ಪದವಿ ವ್ಯಾಸಂಗ ಮಾಡುವಾಗಲೇ ಎ.ಎನ್.ನಟರಾಜ್ ಗೌಡ ಅವರು ಕಾಲೇಜಿನ ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿ ಕ್ರಿಯಾಶೀಲರಾಗಿದ್ದರು. ಜತೆಗೆ ರಕ್ತದಾನ ಶಿಬಿರ, ಕ್ರೀಡಾ ಸ್ಪರ್ಧೆ, ಪ್ರಬಂಧ ಸ್ಪರ್ಧೆ, ಆಶುಭಾಷಣ ಸೇರಿ ಕಾಲೇಜಿನಲ್ಲಿ ಆಯೋಜಿಸುತ್ತಿದ್ದ ವಿವಿಧ ಅಂತರ ಕಾಲೇಜು ಸ್ಪರ್ಧೆಗಳ ನೇತೃತ್ವ ವಹಿಸುತ್ತಿದ್ದರು. ಇದು ಅವರಿಗೆ ರಾಜಕೀಯ ನಂಟು ಬೆಳೆಯಲು ಸೇತುವೆ ಕಲ್ಪಿಸಿತು. ಹಾಗಾಗಿ ವಿದ್ಯಾರ್ಥಿದಿಸೆಯಲ್ಲಿರುವಾಗಲೇ 1998-99ರಲ್ಲಿ ವಿದ್ಯಾರ್ಥಿ ಕಾಂಗ್ರೆಸ್ ಸದಸ್ಯನಾಗುವ ಮೂಲಕ ರಾಜಕೀಯ ಪ್ರವೇಶವಾಯಿತು. ನಂತರದಲ್ಲಿ ಪಕ್ಷದಲ್ಲಿ ಸಕ್ರಿಯರಾಗಿ ತೊಡಗಿಸಿಕೊಂಡ ನಟರಾಜ್ ಗೌಡರು 2008ರಲ್ಲಿ ಯುವ ಕಾಂಗ್ರೆಸ್, ನಂತರ ಜಿಲ್ಲಾ ಕಾಂಗ್ರೆಸ್, ಬಳಿಕ ರಾಜ್ಯಮಟ್ಟದ ಕಾಂಗ್ರೆಸ್ನ ಕಾರ್ಯದರ್ಶಿ, ಪ್ರಧಾನ ಕಾರ್ಯದರ್ಶಿಯಾಗಿ, ಆ ನಂತರ ಪಕ್ಷದ ಮಾಧ್ಯಮ ವಿಭಾಗದ ಸಂಚಾಲಕರಾಗಿ, ಪಕ್ಷದ ಸಾಮಾಜಿಕ ಜಾಲತಾಣದ ಅಧ್ಯಕ್ಷರಾಗಿ, ಪ್ರಚಾರ ಸಮಿತಿ ರಾಜ್ಯ ಸಂಚಾಲಕರಾಗಿ ಕಾರ್ಯನಿರ್ವಹಿಸಿದರು. ಕಳೆದ 10 ವರ್ಷಗಳಿಂದ ಪಕ್ಷದ ಮುಖ್ಯ ವಕ್ತಾರರಾಗಿದ್ದು, ಹಿರಿಯ ನಾಯಕರ ನಿಕಟ ಒಡನಾಟ ಹೊಂದಿರುವ ನಟರಾಜ್ ಗೌಡ ಅವರು ಅನೇಕ ಸಾಮಾಜಿಕ ಸೇವಾ ಕಾರ್ಯಗಳಲ್ಲೂ ತೊಡಗಿಸಿಕೊಂಡಿದ್ದಾರೆ.
