ಸುಮಾರು 5,500 ವಿದ್ಯಾರ್ಥಿಗಳಿಗೆ ಸಿಹಿಸುದ್ದಿ ಕೊಟ್ಟರು ಮೋದಿ: ಸ್ನಾತಕ-ಸ್ನಾತಕೋತ್ತರ ವ್ಯಾಸಂಗಕ್ಕಾಗಿ ಮೀಸಲಾತಿ

ನವದೆಹಲಿ: ದೇಶದ ಸುಮಾರು 5,500 ವಿದ್ಯಾರ್ಥಿಗಳಿಗೆ ಅನುಕೂಲವಾಗುವಂಥ ಸಿಹಿಸುದ್ದಿಯೊಂದನ್ನು ಪ್ರಧಾನಿ ನರೇಂದ್ರ ಮೋದಿ ಅವರು ನೀಡಿದ್ದಾರೆ. ಪ್ರಧಾನಿ ಮೋದಿ ಅವರ ಸೂಚನೆ ಮೇರೆಗೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ಇಂಥದ್ದೊಂದು ನಿರ್ಧಾರವನ್ನು ಪ್ರಕಟಿಸಿದೆ.

ಹೊಸ ಆದೇಶದ ಪ್ರಕಾರ ಆಲ್​ ಇಂಡಿಯಾ ಕೋಟಾದಡಿ ಇತರ ಹಿಂದುಳಿದ ವರ್ಗ(ಒಬಿಸಿ) ವಿದ್ಯಾರ್ಥಿಗಳಿಗೆ ಶೇ. 27, ಆರ್ಥಿಕವಾಗಿ ದುರ್ಬಲ ವರ್ಗ (ಇಡಬ್ಲ್ಯುಎಸ್​) ವಿದ್ಯಾರ್ಥಿಗಳಿಗೆ ಶೇ. 10 ಮೀಸಲಾತಿ ಸಿಗಲಿದೆ. ಸ್ನಾತಕೋತ್ತರ ವೈದ್ಯಕೀಯ/ದಂತ ವೈದ್ಯಕೀಯ (ಎಂಬಿಬಿಎಸ್​/ಎಂಡಿ/ಎಂಎಸ್​/ಡಿಪ್ಲೊಮಾ/ಬಿಡಿಎಸ್​/ಎಂಡಿಎಸ್​) ವಿದ್ಯಾರ್ಥಿಗಳಿಗೆ 2021-22ರ ಸಾಲಿನಿಂದಲೇ ಇದು ಅನ್ವಯವಾಗಲಿದೆ.

ಬಹಳ ಕಾಲದಿಂದ ಬಾಕಿ ಉಳಿದಿದ್ದ ಈ ವಿಷಯಕ್ಕೆ ಸಂಬಂಧಿಸಿದಂತೆ ಜುಲೈ 26ರಂದು ಪ್ರಧಾನಿ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಈ ಬಗ್ಗೆ ನಿರ್ಣಯ ತಳೆಯಲಾಗಿದೆ. ಸ್ನಾತಕ ಹಾಗೂ ಸ್ನಾತಕೋತ್ತರ ವಿದ್ಯಾರ್ಥಿಗಳಿಗೆ ಮೀಸಲಾತಿ ಕೊಡುವ ಕುರಿತ ವಿಷಯ ಇದಾಗಿದೆ. ಈ ನಿರ್ಣಯದಿಂದ ಪ್ರತಿವರ್ಷ ಸುಮಾರು 5,500 ವಿದ್ಯಾರ್ಥಿಗಳಿಗೆ ಅನುಕೂಲ ಆಗಲಿದೆ.

ಇದನ್ನೂ ಓದಿ: ಅವರಿಬ್ಬರಿಗೆ ಕಣ್ಣೀರು ಬರಲ್ಲ, ಯಡಿಯೂರಪ್ಪ ಅವರಿಗೆ ಕಣ್ಣೀರು ಬಂದಿದ್ದರಲ್ಲಿ ತಪ್ಪಿಲ್ಲ: ಶಾಸಕ ರಘುಪತಿ ಭಟ್​

2007ರಲ್ಲಿ ಸುಪ್ರೀಂಕೋರ್ಟ್​ ಎಸ್​ಸಿಗೆ ಶೇ15, ಎಸ್​ಟಿಗೆ ಶೇ. 7.5 ಮೀಸಲಾತಿಯನ್ನು ಆಲ್​ ಇಂಡಿಯಾ ಕೋಟಾದಡಿ ನೀಡಿತ್ತು. ಬಳಿಕ ಸೆಂಟ್ರಲ್ ಎಜುಕೇಷನಲ್​ ಇನ್​ಸ್ಟಿಟ್ಯೂಷನ್ಸ್​ (ರಿಸರ್ವೇಷನ್​ ಇನ್ ಅಡ್ಮಿಷನ್​) ಆ್ಯಕ್ಟ್​ನಲ್ಲಿ 2007ರಲ್ಲಿ ಒಬಿಸಿಗೆ ಶೇ. 27 ನೀಡಲಾಗಿದ್ದರೂ ಅದು ಕೆಲವು ಕಾಲೇಜುಗಳಿಗಷ್ಟೇ ಸೀಮಿತವಾಗಿದ್ದು, ಆಲ್​ ಇಂಡಿಯಾ ಕೋಟಾದಡಿ ಬರುತ್ತಿರಲಿಲ್ಲ.

ಆದರೆ ಈಗಿನ ನಿರ್ಧಾರದಿಂದ ಪ್ರತಿವರ್ಷ ಸುಮಾರು 1500 ಒಬಿಸಿ ವಿದ್ಯಾರ್ಥಿಗಳಿಗೆ ಎಂಬಿಬಿಎಸ್​, 2500 ಒಬಿಸಿ ವಿದ್ಯಾರ್ಥಿಗಳಿಗೆ ಸ್ನಾತಕೋತ್ತರ ಮತ್ತು 550 ಇಡಬ್ಲ್ಯುಎಸ್​ ವಿದ್ಯಾರ್ಥಿಗಳಿಗೆ ಎಂಬಿಬಿಎಸ್​ ಹಾಗೂ ಸುಮಾರು 1000 ಇಡಬ್ಲ್ಯುಎಸ್​ ವಿದ್ಯಾರ್ಥಿಗಳಿಗೆ ಸ್ನಾತಕೋತ್ತರ ಪದವಿ ಮಾಡಲು ಅವಕಾಶ ಸಿಗಲಿದೆ. (ಏಜೆನ್ಸೀಸ್)

https://www.vijayavani.net/woman-lost-life-herself-due-to-financial-burden/

https://www.vijayavani.net/cm-pramod-sawant-asks-parents-why-girls-were-out-so-late-at-night/