ಪತಂಜಲಿ ಮಹರ್ಷಿಗಳು ಅಷ್ಟಾಂಗ ಯೋಗದಲ್ಲಿ ಬರುವ ನಿಯಮದಲ್ಲಿ ತಪಸ್ಸಿನ ಪ್ರತಿಪಾದನೆಯನ್ನು ಮಾಡಿದ್ದಾರೆ. ‘ಶ್ರೀ ಸಿದ್ಧಾಂತ ಶಿಖಾಮಣಿ’ಯಲ್ಲಿ ‘ತಪೋ ಹಿ ಮೂಲಂ ಸರ್ವಾಸಾಂ ಸಿದ್ಧೀನಾಂ ಯಜ್ಜಗತ್ತ್ರಯೇ| ತಪಸ್ತತ್ ಕಾಯಮೂಲಂ ಹಿ ತಸ್ಮಾತ್ ಕಾಯಂ ನ ಸಂತ್ಯಜೇತ್ ||- ಅಂದರೆ ಎಲ್ಲ ಸಿದ್ದಿಗಳಿಗೆ ತಪಸ್ಸೇ ಮೂಲವಾದುದು, ಈ ತಪಸ್ಸು ಆಚರಿಸಲು ಶರೀರವೇ ಮುಖ್ಯ ಸಾಧನ. ಆದ್ದರಿಂದ ಶರೀರವನ್ನು ಸರಿಯಾಗಿಟ್ಟುಕೊಂಡು ತಪಸ್ಸನ್ನು ಆಚರಿಸಿ ಆರೋಗ್ಯ, ಸದ್ಗತಿ ಪಡೆಯಬಹುದು ಎಂದಿದೆ. ತಪಸ್ಸಿಗೆ ಅಸಾಧ್ಯವಾದದ್ದು ಯಾವುದೂ ಇಲ್ಲ. ದೇವರ ಪೂಜೆ, ಗುರುಸೇವೆ, ಜ್ಞಾನಿಗಳ ಅರ್ಚನೆ, ಶರೀರ ಶುದ್ಧಿ, ಸರಳವಾದ ವರ್ತನೆ ಇವು ಶಾರೀರಿಕ ತಪಸ್ಸುಗಳು.
