1.5 ಲಕ್ಷ ಕೋಟಿ ರೂಪಾಯಿ ದಾಟಿದ ಜನಧನ ಠೇವಣಿ: 44.23 ಕೋಟಿಗೂ ಅಧಿಕ ಖಾತೆ ಚಾಲ್ತಿಯಲ್ಲಿ..

ನವದೆಹಲಿ: ಜನಧನ ಯೋಜನೆಯಡಿ ತೆರೆಯಲಾದ ಬ್ಯಾಂಕ್ ಖಾತೆಗಳಲ್ಲಿ ಠೇವಣಿ ಮೊತ್ತ 1.5 ಲಕ್ಷ ಕೋಟಿ ರೂಪಾಯಿ ದಾಟಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯದ ಅಂಕಿಅಂಶ ತಿಳಿಸಿದೆ. ಕೇಂದ್ರ ಸರ್ಕಾರ ಸುಮಾರು ಏಳೂವರೆ ವರ್ಷದ ಹಿಂದೆ ಈ ಯೋಜನೆಯನ್ನು ಆರಂಭಿಸಿತ್ತು. ಪ್ರಧಾನ ಮಂತ್ರಿ ಜನಧನ ಯೋಜನೆಯ (ಪಿಎಂಜೆಡಿವೈ) 44.23 ಕೋಟಿಗೂ ಅಧಿಕ ಖಾತೆಗಳಲ್ಲಿ 2021ರ ಡಿಸೆಂಬರ್ ಅಂತ್ಯದಲ್ಲಿ ಒಟ್ಟು 1,50,939.36 ಕೋಟಿ ರೂಪಾಯಿ ಹಣ ಇತ್ತು ಎಂದು ಸಚಿವಾಲಯ ತಿಳಿಸಿದೆ. ರಾಷ್ಟ್ರೀಯ ಹಣಕಾಸು ಒಳಗೊಳ್ಳುವಿಕೆ ಮಿಷನ್ ಆದ ಪಿಎಂಜೆಡಿವೈ ಕಳೆದ ವರ್ಷ ಆಗಸ್ಟ್​ನಲ್ಲಿ ಏಳು ವರ್ಷ ಪೂರೈಸಿದೆ. 2014 ಆಗಸ್ಟ್ 15ರ ಸ್ವಾತಂತ್ರ್ಯ ದಿನದ ಭಾಷಣದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಈ ಯೋಜನೆಯನ್ನು ಘೋಷಿಸಿದ್ದರು.

ರುಪೇ ಡೆಬಿಟ್ ಕಾರ್ಡ್: 31.28 ಕೋಟಿ ಪಿಎಂಜೆಡಿವೈ ಫಲಾನುಭವಿಗಳಿಗೆ ರುಪೇ ಡೆಬಿಟ್ ಕಾರ್ಡ್ ನೀಡಲಾಗಿದೆ. ರುಪೇ ಕಾರ್ಡ್​ಗಳ ಸಂಖ್ಯೆ ಹಾಗೂ ಅದರ ಬಳಕೆದಾರರ ಸಂಖ್ಯೆಯಲ್ಲಿ ಗಣನೀಯ ಏರಿಕೆಯಾಗಿದೆ.

ಉದ್ದೇಶ ಏನು?: ಕೈಗೆಟಕುವ ದರದಲ್ಲಿ ಹಣಕಾಸು ಉತ್ಪನ್ನಗಳು, ಸೇವೆಗಳು ಜನರಿಗೆ ಲಭ್ಯ ವಾಗುವುದನ್ನು ಖಾತರಿಪಡಿಸುವುದು ಸರ್ಕಾ ರದ ಈ ಮಹತ್ವದ ಯೋಜನೆಯ ಉದ್ದೇಶ.

24.61 ಕೋಟಿ ಮಹಿಳೆಯರು: ಒಟ್ಟು ಖಾತೆಗಳಲ್ಲಿ ಸುಮಾರು 24.61 ಕೋಟಿ ಖಾತೆದಾರರು ಮಹಿಳೆಯರಾಗಿದ್ದಾರೆ. ಯೋಜನೆಯ ಮೊದಲ ವರ್ಷ 17.90 ಕೋಟಿ ಖಾತೆಗಳನ್ನು ತೆರೆಯಲಾಗಿತ್ತು. ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್​ಬಿಐ) ಮಾರ್ಗಸೂಚಿ ಪ್ರಕಾರ, ಜನ ಧನ್ ಖಾತೆ ಸಹಿತ ಮೂಲ ಉಳಿತಾಯ ಬ್ಯಾಂಕ್ ಠೇವಣಿ (ಬಿಎಸ್​ಬಿಡಿ) ಖಾತೆಗಳಲ್ಲಿ ಕನಿಷ್ಠ ಬ್ಯಾಲೆನ್ಸ್ ಇರಿಸಬೇಕೆಂದಿಲ್ಲ. ಜನ ಧನ್ ಖಾತೆದಾರರ ವ್ಯವಹಾರಗಳನ್ನು ಆಧರಿಸಿ ಪ್ರತಿ ದಿನವೂ ಖಾತೆಯಲ್ಲಿನ ಮೊತ್ತದಲ್ಲಿ ಏರುಪೇರಾಗಬಹುದು. ಕೆಲವು ದಿನ ಖಾತೆಯಲ್ಲಿ ಹಣವೇ ಉಳಿಯದಿರಬಹುದು. ಅದಕ್ಕೆ ಅವಕಾಶ ಕಲ್ಪಿಸಲಾಗಿದೆ.

ಯಾವ ಬ್ಯಾಂಕಲ್ಲಿ ಎಷ್ಟು ಖಾತೆ?

• ಸರ್ಕಾರಿ ಸ್ವಾಮ್ಯದ ಬ್ಯಾಂಕ್​ಗಳು 34.9 ಕೋಟಿ ಖಾತೆ.
• ಪ್ರಾದೇಶಿಕ ಗ್ರಾಮೀಣ ಬ್ಯಾಂಕ್​ಗಳು 8.05 ಕೋಟಿ ಖಾತೆ.
• ಖಾಸಗಿ ವಲಯದ ಬ್ಯಾಂಕ್​ಗಳು 1.28 ಖಾತೆ.
• ಗ್ರಾಮೀಣ ಹಾಗೂ ಅರೆ-ನಗರ ಬ್ಯಾಂಕ್ ಶಾಖೆಗಳá- 29.54 ಕೋಟಿ ಖಾತೆ.

ಯುಪಿಐ ಸರ್ವರ್ ಡೌನ್ ಗ್ರಾಹಕರ ಪರದಾಟ

ನವದೆಹಲಿ: ಡಿಜಿಟಲ್ ಪೇಮೆಂಟ್ ವೇದಿಕೆಯಾದ ಯುಪಿಐನ (ಯುನಿಫೈಡ್ ಪೇಮೆಂಟ್ ಇಂಟರ್​ಫೇಸ್) ಸರ್ವರ್​ನಲ್ಲಿ ಭಾನುವಾರ ಸಮಸ್ಯೆ ಕಾಣಿಸಿಕೊಂಡ ಕಾರಣ ಕೆಲವು ಕಾಲ ಸೇವೆ ಸ್ಥಗಿತವಾಗಿತ್ತು. ನಂತರ ಸರ್ವರ್ ಅನ್ನು ಸರಿಪಡಿಸಲಾಯಿತು.ಸರ್ವರ್​ನಲ್ಲಿ ಮಧ್ಯಂತರ ತಾಂತ್ರಿಕ ದೋಷ ಎದುರಾದ ಕಾರಣ ಬಳಕೆದಾರರಿಗೆ ಅಡಚಣೆ ಆಗಿದ್ದಕ್ಕೆ ವಿಷಾದ ಇದೆ. ಆದರೆ, ಸಮಸ್ಯೆಯನ್ನು ಒಂದು ತಾಸಿನೊಳಗೆ ಸರಿಪಡಿಸಲಾಗಿದೆ ಎಂದು ಎನ್​ಪಿಸಿಐ ಹೇಳಿದೆ. ಬಳಕೆದಾರರು ಯುಪಿಐ ಸ್ಥಗಿತಗೊಂಡಿರುವ ಬಗ್ಗೆ ಟ್ವಿಟರ್​ನಲ್ಲಿ ಗಮನಸೆಳೆದರು. ತುರ್ತು ಸಮಯದಲ್ಲಿ ಸೇವೆ ಕೈಕೊಟ್ಟಿದ್ದಕ್ಕೆ ಅನೇಕರು ಅಸಮಾಧಾನ ವ್ಯಕ್ತಪಡಿಸಿದ್ದರು. ಎನ್​ಪಿಸಿಐ ಹೇಳುವಂತೆ ಸಮಸ್ಯೆ ಒಂದು ತಾಸಲ್ಲ ಎರಡ್ಮೂರು ತಾಸು ಇತ್ತು ಎಂದು ಆಕ್ರೋಶ ವ್ಯಕ್ತಪಡಿಸಿದ್ದರು. ಗೂಗಲ್ ಪೇ, ಫೋನ್​ಪೇ, ಪೇಟಿಮ್ ಸೇರಿ ಅನೇಕ ಡಿಜಿಟಲ್ ವ್ಯಾಲೆಟ್​ಗಳು ಯುಪಿಐ ವೇದಿಕೆಯನ್ನು ನೆಚ್ಚಿಕೊಂಡಿವೆ.

https://www.vijayavani.net/wife-lover-and-a-friend-is-arrested-in-murder-case-of-husband/

https://www.vijayavani.net/prashanth-sambargi-expressed-his-anger-against-karnataka-film-chamber-of-commerce/