ಮುಂಬೈ: ನೌಕಾಪಡೆ ಸ್ಥಾಪಿಸಿದ್ದ ಶಿವಾಜಿ ಮಹಾರಾಜರ 35 ಅಡಿ ಎತ್ತರದ ಪ್ರತಿಮೆ ಸೋಮವಾರ ನೆಲಸಮವಾಗಿದ್ದು, ಅದೇ ಸ್ಥಳದಲ್ಲಿ ಅದಕ್ಕಿಂತ ದೊಡ್ಡ ಪ್ರತಿಮೆಯನ್ನು (ನೂರು ಅಡಿ) ಮಹಾರಾಷ್ಟ್ರ ಸರ್ಕಾರ ಪ್ರತಿಷ್ಠಾಪಿಸಲಿದೆ ಎಂದು ಉಪ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ತಿಳಿಸಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಸಿಂಧುದುರ್ಗದ ರಾಜಕೋಟ್ ಕೋಟೆ ಬಳಿ ಕಳೆದ ವರ್ಷ ನೌಕಾ ದಿನದಂದು (ಡಿ.4) ಶಿವಾಜಿ ಪ್ರತಿಮೆ ಅನಾವರಣಗೊಳಿಸಿದ್ದರು. ‘ಇದರ ಉಸ್ತುವಾರಿಯನ್ನು ನೌಕಾಪಡೆ ನೋಡಿಕೊಳ್ಳುತ್ತಿತ್ತು. ಬಹುಶಃ ಪ್ರತಿಮೆ ನಿರ್ವಿುಸುವವರು ಕಳಪೆ ಕಬ್ಬಿಣ ಬಳಸಿರಬಹುದು. ಈ ಭಾಗದಲ್ಲಿ ಗಾಳಿಯ ವೇಗ ಎಷ್ಟಿರುತ್ತದೆ ಎಂಬುದರ ಅಂದಾಜು ಅವರಿಗೆ ಇಲ್ಲದಿರ ಬಹುದು. ಸಮುದ್ರದ ಗಾಳಿಯಿಂದಾಗಿ ಕಬ್ಬಿಣಕ್ಕೆ ತುಕ್ಕು ಹಿಡಿದಿರಬಹುದು. ಪ್ರತಿಮೆ ನಿರ್ವಿುಸಿದವರು ಇದೆಲ್ಲವನ್ನೂ ಗಣನೆಗೆ ತೆಗೆದು ಕೊಂಡಿದ್ದರೋ ಇಲ್ಲವೋ ಗೊತ್ತಿಲ್ಲ. ಘಟನೆ ಬಗ್ಗೆ ತನಿಖೆ ನಡೆಯುತ್ತಿದೆ. ವಿರೋಧ ಪಕ್ಷಗಳು ಇದನ್ನು ಒಂದು ರಾಜಕೀಯ ವಿಷಯವನ್ನಾಗಿ ಮಾಡಬಾರದು’ ಎಂದು ಫಡ್ನವಿಸ್ ಸುದ್ದಿಗಾರರಿಗೆ ಹೇಳಿದರು.
