ನಮ್ಮೂರು-ನಮ್ಮ ಕೆರೆ ಫಲಪ್ರದ: ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಹಭಾಗಿತ್ವ; 525ಕ್ಕೂ ಹೆಚ್ಚು ಕೆರೆಗೆ ಕಾಯಕಲ್ಪ

| ನವೀನ್ ಬಿಲ್ಗುಣಿ ಶಿವಮೊಗ್ಗ

ಹಲವು ಸಮಾಜಮುಖಿ ಕಾರ್ಯಗಳ ಮೂಲಕ ಗುರುತಿಸಿಕೊಂಡಿರುವ ಶ್ರೀಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿಸಿ ಟ್ರಸ್ಟ್ ಇದೀಗ ರಾಜ್ಯದೆಲ್ಲೆಡೆ ಕೆರೆಗಳ ಪುನಶ್ಚೇತನಕ್ಕೆ ನಾಂದಿ ಹಾಡಿದೆ. ವರ್ಷದಿಂದ ವರ್ಷಕ್ಕೆ ರೈತರ ಸಹಭಾಗಿತ್ವದಲ್ಲೇ ನೂರಾರು ಕೆರೆಗಳ ಹೂಳು ತೆಗೆಸುವ ಮೂಲಕ ಅಂತರ್ಜಲ ವೃದ್ಧಿಗೆ ಒತ್ತು ನೀಡಿದೆ. ಪ್ರಸಕ್ತ ವರ್ಷವೇ 500ಕ್ಕೂ ಹೆಚ್ಚು ಕೆರೆಗಳ ಪುನಶ್ಚೇತನಗೊಳಿಸುವ ಮೂಲಕ ‘ನಮ್ಮೂರು-ನಮ್ಮ ಕೆರೆ’ ಯೋಜನೆ ರಾಜ್ಯಾದ್ಯಂತ ಫಲಪ್ರದವಾಗಿದೆ.

ಶ್ರೀಕ್ಷೇತ್ರದ ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಗಡೆ ದೂರದೃಷ್ಟಿಯಿಂದ ಆರಂಭವಾದ ಯೋಜನೆ ಇದೀಗ ಗ್ರಾಮೀಣ ಭಾಗದಲ್ಲಿ ಮನೆಮಾತಾಗಿದೆ. ರೈತರಿಂದ ನಯಾಪೈಸೆ ನಿರೀಕ್ಷಿಸದೆ ಪಳೆಯುಳಿಕೆಯಂತಿರುವ ನೂರಾರು ಕೆರೆಗಳಿಗೆ ಮರುಜೀವ ನೀಡುತ್ತಿದ್ದು ಯಂತ್ರಗಳ ಮೂಲಕ ಹೂಳು ತೆಗೆಸಿ ರೈತರ ಹೊಲ, ಜಮೀನುಗಳ ಫಲವತ್ತತೆ ಹೆಚ್ಚಳಕ್ಕೂ ಮುನ್ನುಡಿ ಬರೆಯಲಾಗಿದೆ.

ಇದನ್ನೂ ಓದಿ: ಹತ್ತು ವರ್ಷಗಳಿಗೂ ಅಧಿಕ ಕಾಲ ಒಂದಾದ ಮೇಲೊಂದು ಹೆರಿಗೆ; 28ನೇ ವಯಸ್ಸಿನಲ್ಲೇ 9 ಮಕ್ಕಳ ಮಹಾತಾಯಿ!

ಯೋಜನೆಯು ರಾಜ್ಯದ 575 ಕೆರೆಗಳ ಅಭಿವೃದ್ಧಿಗೆ ಗುರಿ ಹಾಕಿಕೊಂಡಿತ್ತು. ತಾಲೂಕಿಗೊಂದು ಕೆರೆಯನ್ನು ಕೈಗೆತ್ತಿಕೊಂಡಿದ್ದು ಪ್ರಸ್ತುತ 525ಕ್ಕೂ ಅಧಿಕ ಕೆರೆಗಳ ಅಭಿವೃದ್ಧಿ ಪೂರ್ಣಗೊಂಡಿದೆ. ಮಾರ್ಚ್ ಅಂತ್ಯದೊಳಗೆ ಗುರಿ ಮುಟ್ಟಲಿದೆ. 39.59 ಕೋಟಿ ರೂ. ವೆಚ್ಚದಲ್ಲಿ ಹಾಲಿ 149.17 ಲಕ್ಷ ಕ್ಯೂಬಿಕ್ ಮೀಟರ್ ಹೂಳನ್ನು ಕೆರೆಗಳಿಂದ ತೆಗೆಯಲಾಗಿದೆ. ಪರಿಣಾಮ 340.01 ಗ್ಯಾಲನ್ ಹೆಚ್ಚುವರಿ ನೀರು ಸಂಗ್ರಹವಾಗುತ್ತಿದೆ. 1.54 ಲಕ್ಷ ಎಕರೆ ಕೃಷಿ ಭೂಮಿ ಫಲವತ್ತತೆ ಆಗುವಂತೆ ಮಾಡಿದ್ದು 2.47 ಲಕ್ಷ ರೈತ ಕುಟುಂಬಗಳು ಯೋಜನೆಯನ್ನು ಸದುಪಯೋಗ ಪಡಿಸಿಕೊಂಡಿವೆ. ಅಷ್ಟೇ ಅಲ್ಲದೆ, ಜಿಲ್ಲಾಡಳಿತ ಮತ್ತು ತಾಲೂಕು ಆಡಳಿತ ನೆರವಿನೊಂದಿಗೆ 127 ಎಕರೆ ಕೆರೆ ಒತ್ತುವರಿಯನ್ನೂ ತೆರವುಗೊಳಿಸಿದ ಸಾಧನೆ ಮಾಡಿದೆ.

ರಾಜ್ಯದಲ್ಲಿ 35 ಸಾವಿರಕ್ಕೂ ಅಧಿಕ ಕೆರೆಗಳಿದ್ದು ಸಂಘವು ಪ್ರತಿ ವರ್ಷ ತಾಲೂಕಿಗೊಂದು ಕೆರೆ ಆಯ್ದುಕೊಂಡು ರೈತರ ಸಹಕಾರದೊಂದಿಗೆ ಹೂಳೆತ್ತುವ ಕಾಯಕ ಮಾಡುತ್ತಿದೆ.

ರೈತರ ಸಹಭಾಗಿತ್ವ: ಪ್ರತಿ ವರ್ಷ ಹೂಳು ತುಂಬಿಕೊಂಡು ಕೆರೆಗಳ ವಿಸ್ತೀರ್ಣದ ಜತೆಗೆ ನೀರಿನ ಸಂಗ್ರಹವೂ ಕಡಿಮೆ ಆಗುತ್ತಿದೆ. ಇನ್ನು ಕೆಲವೆಡೆ ಒತ್ತುವರಿಯಿಂದ ಸಣ್ಣಪುಟ್ಟ ಕೆರೆಗಳು ಕಣ್ಮರೆಯಾಗುತ್ತಿವೆ. ಧರ್ಮಸ್ಥಳ ಸಂಘವು ಸರ್ಕಾರದ ನೆರವಿನ ಬದಲು ರೈತರ ಸಹಭಾಗಿತ್ವದಲ್ಲಿ ಹೂಳು ತೆಗೆಸುತ್ತಿದೆ. ಕನಿಷ್ಠ 2 ಎಕರೆಯಿಂದ ಗರಿಷ್ಠ 25 ಎಕರೆ ವಿಸ್ತೀರ್ಣದ ಕೆರೆಗಳ ಹೂಳನ್ನು ರೈತರ ಸಹಭಾಗಿತ್ವದಲ್ಲೇ ತೆಗೆಸಲಾಗಿದೆ.

ಪ್ರತಿ ಕೆರೆಗೆ 15 ಲಕ್ಷ ರೂ. ವೆಚ್ಚ: ಪ್ರತಿ ಕೆರೆಗೆ 10ರಿಂದ 15 ಲಕ್ಷ ರೂ.ವರೆಗೂ ವೆಚ್ಚ ತಗುಲುತ್ತಿದೆ. ಹೂಳು ತೆಗೆಸಲು ಯಂತ್ರಗಳ ಮೊರೆ ಹೋಗಿದ್ದು ಜೆಸಿಬಿ, ಹಿಟಾಚಿಗಳಿಗೆ ತಗುಲುವ ವೆಚ್ಚವನ್ನು ಧರ್ಮಸ್ಥಳ ಸಂಘವೇ ಭರಿಸಲಿದೆ. ಟ್ರ್ಯಾಕ್ಟರ್ ಅಥವಾ ಟಿಪ್ಪರ್​ಗಳ ಬಾಡಿಗೆಯನ್ನು ಮಾತ್ರ ರೈತರು ಭರಿಸಿಕೊಳ್ಳಬೇಕಿದೆ. ಕಣ್ಮರೆಯಾಗುತ್ತಿರುವ ಕೆರೆಗಳನ್ನು ಉಳಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶ. ತಾಲೂಕಿಗೊಂದು ಕೆರೆ, ಮಾದರಿ ಕೆರೆಗಳ ನಿರ್ವಣಕ್ಕೆ ಒತ್ತು ನೀಡಲಾಗುತ್ತಿದೆ. ಇದು ರೈತರಿಗೂ ಸಾಕಷ್ಟು ಲಾಭವಾಗುತ್ತಿದೆ. ಜಮೀನುಗಳಿಗೆ ಮಣ್ಣು ದೊರೆಯುತ್ತಿದ್ದು ಎಲ್ಲೆಡೆ ವ್ಯಾಪಕ ಬೆಂಬಲ ವ್ಯಕ್ತವಾಗುತ್ತಿದೆ.

https://www.vijayavani.net/fixed-deposit-of-rs-50000-for-giving-birth-to-third-child/

https://www.vijayavani.net/man-marries-two-woman-and-leading-life-on-shift-as-3-days-per-week-with-each-wife/