ಅಯತ್ನವಾಗಿ ಆಗುತ್ತಿರುವ ಹಂಸಮಂತ್ರವು ಹೀಗೆ ತುಟಿಯ ಅಲ್ಲಾಡುವಿಕೆಯೆಂಬುದಿಲ್ಲದೆಯೂ ನಡೆಯುತ್ತಿರುತ್ತದೆ. ಅಲ್ಲದೆ, ಜಪಕ್ಕೆ ಅವಶ್ಯವಾದವು ಸಂಕಲ್ಪ ಹಾಗೂ ಜಪಸಂಖ್ಯಾಗಣನೆ. ಅವಿಲ್ಲದೆಯೂ ನಡೆಯುವುದೆಂಬ ಕಾರಣಕ್ಕಾಗಿಯೇ ಇದನ್ನು ಅಜಪಾ-ಜಪವೆನ್ನುವುದು ಎಂಬುದಾಗಿ ಶ್ರೀರಂಗಮಹಾಗುರುಗಳು ವಿವರಿಸಿದ್ದಾರೆ. ಇತ್ತ ಸಂಸ್ಕೃತದ ಸಂಧಿನಿಯಮವನ್ನು ಗಮನಿಸಿದರೆ ಹಂಸಃ ಹಂಸಃ ಹಂ... ಎಂಬುದು ಹಂಸೋಹಂಸೋಹಂ... ಎಂದಾಗುತ್ತದೆ. ಹೀಗಾಗಿ, ಹಂಸೋ, ಹಂಸೋ ಎನ್ನುತ್ತಿರುವುದು ಸೋಹಂ, ಸೋಹಂ ಎನ್ನುವಂತೆ(ಯೂ) ಕೇಳಿಸುತ್ತದೆ. ಸೇರಿಸಿದಾಗ ಹೀಗೆ ಕೇಳಿಸುವುದೇ, ಸೇರಿರುವುದನ್ನು ಬಿಡಿಸಿ ನೋಡಿದಾಗ ಮತ್ತೊಂದು ಬಗೆಯಾಗುವುದು! ಸೋಹಂ ಎನ್ನುವುದು ಸಃ ಅಹಂ ಎಂದಾಗುತ್ತದೆ. ಸಂಸ್ಕೃತದಲ್ಲಿ ಸಃ ಎಂದರೆ ಅವನು, ಅಹಂ ಎಂದರೆ ನಾನು. ಇವು ಕ್ರಮವಾಗಿ ದೇವ-ಜೀವರನ್ನು ಸೂಚಿಸುತ್ತವೆ.
