ಬಾಹ್ಯಾಕಾಶದಲ್ಲಿ ಮೊಳಕೆಯೊಡೆದ ಅಲಸಂದೆ ಬೀಜ! ಇಸ್ರೋದ ಮಹತ್ವದ ಸಾಧನೆ

ನವದೆಹಲಿ: ಬಾಹ್ಯಾಕಾಶದಲ್ಲಿ ಅಲಸಂದೆ ಬೀಜ ಮೊಳಕೆಯೊಡೆಯುವಂತೆ ಮಾಡುವ ಮೂಲಕ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಮಹತ್ವದ ಸಾಧನೆ ಮಾಡಿದ್ದು, ಹೊಸ ವರ್ಷಾರಂಭದಲ್ಲೇ ಈ ಸಿಹಿ ಸುದ್ದಿ ನೀಡಿದೆ. ಅಲಸಂದೆ ಬೀಜ ಮೊಳಕೆ ಯೊಡೆಯುವಂತೆ ಮಾಡಿದ ಸಾಧನೆಯ ಈ ಪ್ರಯೋಗ, ಕಡಿಮೆ ಗುರುತ್ವದಲ್ಲಿ ಸಸ್ಯಗಳನ್ನು ಬೆಳೆಸುವುದನ್ನು ಅರ್ಥಮಾಡಿಕೊಳ್ಳಲು ವಿಜ್ಞಾನಿಗಳಿಗೆ ನೆರವಾಗಲಿದೆ. ಅದು ಸುದೀರ್ಘ ಬಾಹ್ಯಾಕಾಶ ಮಿಷನ್​ಗಳಲ್ಲಿ ಬಹಳಷ್ಟು ಸಹಾಯಕವಾಗಲಿದೆ. ಮೊಳಕೆಯೊಡೆದ ಅಲಸಂದೆ ಬೀಜದಿಂದ ಶೀಘ್ರವೇ ಎಲೆಯೂ ಬೆಳೆಯಲಿದೆ ಎಂದು ವಿಜ್ಞಾನಿಗಳು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಸಾಮಾಜಿಕ ಮಾಧ್ಯಮ ಎಕ್ಸ್ ಪೋಸ್ಟ್​ನಲ್ಲಿ ಇಸ್ರೋ ಈ ಮಹತ್ವದ ಬಾಹ್ಯಾಕಾಶ ಸಾಧನೆಯನ್ನು ಹಂಚಿಕೊಂಡಿದೆ. ‘ಬಾಹ್ಯಾಕಾಶದಲ್ಲಿ ಜೀವ ಆರಂಭವಾಗಿದೆ! ವಿಎಸ್​ಎಸ್​ಸಿಯ ಸಿಆರ್​ಒಪಿಎಸ್ (ಕಾಂಪ್ಯಾಕ್ಟ್ ರೀಸರ್ಚ್ ಮಾಡ್ಯೂಲ್ ಫಾರ್ ಆರ್ಬಿಟಲ್ ಪ್ಲಾಂಟ್ ಸ್ಟಡೀಸ್-ಕ್ರಾಪ್ಸ್) ಪ್ರಯೋಗವನ್ನು ಪಿಎಸ್​ಎಲ್​ವಿ-ಸಿ60 ಪೋಯಮ್4ನಲ್ಲಿ ಯಶಸ್ವಿಯಾಗಿ ನಡೆಸಲಾಗಿದೆ. ಅಲಸಂದೆ ಬೀಜ ನಾಲ್ಕೇ ದಿನದಲ್ಲಿ ಮೊಳಕೆಯೊಡೆದಿದ್ದು ಶೀಘ್ರವೇ ಎಲೆಯೂ ಬರಬಹುದೆಂಬ ನಿರೀಕ್ಷೆಯಿದೆ’ ಎಂದು ಇಸ್ರೋ ವಿವರಿಸಿದೆ.

ಬೀಜ ಕಳಿಸಿದ್ದು ಯಾವಾಗ?

ಪಿಎಸ್​ಎಲ್​ವಿ-ಸಿ60 ರಾಕೆಟ್​ನೊಂದಿಗೆ ಸ್ಪೇಡ್ ಎಕ್ಸ್ ಮಿಷನ್​ನಲ್ಲಿ 2024 ಡಿಸೆಂಬರ್ 30ರಂದು ಈ ಅಲಸಂದೆ ಬೀಜಗಳನ್ನು ಬಾಹ್ಯಾಕಾಶಕ್ಕೆ ಕಳಿಸಲಾಗಿತ್ತು ಎಂದು ಇಸ್ರೋ ತಿಳಿಸಿದೆ.

8 ಅಲಸಂದೆ ಬೀಜಗಳು

ಸಕ್ರಿಯ ಉಷ್ಣ (ಥರ್ಮಲ್) ನಿಯಂತ್ರಣದಲ್ಲಿ ನಿಯಂತ್ರಿತ ವಾತಾವರಣದಲ್ಲಿ 8 ಅಲಸಂದೆ ಬೀಜ ಹಾಕಲಾಗಿತ್ತು. ಇದು ಭಾರತದ ಬಾಹ್ಯಾಕಾಶ ಜೀವಶಾಸ್ತ್ರ ಸಂಶೋಧನೆಯಲ್ಲಿ ಮೈಲಿಗಲ್ಲಾಗಿದೆ. ಭಾರತದ ಸಾಮರ್ಥ್ಯವನ್ನು ಜಾಗತಿಕ ಮಟ್ಟದಲ್ಲಿ ಪ್ರದರ್ಶಿಸುತ್ತದೆ.

ಯಾಕೆ ಮಹತ್ವದ್ದು?

ವಿಕ್ರಂ ಸಾರಾಭಾಯ್ ಬಾಹ್ಯಾಕಾಶ ಕೇಂದ್ರ ಅಭಿವೃದ್ಧಿಪಡಿಸಿದ ‘ಕ್ರಾಪ್ಸ್’, ಸೂಕ್ಷ್ಮ ಗುರುತ್ವದಲ್ಲಿ ಸಸ್ಯಗಳ ಬೆಳವಣಿಗೆಯ ಅಧ್ಯಯನವನ್ನು ಮುಂದಕ್ಕೊಯ್ಯುವಲ್ಲಿ ಒಂದು ಮಹತ್ವದ ಹೆಜ್ಜೆಯಾಗಿದೆ. ಪಿಎಸ್​ಎಲ್​ವಿ-ಸಿ60 ಮಿಷನ್​ನ ಪೋಯಮ್4 ವೇದಿಕೆಯಲ್ಲಿ ಈ ಪ್ರಯೋಗ ನಡೆಸಲಾಗಿತ್ತು. ಬಾಹ್ಯಾಕಾಶದಲ್ಲಿ ಸಸ್ಯಗಳು ಹೇಗೆ ಬೆಳೆಯುತ್ತವೆ ಎನ್ನುವುದನ್ನು ಅರ್ಥಮಾಡಿಕೊಳ್ಳುವುದು ಕ್ರಾಪ್ಸ್ ಗುರಿಯಾಗಿದೆ. ಭವಿಷ್ಯದ ಸುದೀರ್ಘ-ಬಾಹ್ಯಾಕಾಶ ಕಾರ್ಯಾಚರಣೆಗಳಲ್ಲಿ ಸಸ್ಯಗಳನ್ನು ಬೆಳೆಸುವಲ್ಲಿ ಮಹತ್ವದ್ದಾಗಲಿದೆ.

https://www.vijayavani.net/if-you-are-genius-solve-this-brain-teaser-puzzle