದೃಷ್ಟವಶಾತ್ ಆಕೆಗೆ ಯಾವುದೇ ಹಾನಿಯಾಗಿಲ್ಲ. ಇಷ್ಟು ದೊಡ್ಡ ಟ್ಯಾಂಕ್​ ಬಿದ್ದರೂ ಮಹಿಳೆಯ ಮೈಮೇಲೆ ಒಂದು ಸಣ್ಣ ಗೀರು ಕೂಡ ಬೀಳದಿರುವುದು ಗಮನಾರ್ಹ. ಅಂದಹಾಗೆ ಈ ಘಟನೆ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಇತ್ತೀಚೆಗೆ ನಡೆದಿದೆ.

ವಿಡಿಯೋದಲ್ಲಿ ಏನಿದೆ?

ಮಹಿಳೆಯೊಬ್ಬಳು ತನ್ನ ಮನೆಯ ಮುಂದೆ ಇನ್ನೊಬ್ಬ ಮಹಿಳೆಯೊಂದಿಗೆ ಮಾತನಾಡಿದ ಬಳಿಕ ತನ್ನ ಮನೆಗೆ ಹಿಂದಿರುಗುತ್ತಾಳೆ. ಈ ವೇಳೆ ಆಕೆ ಸೇಬನ್ನು ತಿನ್ನುತ್ತಾ ತನ್ನ ಮನೆಯತ್ತ ಹೆಜ್ಜೆ ಹಾಕಿದಾಗ ಏಕಾಏಕಿ ಬೃಹತ್ ನೀರಿನ ಟ್ಯಾಂಕ್ ಆಕೆಯ ಮೇಲೆ ರಪ್​ ಅಂತ ಬೀಳುತ್ತದೆ. ಮನುಷ್ಯ ಎತ್ತರದ ಟ್ಯಾಂಕ್​ ಒಳಗೆ ಆ ಮಹಿಳೆ ಸಿಲುಕಿಕೊಳ್ಳುತ್ತಾಳೆ. ಆದರೆ, ಟ್ಯಾಂಕ್​ನ ಕೆಳಭಾಗದಲ್ಲಿ ರಂಧ್ರವಿದ್ದ ಕಾರಣ ಆ ಮಹಿಳೆ ಪವಾಡವೆಂಬಂತೆ ಬದುಕುಳಿಯುತ್ತಾಳೆ. ಟ್ಯಾಂಕರ್​ನ ಕೆಳಭಾಗದಲ್ಲಿರುವ ರಂಧ್ರದ ಮಧ್ಯದಲ್ಲಿ ಆ ಮಹಿಳೆ ಸರಿಯಾಗಿ ಸಿಲುಕಿಕೊಳ್ಳುತ್ತಾಳೆ. ಇದರಿಂದ ಆ ಮಹಿಳೆಗೆ ಯಾವುದೇ ಗಾಯವಾಗಿಲ್ಲ. ಈ ಘಟನೆಯನ್ನು ನೋಡಿದ ಎರಡ್ಮೂರು ಜನರು ಮಹಿಳೆಯ ಬಳಿಗೆ ಓಡಿ ಬರುತ್ತಾರೆ. ನೀರಿನ ಟ್ಯಾಂಕರ್​ ಮಾಲೀಕರ ವಿರುದ್ಧ ಅಸಮಾಧಾನ ಹೊರಹಾಕುತ್ತಾರೆ. ಇದಿಷ್ಟು ದೃಶ್ಯ ವಿಡಿಯೋದಲ್ಲಿದೆ.

ಇದನ್ನೂ ಓದಿ: ಇದೊಂದು ಘಟನೆ ಸಾಕು ಅವರ ಮಾನವೀಯ ಗುಣ ತಿಳಿಯಲು: ರತನ್​ ಟಾಟಾ ಬಗ್ಗೆ ಚಂದ್ರಶೇಖರನ್ ಮನದಾಳ | Memorable Moments

ಸದ್ಯ 22 ಸೆಕೆಂಡ್​ ಉದ್ದದ ವಿಡಿಯೋ ತುಣುಕನ್ನು ಹೇಮಂತ್​ ಬಾತ್ರಾ ಹೆಸರಿನ ಎಕ್ಸ್​ ಬಳಕೆದಾರ ಹಂಚಿಕೊಂಡಿದ್ದು, ಪ್ರತಿದಿನ ಒಂದು ಸೇಬು ತಿನ್ನುವುದರಿಂದ ವೈದ್ಯರಿಂದ ದೂರ ಇರಬಹುದು ಎಂದು ಮಾರ್ಮಿಕವಾಗಿ ಬರೆದುಕೊಂಡಿದ್ದಾರೆ. ಸದ್ಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ವಿಡಿಯೋಗೆ ಲೈಕ್‌ಗಳು ಮತ್ತು ಕಾಮೆಂಟ್‌ಗಳ ಮಹಾಪೂರವೇ ಹರಿದು ಬರುತ್ತಿದೆ. ಈವರೆಗೂ ಈ ವಿಡಿಯೋವನ್ನು 5 ಮಿಲಿಯನ್​ಗೂ ಅಧಿಕ ಮಂದಿ ವೀಕ್ಷಣೆ ಮಾಡಿದ್ದಾರೆ. (ಏಜೆನ್ಸೀಸ್​)

https://www.vijayavani.net/why-kichcha-sudeepa-suddenly-say-goodbye-to-bigg-boss-show-a-shocking-fact-is-revealed

https://www.vijayavani.net/mukesh-ambani-family-live-on-this-floor-of-the-27-storey-mansion-because-a-belief