ಸೈಕಲ್​ಗೆ ಡಿಕ್ಕಿ ಹೊಡೆದು ಎಸ್ಕೇಪ್​ ಆಗ್ತಿದ್ದ ಲಾರಿ ಚಾಲಕನನ್ನು ಚೇಸ್​ ಮಾಡಿ ಹಿಡಿದ ನಟಿ ನವ್ಯಾ ನಾಯರ್​!

ಆಲಪ್ಪುಳ: ಸೈಕಲ್​ಗೆ ಡಿಕ್ಕಿ ಹೊಡೆದು ಎಸ್ಕೇಪ್​ ಆಗುತ್ತಿದ್ದ ಲಾರಿ ಚಾಲಕನನ್ನು ಚೇಸ್​ ಮಾಡಿ ಹಿಡಿಯುವ ಮೂಲಕ ನಟಿ ನವ್ಯಾ ನಾಯರ್​, ನಿಜ ಜೀವನಲ್ಲಿಯೂ ತಾನೊಬ್ಬ ನಾಯಕಿ ಎಂಬುದನ್ನು ಸಾಬೀತು ಮಾಡಿದ್ದಾರೆ.

ಆಲಪ್ಪುಳ ಜಿಲ್ಲೆಯ ಪಟ್ಟಣಕ್ಕಾಡ್ ಗ್ರಾಮದ ಇಂಡಿಯನ್​ ಕಾಫಿ ಹೌಸ್ ಬಳಿ ಸೋಮವಾರ ಬೆಳಗ್ಗೆ 8.30ರ ಸುಮಾರಿಗೆ ಈ ಘಟನೆ ನಡೆದಿದೆ. ಅಪಘಾತದಲ್ಲಿ ರಮೇಶನ್​ ಎಂಬುವರು ಗಾಯಗೊಂಡಿದ್ದು ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ನೀಡಲಾಗುತ್ತಿದೆ.

ರಮೇಶನ್​ ಪ್ರಯಾಣಿಸುತ್ತಿದ್ದ ಸೈಕಲ್‌ಗೆ ಹರಿಯಾಣ ನೋಂದಣಿಯ ಲಾರಿ ಡಿಕ್ಕಿ ಹೊಡೆದಿದೆ. ಅಪಘಾತದ ನಂತರ ಚಾಲಕ ಲಾರಿ ನಿಲ್ಲಿಸದೇ ಅಲ್ಲಿಂದ ಪರಾರಿಯಾಗುತ್ತಿರುವುದನ್ನು ನಟಿ ನವ್ಯಾ ಮತ್ತು ಅವರ ಕುಟುಂಬ ನೋಡಿದೆ. ತಕ್ಷಣ ಲಾರಿಯನ್ನು ಚೇಸ್​ ಮಾಡಿ, ತಡೆದು ನಿಲ್ಲಿಸಿದ್ದಾರೆ. ಬಳಿಕ ನವ್ಯಾ ಅವರು ಕಂಟ್ರೋಲ್ ರೂಂಗೆ ಕರೆ ಮಾಡಿ ಅಪಘಾತದ ವರದಿ ಮಾಡಿದ್ದಾರೆ.

ನವ್ಯಾ ಅವರು ವರದಿ ನೀಡುತ್ತಿದ್ದಂತೆ ಹೆದ್ದಾರಿ ಪೊಲೀಸರು ಮತ್ತು ಪಟ್ಟಣಕ್ಕಾಡ್ ಎಎಸ್​ಐ ಸ್ಥಳಕ್ಕೆ ತಲುಪಿ, ಲಾರಿಯನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ. ಚಾಲಕನನ್ನು ಪೊಲೀಸರ ವಶಕ್ಕೆ ನೀಡಿ ನವ್ಯಾ ಅವರು ತಮ್ಮ ಪ್ರಯಾಣವನ್ನು ಮುಂದುವರೆಸಿದರು. ಗಾಯಗೊಂಡ ರಮೇಶನ್​ ಅವರನ್ನು ಹೆದ್ದಾರಿ ಪೊಲೀಸ್ ವಾಹನದಲ್ಲಿ ತುರವೂರು ತಾಲೂಕು ಆಸ್ಪತ್ರೆಗೆ ಸಾಗಿಸಿ, ಅಲ್ಲಿಂದ ಖಾಸಗಿ ಆಸ್ಪತ್ರೆಗೆ ಸ್ಥಳಾಂತರಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.

ನಟಿ ನವ್ಯಾ ನಾಯರ್​ ಮತ್ತು ಅವರ ಕುಟುಂಬ ಮುತ್ತುಕುಲಂನಲ್ಲಿರುವ ತಮ್ಮ ಮನೆಯಲ್ಲಿ ಓಣಂ ಆಚರಣೆಯನ್ನು ಮುಗಿಸಿ ಎರ್ನಾಕುಲಂಗೆ ಮರಳುತ್ತಿದ್ದರು. ಕಾರಿನಲ್ಲಿ ನವ್ಯಾ ಜತೆಗೆ ಅವರ ತಂದೆ, ತಾಯಿ, ಸಹೋದರ ಹಾಗೂ ಮಗ ಸಾಯಿಕೃಷ್ಣ ಇದ್ದರು ಎಂದು ಕೇರಳ ಮಾಧ್ಯಮಗಳು ವರದಿ ಮಾಡಿವೆ. (ಏಜೆನ್ಸೀಸ್​)

https://www.vijayavani.net/do-you-have-a-fish-symbol-on-your-palm-you-have-to-be-shocked-to-hear-its-meaning

https://www.vijayavani.net/a-rare-2-headed-snake-is-kansas-citys-most-charming-new-visitor

https://www.vijayavani.net/sonam-kapoors-father-in-law-harish-ahuja-buys-a-property-in-londons-notting-hill-for-rs-231-47-crore