ಕರೊನಾ ಕಾಲದಲ್ಲೂ ರಂಗು; 2020 ಸಮಗ್ರ ನೋಟ

ಕಾಲದ ಓಟ ಮತ್ತೊಂದು ವರ್ಷವನ್ನು ಹಿಂದಕ್ಕೆ ಹಾಕಿದೆ. 2021ನ್ನು ಬರಮಾಡಿಕೊಳ್ಳಲು ಕೆಲವೇ ದಿನಗಳು ಬಾಕಿ. ಹಲವು ಸ್ಥಿತ್ಯಂತರ, ತಲ್ಲಣಗಳಿಗೆ ಕಾರಣವಾದ 2020 ಬಹುತೇಕರಿಗೆ ನೋವು ನೀಡಿದ್ದೇ ಹೆಚ್ಚು. ಹೊಸ ವರ್ಷವಾದರೂ ಆ ಚಿಂತೆಗಳನ್ನೆಲ್ಲ ಕಳೆಯಲಿ ಎಂಬ ಆಶಯದೊಂದಿಗೆ ‘ವಿಜಯವಾಣಿ’ ಈ ವರ್ಷದ ವಿದ್ಯಮಾನಗಳನ್ನು ಕಟ್ಟಿಕೊಡುತ್ತಿದೆ. ಕಳೆದ ಎಂಟು ವರ್ಷಗಳಿಂದ ಓದುಗರ ಮೆಚ್ಚುಗೆಗೆ ಪಾತ್ರವಾಗಿರುವ ಈ ‘ಸಮಗ್ರ ಹಿನ್ನೋಟ’ ಸರಣಿ ಡಿ.31ರವರೆಗೂ ಮುಂದುವರಿಯಲಿದೆ.

ಕರೊನಾ ಬೇರೆಲ್ಲ ಚಟುವಟಿಕೆಗಳನ್ನು ಥಂಡಾ ಹೊಡೆಸಿದರೂ ರಾಜಕೀಯ ಹಗ್ಗ-ಜಗ್ಗಾಟಗಳಿಗೇನೂ ಕೊರತೆ ಇರಲಿಲ್ಲ. ಸುರಕ್ಷಾ ಕ್ರಮಗಳೊಂದಿಗೆ ಕೆಲ ರಾಜ್ಯಗಳಲ್ಲಿ ವಿಧಾನಸಭೆ ಚುನಾವಣೆ ನಡೆದವು. ಅಂಥ ಚೇತರಿಕೆ ಕಾಣದ ಕಾಂಗ್ರೆಸ್, ಆಂತರಿಕ ಸಮಸ್ಯೆಗಳಿಗೂ ಸಾಕ್ಷಿಯಾಯಿತು. ಬಿಜೆಪಿ ಮತ್ತಷ್ಟು ಪ್ರದೇಶಗಳಿಗೆ ವಿಸ್ತರಣೆಗೊಂಡಿತು. ಬಿಹಾರದ ಗೆಲುವು ಎನ್​ಡಿಎ ವಿಶ್ವಾಸ ಹೆಚ್ಚಿಸಿತು.

ಬಿಜೆಪಿ 2019ರಲ್ಲಿ ಕೇಂದ್ರದಲ್ಲಿ ಅಧಿಕಾರಕ್ಕೆ ಮರಳಿ ಬಂದ ಉತ್ಸಾಹದಲ್ಲೇ 2020ರಲ್ಲಿ ಹಲವು ರಾಜ್ಯಗಳ ವಿಧಾನಸಭಾ ಚುನಾವಣೆಗಳನ್ನು ಎದುರಿಸಿತು. ಬಿಹಾರದಲ್ಲಿ ‘ದೊಡ್ಡಣ್ಣ’ನಾಗಿ ಬಡ್ತಿ ಪಡೆದು, ಮೇಲುಗೈ ಸಾಧಿಸಿತು. ಮಧ್ಯಪ್ರದೇಶದಲ್ಲಿ ಮರಳಿ ಅಧಿಕಾರಕ್ಕೆ ಬಂದಿತು. ಹೈದರಾಬಾದ್ ಮಹಾನಗರಪಾಲಿಕೆ ಚುನಾವಣೆಯನ್ನೂ ಪ್ರತಿಷ್ಠೆಯಾಗಿ ಸ್ವೀಕರಿಸಿ, ಅಬ್ಬರದ ಪ್ರಚಾರ ನಡೆಸಿತು. ಪರಿಣಾಮ, ಸೀಟುಗಳ ಸಂಖ್ಯೆಯನ್ನು ಗಣನೀಯವಾಗಿ ಹೆಚ್ಚಿಸಿಕೊಂಡಿತು. ನಟಿಯರಾದ ಖುಷ್ಬೂ, ವಿಜಯಶಾಂತಿ ಕಮಲಪಾಳಯ ಸೇರಿದರು.

2019ರ ಸೋಲಿನ ಆಘಾತದಿಂದ ಕಾಂಗ್ರೆಸ್ ಇನ್ನೂ ಹೊರಬಂದಿಲ್ಲ. ನಾಯಕತ್ವ ಬದಲಾವಣೆ ಕೂಗು ಪಕ್ಷದೊಳಗೇ ವ್ಯಾಪಕವಾಗುತ್ತಿದ್ದು, ಹಿರಿಯ ನಾಯಕರು ಹಂಗಾಮಿ ಅಧ್ಯಕ್ಷೆ ಸೋನಿಯಾ ಗಾಂಧಿಗೆ ಬರೆದ ಪತ್ರ ಭಾರಿ ವಿವಾದ ಸೃಷ್ಟಿಸಿತು. ಕೆಲ ರಾಜ್ಯಗಳ ಸಂಘಟನೆಯಲ್ಲಿ ಸಣ್ಣಪುಟ್ಟ ಬದಲಾವಣೆ ಮಾಡಿದರೂ, ಕಾಂಗ್ರೆಸ್ ಪುಟಿದೇಳಲು ಹರಸಾಹಸ ಪಡುತ್ತಿದೆ.

ಗುಜರಾತ್, ಮಧ್ಯಪ್ರದೇಶ, ಕರ್ನಾಟಕದಲ್ಲಿ ಹಲವು ಕ್ಷೇತ್ರಗಳಿಗೆ ನಡೆದ ಉಪಚುನಾವಣೆಯಲ್ಲಿ ಬಿಜೆಪಿ ಹಿಡಿತ ಸಾಧಿಸಿತು, ಮಹಾರಾಷ್ಟ್ರದಲ್ಲಿ ಮುಗ್ಗರಿಸಿತು. ಒಟ್ಟಾರೆ ವರ್ಷವನ್ನು ಅವಲೋಕಿಸಿದರೆ ಬಿಜೆಪಿಯ ಸಂಘಟನಾ ಬೇರು ಮತ್ತಷ್ಟು ವಿಸ್ತರಣೆಯಾಗಿದ್ದರೆ, ಕಾಂಗ್ರೆಸ್ ಹಾನಿ ಅನುಭವಿಸಿದೆ. ಪ್ರಾದೇಶಿಕ ಪಕ್ಷಗಳ ಪ್ರಾಬಲ್ಯ ಮುಂದುವರಿದಿದೆ.

ಸುಸ್ತಾದ ಸಚಿನ್: ರಾಜಸ್ಥಾನದಲ್ಲಿ ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ವಿರುದ್ಧ ಬಂಡಾಯವೆದ್ದ ಉಪಮುಖ್ಯಮಂತ್ರಿ ಸಚಿನ್ ಪೈಲಟ್ ಕಾಂಗ್ರೆಸ್ ತೊರೆಯುವುದಾಗಿ ಘೋಷಿಸಿದರೂ, ನಿರ್ಧಾರದಿಂದ ಹಿಂದೆ ಸರಿದರು. ಹಲವು ದಿನಗಳ ಕಾಲ ನಡೆದ ಬಿಕ್ಕಟ್ಟಿನ ವೇಳೆ ಕೇಂದ್ರ ನಾಯಕರು ಮಧ್ಯಪ್ರವೇಶಿಸಿ ರಾಜಿ, ಸಂಧಾನ ಮಾಡಿದರು. ಅದರ ಬೆನ್ನಲ್ಲೇ, ಕರೊನಾ ಸೋಂಕಿನಿಂದ ಆಸ್ಪತ್ರೆಗೆ ದಾಖಲಾದ ಸಚಿನ್ ದೈಹಿಕವಾಗಿಯೂ ಬಳಲಿದರು.

ಕೇಜ್ರಿ ಹವಾ: ದೆಹಲಿ ವಿಧಾನಸಭೆ ಚುನಾವಣೆಯಲ್ಲಿ ಆಮ್ ಆದ್ಮಿ ಪಕ್ಷ ಮತ್ತೆ ಸ್ಪಷ್ಟ ಬಹುಮತ ಪಡೆದುಕೊಂಡಿತು. ಎಎಪಿಯನ್ನು ಅಧಿಕಾರದಿಂದ ಕೆಳಗಿಳಿಸುವ ಬಿಜೆಪಿ ತಂತ್ರಗಳು ಫಲ ನೀಡಲಿಲ್ಲ. ಅರವಿಂದ ಕೇಜ್ರಿವಾಲ್ 3ನೇ ಬಾರಿ ದೆಹಲಿ ಮುಖ್ಯಮಂತ್ರಿಯಾಗಿ ಫೆಬ್ರವರಿ ಯಲ್ಲಿ ಪ್ರಮಾಣ ವಚನ ಸ್ವೀಕರಿಸಿದರು.

ಸಂಚಲನ ಸೃಷ್ಟಿಸಿದ ನಮಸ್ತೆ ಟ್ರಂಪ್

ಸಿಂಧಿಯಾ ಬಂಡಾಯ ಬಿಜೆಪಿಗೆ ಬಲ

ಮಧ್ಯಪ್ರದೇಶದ ಪ್ರಭಾವಿ ಧುರೀಣ ಜ್ಯೋತಿರಾದಿತ್ಯ ಸಿಂಧಿಯಾ ಕಾಂಗ್ರೆಸ್​ನಲ್ಲಿ ತಮ್ಮನ್ನು ನಿರ್ಲಕ್ಷಿಸಲಾಗುತ್ತಿದೆ ಎಂದು ಆರೋಪಿಸಿ ಬಂಡಾಯವೆದ್ದರು. ಬೆಂಬಲಿತ ಶಾಸಕರೊಂದಿಗೆ ಸಿಂಧಿಯಾ ಬಿಜೆಪಿ ಸೇರಿದ 15 ತಿಂಗಳ ನಂತರ ಬಿಜೆಪಿ ಅಧಿಕಾರಕ್ಕೆ ಮರಳಿತು. ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿದವರನ್ನು ಉಪಚುನಾವಣೆಯಲ್ಲಿ ಗೆಲ್ಲಿಸಿ ತರುವ ಮೂಲಕ, ಶಿವರಾಜ್ ಸಿಂಗ್ ಚೌಹಾಣ್ ಕುರ್ಚಿ ಭದ್ರವಾಯಿತು. ಸಿಂಧಿಯಾ ಸದ್ಯ ಬಿಜೆಪಿಯಿಂದ ರಾಜ್ಯಸಭಾ ಸದಸ್ಯರಾಗಿದ್ದು, ಸಂಪುಟ ಸೇರುವ ಸಾಧ್ಯತೆ ಇದೆ.

ಬಂಗಾಳ ಸಂಘರ್ಷ

ಪಶ್ಚಿಮ ಬಂಗಾಳದಲ್ಲಿ ವಿಧಾನಸಭೆ ಚುನಾವಣೆ 2021ರಲ್ಲಿ ನಡೆಯಲಿದ್ದರೂ, ರಾಜಕೀಯ ಜಿದ್ದಾಜಿದ್ದಿ ಮಾತ್ರ ಹಲವು ತಿಂಗಳು ಮೊದಲೇ ಆರಂಭವಾಯಿತು. ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಕೇಂದ್ರದ ವಿರುದ್ಧ ಸಂಘರ್ಷವನ್ನೇ ಸಾರಿದ್ದು, ಅಸಹಕಾರ ನೀತಿ ಅನುಸರಿಸುತ್ತಿದ್ದಾರೆ. ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ಈ ರಾಜ್ಯದಲ್ಲಿ ಪಡೆದ ಸ್ಥಾನಗಳಿಂದ ಉತ್ಸಾಹ ಹೆಚ್ಚಿಸಿಕೊಂಡಿದ್ದು, ಅಲ್ಲಿ ಅಧಿಕಾರಕ್ಕೆ ಬರಲು ಶ್ರಮಿಸುತ್ತಿದೆ. ಗೃಹ ಸಚಿವ ಅಮಿತ್ ಷಾ ಈಗಾಗಲೇ ಎರಡು ಸುತ್ತಿನ ಪ್ರವಾಸ ಕೈಗೊಂಡಿದ್ದು, ಮಮತಾ ಸಂಪುಟದಲ್ಲಿ ಸಾರಿಗೆ ಸಚಿವರಾಗಿದ್ದ ಸುವೇಂದು ಅಧಿಕಾರಿ ಸಮೇತ ಕೆಲ ಹಾಲಿ ಶಾಸಕರು ಕಮಲ ಪಾಳಯ ಸೇರಿದ್ದಾರೆ. ಬಿಜೆಪಿ ಅಧ್ಯಕ್ಷ ಜೆ.ಪಿ.ನಡ್ಡಾ ರಾಜ್ಯ ಪ್ರವಾಸದ ಸಂದರ್ಭದಲ್ಲಿ ಅವರ ಬೆಂಗಾವಲು ಪಡೆ ಮೇಲೆ ಕಲ್ಲುತೂರಾಟ ನಡೆದ ಘಟನೆ ಆರೋಪ-ಪ್ರತ್ಯಾರೋಪಕ್ಕೆ ಕಾರಣವಾಯಿತು.

ಟೈಟ್ ಫೈಟ್ ನೀಡಿದ ತೇಜಸ್ವಿ ಯಾದವ್

ಜಗತ್ತಿನಾದ್ಯಂತ ಕರೊನಾ ಕರಿನೆರಳು

ಬಹುತೇಕ 2020ರ ವರ್ಷವಿಡೀ ಜಗತ್ತು ಕರೊನಾ ಹಾವಳಿಯಿಂದಾಗಿ ನಾನಾ ಸಂಕಷ್ಟ ಅನುಭವಿಸಬೇಕಾಗಿ ಬಂತು. ಹೀಗಾಗಿ ಕರೊನಾ ಪರಿಗಣನೆಯಿಲ್ಲದೆ ಯಾವ ರಂಗವನ್ನೂ ಅವಲೋಕಿಸುವಂತಿಲ್ಲ. ಈಗಲೂ ಕಷ್ಟಪರಂಪರೆ ಮುಗಿದಿಲ್ಲ. ಲಸಿಕೆ ಬಂದು ವ್ಯಾಪಕವಾಗಿ ಜನರಿಗೆ ನೀಡಿದ ನಂತರದಲ್ಲಿ ಪರಿಸ್ಥಿತಿ ಸುಧಾರಿಸಬಹುದು. ಕರೊನಾ ನಿಯಂತ್ರಣದ ಸಲುವಾಗಿ ಲಾಕ್ ಡೌನ್ ವಿಧಿಸಿದ್ದರಿಂದಾಗಿ ಇಡೀ ಜನಜೀವನ ಸ್ತಬ್ಧವಾಯಿತು. ಎಲ್ಲ ಬಗೆಯ ಕೈಗಾರಿಕೆಗಳು ತೊಂದರೆಗೆ ಸಿಲುಕಿದವು. ನಿರುದ್ಯೋಗ ಪ್ರಮಾಣ ಏರಿತು. ಜತೆಗೆ, ಉದ್ಯೋಗನಷ್ಟವೂ ಆಯಿತು. ಬರಲಿರುವ ವರ್ಷದಲ್ಲಿ ಪರಿಸ್ಥಿತಿ ಸುಧಾರಿಸುವ ಆಶಾವಾದ ವ್ಯಕ್ತವಾಗಿರುವುದೊಂದೇ ಸಮಾಧಾನದ ಊರುಗೋಲು.

ಕರೊನಾ ಹಾದಿ

• 2019 ನವೆಂಬರ್ 17ರಂದು ಚೀನಾದ ವುಹಾನ್ ನಗರದ 55 ವರ್ಷದ ವ್ಯಕ್ತಿಗೆ ಮೊದಲಿಗೆ ಕರೊನಾ ಸೋಂಕು ಕಾಣಿಸಿಕೊಂಡಿತು.
• 2020ರ ಆರಂಭದಲ್ಲಿ ಪ್ರಪಂಚದ ಹಲವು ದೇಶಗಳಲ್ಲಿ ಸೋಂಕು ಪ್ರಸರಣ.
• 2020 ಜನವರಿ 23ರಂದು ವುಹಾನ್ ನಗರದಲ್ಲಿ ಸಂಪೂರ್ಣ ಲಾಕ್​ಡೌನ್ ಘೋಷಣೆ.
• ಅಮೆರಿಕದಲ್ಲಿ ಜನವರಿ 21, ಫ್ರಾನ್ಸ್​ನಲ್ಲಿ ಜನವರಿ 24, ಭಾರತದಲ್ಲಿ ಜನವರಿ 30, ಇಟಲಿಯಲ್ಲಿ ಜನವರಿ 31ರಂದು ಮೊದಲ ಕರೊನಾ ಪ್ರಕರಣ ದಾಖಲು.
• ವಿಶ್ವ ಆರೋಗ್ಯ ಸಂಸ್ಥೆ ಜನವರಿ 30ರಂದು ಕರೊನಾ ಸೋಂಕನ್ನು ‘ಜಾಗತಿಕ ಆರೋಗ್ಯ ತುರ್ತು ಪರಿಸ್ಥಿತಿ’ ಎಂದು ಘೋಷಿಸಿತು.

ಪರಿಣಾಮ

• ಕರೊನಾದಿಂದಾಗಿ, ಚೀನಾ ಹೊರತುಪಡಿಸಿ ಬಹುತೇಕ ಎಲ್ಲ ದೇಶಗಳ ಒಟ್ಟು ದೇಶೀಯ ಉತ್ಪನ್ನ (ಜಿಡಿಪಿ) ಕುಸಿದಿದೆ. ಹೆಚ್ಚಿನ ದೇಶಗಳಲ್ಲಿ ಜಿಡಿಪಿ ಋಣಾತ್ಮಕವಾಗಿದೆ (ಮೈನಸ್).
• ಜಾಗತಿಕವಾಗಿ ಕೋಟ್ಯಂತರ ಉದ್ಯೋಗನಷ್ಟವಾಗಿದೆ. ಖಚಿತವಾಗಿ ಎಷ್ಟು ಮಂದಿ ಉದ್ಯೋಗ ಕಳೆದುಕೊಂಡಿದ್ದಾರೆ ಎಂಬ ಮಾಹಿತಿ ಇಲ್ಲವಾದರೂ, ಇದು ಕೋಟಿಗಳ ಸಂಖ್ಯೆಯಲ್ಲಿದೆ. ಅಮೆರಿಕದಲ್ಲಿ ನಿರುದ್ಯೋಗದ ಪ್ರಮಾಣ ವರ್ಷದ ಹಿಂದೆ ಶೇ.3.4 ಇದ್ದರೆ, ಈ ವರ್ಷ ಅದು ಶೇ.10.4ಕ್ಕೆ ಏರಿದೆ. ಇಟಲಿಯಲ್ಲಿ ಶೇ.10 ಇದ್ದುದು ಶೇ.12 ಆಗಿದೆ. ಕೆನಡಾದಲ್ಲಿ ಶೇ.5.7 ಇದ್ದುದು ಶೇ.7.5ಕ್ಕೆ ಹೆಚ್ಚಿದೆ.
• ಬಹುತೇಕ ಎಲ್ಲ ಕೈಗಾರಿಕೆಗಳು ಅಪಾರ ಹಾನಿ ಅನುಭವಿಸಿವೆ. ಕೆಲ ದಿನಗಳಿಂದ ಕೈಗಾರಿಕಾ ಕಾರ್ಯಾಚರಣೆ ಶೇ.60-70ರಷ್ಟು ಶುರುವಾಗಿದ್ದು, ಮುಂದಿನ ದಿನಗಳಲ್ಲಿ ಚೇತರಿಕೆಯ ಆಶಾಭಾವವಿದೆ.
• ಕರೊನಾ ಲಾಕ್​ಡೌನ್ ಅವಧಿಯಲ್ಲಿ ಜಗತ್ತಿನ ಬಹುತೇಕ ಎಲ್ಲ ಷೇರು ಮಾರುಕಟ್ಟೆಗಳು ಕುಸಿತ ಕಂಡವು.
• ಬದಲಾದ ಬದುಕು-ಕರೊನಾ ನಿಯಂತ್ರಣಕ್ಕೆಂದು ವಿಶ್ವದ ಬಹುತೇಕ ದೇಶಗಳು ದೀರ್ಘ ಅವಧಿಗೆ ಲಾಕ್​ಡೌನ್ ವಿಧಿಸಿದವು. ಕೆಲ ದೇಶಗಳಲ್ಲಿ ಈಗಲೂ ಅದು ಮುಂದುವರಿದಿದೆ. ಇದರಿಂದ ಸಾಮಾಜಿಕವಾಗಿ, ಕೌಟುಂಬಿಕವಾಗಿ, ಶೈಕ್ಷಣಿಕವಾಗಿ ಹೀಗೆ ಎಲ್ಲ ರಂಗಗಳ ಮೇಲೆ ಪರಿಣಾಮ ಆಯಿತು.
• ಜನರಲ್ಲಿ ಒಂಟಿತನ, ಖಿನ್ನತೆ, ಭಯ, ಅಭದ್ರತೆಯ ಸಮಸ್ಯೆಗಳು ಹೆಚ್ಚಿದವು.
• ಶಾಲೆಗಳು ಇನ್ನೂ ಪೂರ್ಣ ಪ್ರಮಾಣದಲ್ಲಿ ಕಾರ್ಯಾರಂಭಿಸಿಲ್ಲ.
• ಲಾಕ್​ಡೌನ್ ಕಾರಣಕ್ಕೆ ಜನರು ಮನೆಯಲ್ಲೇ ಉಳಿಯುಂತಾಗಿದ್ದರಿಂದ, ಜೀವನಶೈಲಿಯಲ್ಲಿ ಹಲವು ಬದಲಾವಣೆಗಳು ಕಂಡುಬಂದವು. ಆರೋಗ್ಯದ ಬಗ್ಗೆ ಜನರಲ್ಲಿ ಅರಿವು ಹೆಚ್ಚಿದ್ದು, ಮನೆ ಆಹಾರಕ್ಕೆ ಮತ್ತು ಸಾಂಪ್ರದಾಯಿಕ ಆಹಾರಕ್ಕೆ ಒಲವು ಹೆಚ್ಚಿದೆ.
• ಕರೊನಾ ಕಾರಣಕ್ಕೆ ಆರೋಗ್ಯ ವ್ಯವಸ್ಥೆಯ ಧನಾತ್ಮಕ ಮತ್ತು ಋಣಾತ್ಮಕ ಮುಖಗಳೆರಡೂ ಮುನ್ನೆಲೆಗೆ ಬರುವಂತಾಯಿತು. ಅದರಲ್ಲೂ ವಿಶೇಷವಾಗಿ, ಈ ಸನ್ನಿವೇಶವನ್ನು ಉಪಯೋಗಿಸಿಕೊಂಡು ಸರ್ಕಾರಿ ಆರೋಗ್ಯ ವ್ಯವಸ್ಥೆ ಸುಧಾರಣೆಯಾಗುವ ಭರವಸೆ ವ್ಯಕ್ತವಾಗಿದೆ.

ಬರಹ: ರವೀಂದ್ರ ಎಸ್. ದೇಶಮುಖ್

https://www.vijayavani.net/actress-rashmika-mandanna-remembers-all-those-old-moments/

https://www.vijayavani.net/a-chennai-woman-the-mother-has-been-arrested-for-the-of-her-son/

https://www.vijayavani.net/in-the-name-of-marriage-a-groom-became-a-victim-of-fraud/