‘ಸಂಬಂಧಗಳು ಹೆಚ್ಚು ಸಂಕೀರ್ಣ, ವೈವಿಧ್ಯಮಯ ಮತ್ತು ಆಳವಾಗಿವೆ. ಎರಡೂ ಕಡೆಯಿಂದ ಸವಾಲುಗಳಿವೆ. ಅದನ್ನು ನಾವು ಹೇಗೆ ಎದುರಿಸುತ್ತೇವೆ ಎನ್ನುವುದು ಮುಖ್ಯ’ ಎಂದು ಅಮೆರಿಕದ ಹಿರಿಯ ಅಧಿಕಾರಿ ಪ್ರತಿಕ್ರಿಯಿಸಿದ್ದಾರೆ. ವಿದೇಶಾಂಗ ನೀತಿಯಲ್ಲಿ ಸ್ನೇಹಿತನಂತೆ ವರ್ತಿಸಿ, ದ್ವೇಷ ಸಾಧಿಸುವ ಮಾರ್ಗಕ್ಕೆ ಅವಕಾಶವೇ ಇಲ್ಲ. ಭಾರತದ ಜತೆ ಸ್ನೇಹಿತನಂತೆ ವರ್ತಿಸುತ್ತಲೇ ಅಮೆರಿಕ ಭಾರತದ ಹಿತಕ್ಕೆ ಮಾರಕವಾದ ಅನೇಕ ನೀತಿಗಳನ್ನು ಅನುಸರಿಸುತ್ತಲೇ ಬಂದಿದೆ ಎಂಬುದು ರಹಸ್ಯವೇನಲ್ಲ. ಬಾಂಗ್ಲಾದೇಶದಲ್ಲಿನ ಆಡಳಿತ ಬದಲಾವಣೆ, ಹಿಂಸೆಯ ಹಿಂದೆಯೂ ಅಮೆರಿಕದ ಕೈವಾಡವಿದೆ ಎಂಬುದು ಗೊತ್ತಿರುವಂಥದ್ದೇ. ಭ್ರಷ್ಟಾಚಾರ, ನಿರುದ್ಯೋಗ, ಬೆಲೆಯೇರಿಕೆಯಂಥ ಆಂತರಿಕ ಸಮಸ್ಯೆಗಳಿಂದ ಅಮೆರಿಕ ನಲಗುತ್ತಿರುವುದು ಆ ರಾಷ್ಟ್ರ ಸಂಕಷ್ಟದ ಹಾದಿಯಲ್ಲಿದೆ ಎಂಬುದಕ್ಕೆ ಸಾಕ್ಷಿ. ಹೀಗಾಗಿ ಟ್ರಂಪ್ ‘ಅಮೆರಿಕ ಮೊದಲು’ ನೀತಿಯನ್ನು ಅನುಸರಿಸುವುದು ತಪ್ಪಲ್ಲ. ಆದರೆ, ಆ ನಿಟ್ಟಿನಲ್ಲಿ ಸ್ನೇಹಿತ ರಾಷ್ಟ್ರಗಳಿಗೆ ದ್ರೋಹ ಬಗೆಯುವುದು ಅಥವಾ ಅವುಗಳೊಂದಿಗೆ ಕಠಿಣವಾಗಿ ನಡೆದುಕೊಳ್ಳುವುದು ಸೂಕ್ತವಲ್ಲ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ಶಕ್ತಿ, ವರ್ಚಸ್ಸು ಹೆಚ್ಚಾಗಿರುವುದರಿಂದಲೇ ಅಮೆರಿಕ ನಮ್ಮ ರಾಷ್ಟ್ರದತ್ತ ಸ್ನೇಹಹಸ್ತ ಚಾಚಿದೆ. ಈ ಸ್ನೇಹವನ್ನು ಪ್ರಾಮಾಣಿಕವಾಗಿ ಮುಂದುವರಿಸಿಕೊಂಡು ಹೋಗಬೇಕು. ವಿವಾದಗಳನ್ನು ಸೃಸ್ಟಿಸುವ ಬದಲು ರಾಜತಾಂತ್ರಿಕ ಸಹಕಾರ, ಸಂಬಂಧ ಹೊಸ ಎತ್ತರಕ್ಕೆ ತಲುಪಿದರೆ, ಅದರಿಂದ ಎರಡೂ ರಾಷ್ಟ್ರಗಳಿಗೆ ಹಿತ. ಈ ನಿಟ್ಟಿನಲ್ಲಿ ಮುಂಬರುವ ದಿನಗಳಲ್ಲಿ ಟ್ರಂಪ್ ಎಚ್ಚರಿಕೆಯ ಹೆಜ್ಜೆಗಳನ್ನು ಇರಿಸುವುದು ಅಗತ್ಯ.
