ಸದಸ್ಯರನ್ನು ಒಗ್ಗೂಡಿಸುವ ಸಭೆಗೆ ಹಣದ ಥೈಲಿ ಜತೆಗೆ ಅರ್ಧ ಲೀ. ಹಾಲಿನ ಪ್ಯಾಕೆಟ್ ಸಹ ಹೋಗುತ್ತದೆ. ಅಲ್ಲಿ ಮತ ಹಾಕಲು ಒಪ್ಪುವ ಮತದಾರರು ಅಭ್ಯರ್ಥಿ ಕಡೆಯವರ ಉಡುಗೊರೆ ಸ್ವೀಕರಿಸಿ ಹಾಲಿನ ಪ್ಯಾಕೇಟ್ ಮೇಲೆ ಕೈ ಇರಿಸಿ ಮಾತು ಕೊಡಬೇಕು. ಆಗಲೇ ಅವರ ಒಪ್ಪಂದ ಪಕ್ಕಾ ಆಗಿದೆ ಎಂದೂ, ಅವರು ನಾಳೆ ಬೇರೆ ಅಭ್ಯರ್ಥಿಯ ಆಮಿಷಕ್ಕೆ ಒಳಗಾಗುವುದಿಲ್ಲ ಎಂದು ಸ್ಪರ್ಧಿ ನಿರಾಳವಾಗುತ್ತಾರೆ. ಕೆಲವೊಮ್ಮೆ ಮತದಾರರ ನಿಷ್ಠೆ ಬಗ್ಗೆ ಅನುಮಾನವಿರುವ ಸಂದರ್ಭದಲ್ಲಿ ಹಾಲಿನ ಪ್ಯಾಕೇಟ್ ಜತೆಗೆ ಆ ಭಾಗದಲ್ಲಿ ಹೆಚ್ಚು ಧಾರ್ಮಿಕ ನಂಬಿಕೆ ಹೊಂದಿರುವ ದೇವರ ಫೋಟೋಗಳನ್ನೂ ಮುಟ್ಟಿಸಿ ಮಾತು ಪಡೆದುಕೊಳ್ಳಲಾಗುತ್ತದೆ. ಕಳೆದ ಬಾರಿ ಅಭ್ಯರ್ಥಿಯೊಬ್ಬರು ಬೆಳ್ಳಿನಾಣ್ಯ, ದೇವರ ಫೋಟೋಗಳನ್ನು ಕವರ್ನಲ್ಲಿಟ್ಟುಕೊಟ್ಟು ಹಾಲಿನ ಮೇಲೆ ಕೈಯಿರಿಸಿ ಮಾತು ಪಡೆದು ಯಶಸ್ಸು ಕಂಡಿದ್ದರು. ಅದನ್ನು ಈಗ ಎಲ್ಲರೂ ಅಳವಡಿಸಿಕೊಳ್ಳತೊಡಗಿದ್ದಾರೆ.
