1. ವೈಯಕ್ತಿಕ ಭರವಸೆಯೇ ಅಸ್ತ್ರ: ಪಕ್ಷ ಪ್ರಣಾಳಿಕೆಯಲ್ಲಿ ಏನು ಭರವಸೆ ಕೊಟ್ಟಿದೆ, ಈ ಹಿಂದೆ ಯಾವುದನ್ನೆಲ್ಲ ಈಡೇರಿಸಿದೆ ಎಂದು ಸಾಮಾನ್ಯ ಜನ ಗಮನಿಸುವುದಿಲ್ಲ. ಕಾಲ ಬದಲಾಗಿದ್ದು, ವೈಯಕ್ತಿಕವಾಗಿ ತನಗೇನು ಲಾಭ ಎಂದು ಪ್ರತಿಯೊಬ್ಬರೂ ಯೋಚಿಸುತ್ತಾರೆ. ಈ ಲಹರಿ ಅರಿತು, ಸಂದರ್ಭಕ್ಕೆ ತಕ್ಕಂತೆ ಪಕ್ಷವು ಪ್ರಮುಖ ‘ಗ್ಯಾರಂಟಿ’ ವಾಗ್ದಾನ ಮಾಡಿದೆ. 200 ಯೂನಿಟ್ ಉಚಿತ ವಿದ್ಯುತ್, ಮನೆಯ ಯಜಮಾನಿಗೆ ಮಾಸಿಕ ಎರಡು ಸಾವಿರ, ರೈತರ ಸಾಲ ನೀಡಿಕೆ ಪ್ರಮಾಣ ಹೆಚ್ಚಳ ಸೇರಿ ಪ್ರದೇಶವಾರು ವಾಗ್ದಾನ ಮಾಡಿಕೊಂಡು ಬರಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಇನ್ನೂ ಕೆಲವು ಮಹತ್ವದ ವಾಗ್ದಾನ ನೀಡುವುದು ಬಾಕಿ ಇದೆ. ಪಕ್ಷ ನೀಡಿದ ಈ ಗ್ಯಾರಂಟಿಗಳನ್ನು ಪಟ್ಟಿ ಮಾಡಿ, ಒಂದು ಕೋಟಿ ಕಾರ್ಡ್ ಮಾಡಿ ಮನೆ ಮನೆಗೆ ಹಂಚಲಾಗುತ್ತದೆ. ಗ್ಯಾರಂಟಿ ಕಾರ್ಡ್ನಲ್ಲಿ ಡಿ.ಕೆ.ಶಿವಕುಮಾರ್ ಹಾಗೂ ಸಿದ್ದರಾಮಯ್ಯರ ಸಹಿಯೂ ಇರಲಿದೆ.
