'ಚಕ್ಕಾ, ಕೋಜಾ, ಶಿಖಂಡ, ನಾಮರ್ದ, ಒಂಬತ್ತು ಎಂಬ ಪದಗಳು ನಮಗೆ ಬೇಡ. ನಮ್ಮನ್ನು ಹಾಗೆ ಕರೆಯಬೇಡಿ. ಜೋಗ್ತಾ, ಅಂತರ್ಲಿಂಗಿ, ಲಿಂಗತ್ವ ಅಲ್ಪಸಂಖ್ಯಾತರು, ಲೈಂಗಿಕ ಅಲ್ಪಸಂಖ್ಯಾತರು, ಲಿಂಗತ್ವ ಬದಲಾಯಿಸಿಕೊಂಡವರು ಎಂದು ಬಳಸಿ. ನಮಗೆ ಕೆಟ್ಟ ಪದಗಳನ್ನ ಬಳಕೆ ಮಾಡಬೇಡಿ' ಎಂದ ಅಕೈ ಪದ್ಮಶಾಲಿ ಅವರು, '2006ರಲ್ಲಿ ಚಂದ್ರಿಕಾ ಎಚ್ಐವಿ ಸೋಂಕಿನಿಂದ ಮೃತಪಟ್ಟಿದ್ದಳು. ಅಂದು ಅವಳ ಮೃತದೇಹವನ್ನ ಚಿತಾಗಾರಕ್ಕೆ ಸ್ಮಶಾನಕ್ಕೆ ಸುಡಲು ತೆಗೆದುಕೊಂಡು ಹೋದೆವು. ಆಗ ಚಂದ್ರಿಕಾ ಹೆಣ್ಣು ಅಥವಾ ಗಂಡು ಎಂದು ಚಿತಾಗಾರದವರು ಪ್ರಶ್ನಿಸಿದ್ರು. ಎರಡೂ ಅಲ್ಲ ಎಂದಿದ್ದಕ್ಕೆ ಇಲ್ಲಿ ದಫನ್ ಮಾಡೋಕೆ ಆಗಲ್ಲ ಅಂದು ಬಿಟ್ರು. ಪ್ರತಿಭಟನೆ ಮಾಡಿ ಅಂತ್ಯಸಂಸ್ಕಾರ ಮಾಡಿಸಿದ್ದಾಯ್ತು' ಎನ್ನುತ್ತಲೇ ಭಾವುಕರಾದರು. ಆ ಮೂಲಕ ಲೈಂಗಿಕ ಅಲ್ಪಸಂಖ್ಯಾತರು ಸತ್ತ ಮೇಲೂ ಈ ಸಮಾಜ ನೋಡುವ ಕೆಟ್ಟ ದೃಷ್ಟಿ ಬಗ್ಗೆ ವಿವರಿಸಿದರು. 'ನಾನು ಸತ್ತಾಗ ದೇಹವನ್ನ ಸುಡಬೇಡಿ. ನನ್ನ ದೇಹವನ್ನ ಬೆಂಗಳೂರು ಮೆಡಿಕಲ್ ಕಾಲೇಜಿಗೆ ದಾನ ಮಾಡಬೇಕು ಎಂದು ಹೀಗಾಗಲೇ ಬರೆದು ಕೊಟ್ಟಿದ್ದೇನೆ' ಎಂದರು.
